އދ ގެ އިންސާނީ ހައްގުތަކާ ބެހޭ ކައުންސިލަށް ރާއްޖެ އިންތިޚާބު ކޮށްފިއެވެ.

އދ ގެ އިންސާނީ ހައްގުތަކާ ބެހޭ ކައުންސިލުން މިރޭ ކުރި ޓުވީޓުގައި ވަނީ 2023-2025 ވަނަ އަހަރުގެ ނިޔަލަށް ދިވެހިރާއްޖެ އާއި އެކު ޖުމުލަ 14 ގައުމެއް އެ ކައުންސިލުން ހުސްވެފައިވާ 14 ގޮނޑި އަށް އިންތިޚާބު ވެފައިވާ ކަން އިއުލާން ކޮށްފައެވެ. 

އެގޮތުން ރާއްޖެ އިންތިޚާބު ވެފައިވަނީ އެކައުންސިލުގެ އޭޝިއާ ޕެސިފިކް ސްޓޭޓުތަކުގެ ތެރެއިން ހުސްވެފައިވާ 4 ގޮނޑީގެ ތެރެއިން ގޮނޑިއަކަށެވެ. އެ އިންތިހާބުގައި 189 ގައުމުން ވޯޓުލީއިރު ރާއްޖެ އަށް ވަނީ 154 ވޯޓު ލިބިފައެވެ.

Advertisement

އިންތިޚާބުގައި ރާއްޖެ ހިމެނޭ ސަރަހައްދުން ވާދަކޮށްފައިވަނީ ރާއްޖޭގެ އިތުރުން އަފްޤާނިސްތާނާއި ބަންގްލަދޭޝްގެ އިތުރުން ކިރްގިސްތާން އަދި ރިޕަބްލިކް އޮފް ކޮރެއާ އާއި ވިއެޓްނާމް އެވެ.

މީގެތެރެއިން އޭޝިއާ ޕެސިފިކް ސްޓޭޓް ތަކުގެ ތެރެއިން ހުސްވެފައިވާ 4 ގޮނޑިއަށް އިންތިޚާބުވެފައިވަނީ ރާއްޖެ އާއި ބަންގްލަދޭޝްގެ އިތުރުން ވިއެޓްނާމާއި ކިރްގިސްތާނެވެ.

އަލަށް އިންތިހާބުވި ހަތަރު ގައުމާއި އެކު ދެން އޭޝިއާ ޕެސިފިކް ގައުމުތަކުގެ ތެރެއިން އިންސާނީ ހައްގުތަކާ ބެހޭ ކައުންސިލްގައި ތިބޭނީ ޗައިނާ، އިންޑިއާ، ކަޒަކިސްތާން، މެލޭޝިއާ، ނޭޕާލް، ޕާކިސްތާން، ޤަތަރު، އުޒްބެކިސްތާނުގެ އިތުރުން ޔުނައިޓެޑް އަރަބް އެމިރޭޓްސް އެވެ. 

މި ކައުންސިލްގައި ތިބެވޭނީ އެންމެގިނަވެގެން ޖެހިޖެހިގެން ދެ ދައުރަށެވެ. ޖެހިޖެހިގެން ދެދައުރު ހަމަވުމުން ޖެހިގެން އަންނަ އިންތިޚާބުގައި ބައިވެރިއެއް ނުވެވޭނެއެވެ.