ރައްޔިތުންގެ މެމްބަރުންގެ އަދަދު ހިފެހެއްޓުމަށް ހުށައެޅި އިސްލާހު ހިމެނޭހެން ރައްޔިތުންގެ މަޖިލީހުގެ މާމިނގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ޕީޖީ ލީޑަރު ގާސިމް އިބުރިމް މަޖިލީހަށް ހުށައެޅުއްވި 3 ބިލުވެސް މިއަދު މަޖިލީހުން ބޭރުކޮށްލައިފިއެވެ. 

ގާސިމް އިބުރާހިމް ހުށައެޅުއްވި ބިލުތައް ބޭރުކޮށްލާފައިވަނީ އެ ބިލުތައް ބަލައިގަތުމަށް ނެގުނު ވޯޓުގައި، ގިނަ މެމްބަރުނަތަކެއް އެ ބިލުތައް ބަލައިގަންނަން ބޭނުން ނުވާކަމަށް ވޯޓު ދެއްވުމާއި ގުޅިގެންނެވެ. 

އެގޮތުން ރައްޔިތުންގެ މަޖިލީހުގެ މެމްބަރުންގެ އަދަދު 87 އަށް ވުރެ އިތުރުނުވާ ގޮތަށް ގާނޫނުއަސާސީގައި ކަނޑައެޅުމަށް ގާސިމް ހުށައެޅުއްވި ބިލު ބޭރުކޮށްލީ ވޯޓުގައި ބައިވެރިވި 25 މެމްބަރުންގެ ވޯޓުންނެވެ. ޖަލްސާގައި 40 މެމްބަރުން ހާޒިރުވެ ތިއްބެވިއިރު އެ އިސްލާހާ އެއްކޮޅަށް ވޯޓު ދެއްވީ ހަތް މެމްބަރެކެވެ.

Advertisement

ގާސިމް ހުށަހެޅުއްވި އިސްލާހުގައިވާ ގޮތުން މަޖިލިހުގެ މެމްބަރުންގެ އަދަދަކަށް ވާން ޖެހޭނީ މިހާރު ތިއްބެވި ގޮތަށް 87 އެވެ. އެ އަދަދު އިތުރުވިޔަ ނުދިނުމަށްޓަކައި، ގާނޫނުއަސާސީގައި ބުނާ އިދާރީ ދާއިރާތަކުގެ ގޮތުގައި 87 އިންތިހާބީ ދާއިރާ ކަނޑައަޅައި، އެ އިން ކޮންމެ އިންތިހާބީ ދާއިރާއަކުން އިންތިހާބު ކުރަން ވާނީ އެންމެ މެމްބަރަކު ކަމަށް އިސްލާހުގައި ވެ އެވެ.

އެ ބިލާއި ގުޅޭގޮތުން ކުރިއަށް ގެންދިޔަ ބަހުސް މަރުހަލާގއިވެސް މެމްބަރުންގެ ބޮޑެތި ފާޑުކިޔުންތަކެއް އަމާޒުވެގެން ދިޔައެވެ. އެގޮތުން ގާސިމް އު ބިލު ހުށައަޅުއްވާފައިވަނީ އެކަށީގެންވާ މިންވަރަަށް ދިރާސާތައް ހައްދަވާފައި ނޫންކަން ބައެއް މެމްބަރުން ފާހަގަކުރެއްވިއެވެ. އަދި ބިލުގެ މަގްސަދުގައި ބަޔާންކުރާ ޚަރަދުކުޑަކުރުމުގެ ވާހަކައަކީވެސް ދެކޮޅު ޖެހޭ ވާހަކައެއް ނޫންކަމަށް މެމްބަރުން ފާހަގަކުރައްވާފައިވެއެވެ. އަދި ސަރުކާރުގެ ޚަރަދުތައް ކުޑަކުރުމަށް އެ ބިލަށްވުރެ މުހިންމު ކަންކަން ހުރިކަންވެސް މެމްބަރުން ފާހަގަކުރެއްވިއެވެ. 

ގާސިމްގެ އެ އިސްލާހު ބޭރުކޮށްލާފައިވާއިރު، ދިވެހިރާއްޖޭގެ ގާނޫނުލް އުގޫބާތަށް ނެގައުމަށް ގާސިމް ހުށައަޅުއްވާފައިވާ އިސްލާހާއި، ޖިނާއީ އިޖުރާއަތުގެ ގާނޫނަށް ގާސިމް ހުށައެޅި އިސްލާހުވެސް މިއަދުގެ ވޯޓުން ވަނީ ބޭރުކޮށްލާފައެވެ. 

މި ދެ އިސްލާހުވެސް ބޭރުކޯށްލާފައިވަނީ ވޯޓުގައި ބައިވެރިވި މެމްބަރުންގެ ފުރިހަމަ އަގުލަބިއްޔަތުންކަން ފާހަގަކޮށްލެވެއެވެ.