މަސްވެރިންގެ ހައްގުތަށް ކަށަވަރުކޮށްދިނުމަށް ގޮވާލާ އިދިކޮޅުން އިއްޔެ މާލޭގެ މާރުކޭޓު ސަރަހައްދުގައި ކުރި މުޒާހަރާގެ ތެރެއިން ހައްޔަރުކުރި 10 މީހުންގެ ތެރެއިން، އެކަކު ފިޔަވާ އެހެން އެންމެން ދޫކޮށްލައިފިއެވެ. 

ފުލުހުން މައުލޫމާތުދިން ގޮތުގައި މުޒާހަރާގެ ތެެރެއިން ހައްޔަރުކުރި މީހުންގެ ތެރެއިން ދެމީހެއްގެ ބަންދު މުއްދަތު އިތުރުކުރުމަށް ވަނީ ކޯޓަށް ހާޒިރުކުރެވިފައެވެ. އެހެން ނަމަވެސް، އޭގެ ތެރެއިން 53 އަހަރުގެ ފިރިހެނެއް ޝަރުތުތަކާއެކު ދޫކޮށްލާފައިވާއިރު، ދެވަނަ މީހާގެ ބަންދަށް ކްރިމިނަލް ކޯޓުން ތިން ދުވަސް ދީފައިވާކަމަށް ފުލުހުން ވަނީ ބުނެފައެވެ. 

އިދިކޮޅުން އިއްޔެ ކުރި މުޒާހަރާއަކީ މި ސަރުކާރުން މަސްވެރިންނަށް ވީ ވައުދުތައް ފުއްދާދީފައި ނުވާކަން ފާހަގަކޮށް، މަސްވެރިންގެ ހައްގުތައް ކަށަވަރުކުރުމަށް ގޮވާލާ ކުރިއަށް ގެންދިޔަ މުޒާހަރާއެކެވެ. އެގޮތުން، މަސްވެރިކަން ތިޔާގިވާ ދުވަސްވަރާއި ދިމާކޮސް މަސް ގަތުން ލިމިޓުކުރުމާއި، އައިސް ހޯދުމަށް މަސްވެރިން ދިގު ކިއުތަކުގައި ޖެހިގެން ތިބެން ޖެހުންފަދަ ކަންކަން ހައްލުކޮށްދިނުމަށް މުޒާހަރާގެ ބައިވެރިން ވަނީ ގޮވާލާފައެވެ. 

Advertisement

އަދި އޭގެ އިތުރުން މަސްވެރިން ބާނާ މަސްކޮޅަށް ވަގުތުން ފައިސާ ލިބޭ ސިޔާސަތު ތަންފީޒުކުރުމަށްވެސް އިދިކޮޅުގެ މުޒާހާރާގެ ބައިވެރިން ވަނީ ގޮވާލާފައެވެ. 

ސުލްހަވެރިކަމާއެކު ފެށި އެ ހަރަކާތައް މާގިން އިރުތަކެއް ނުވެ ފުލުހުން ވަނީ ރޫޅާލާފައެވެ. އަދި މުޒާހަރާ ރޫޅާލުމަށް ފުލުހުން ހާލަތާއި ނުބައްދަލު ބާރުގެ ބޭނުންކޮށްފައިވެއެވެ. އަދި ގިނަ ބަޔަކު މުޒާހަރާގެ ތެރެއިން ހައްޔަރުވެސް ކޮށްފައިވެއެވެ. 

ހައްޔަރުކުރި މީހުންގެ ތެރެއިން އެކެއް ފިޔަވާ ދެންތިބި މީހުން މިއަދު ދޫކޮށްލާފައިވާއިރު، ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވަނީ މިއަދު މަސްވެރިންގެ ހައްގު ކަށަވަރުކޮށްދިނުމަށް ގޮވާލި ފަރާތްތަކަށް އަނިޔާކުރުން ކޮށްވެރިކޮށް މަޖިލީހަށް ކުއްލި މައްސަލައެއްވެސް ހުށައަޅާފައެވެ. 

އެހެން ނަމަވެސް، އެ ކުއްލި މައްސަލަ މަޖިލީހަށް ބަލައި ނުގަނެ ވަނީ ބޭރުކޮށްލާފައެވެ.