ޔޫއޭއީގެ ދުބާއީގެ ލޯ ބަޖެޓް އެއާލައިންއެއް ކަމަށްވާ، "ފްލައި ދުބާއި" އިން ގަން އިންޓަނޭޝަނަލް އެއަރޕޯޓް އަށް ދަތުރުތައް ފަށަން ތައްޔާރު ވެއްޖެއެވެ. 

ފްލައި ދުބާއި އިން ބުނީ، 2023 ވަނަ އަހަރުގެ ފެބްރުއަރީ މަހުގެ 4 ވަނަ ދުވަހުން ފެށިގެން ގަން އިންޓަނޭޝަނަލް އެއަރޕޯޓް އަށް ދަތުރުތައް ފަށަން ހަމަޖެހިފައިވާ ކަމަށެވެ. 

ގަަމަށް އޮޕަރޭޝަންތައް ފެށުމާ ބެހޭ ގޮތުން ވާހަކަ ދައްކަވަމުން ފްލައި ދުބާއީގެ ސިއީއޯ ޣައިތު އަލް ޣައިތު ވިދާޅުވީ ރާއްޖޭގެ އެންމެ ދެކުނަށް ކޮންމެ ދުވަހަކު ދަތުރުތައް ފެށުމުން، ރާއްޖޭގެ ރީތިކަން ދެކިލުމަށް އިތުރު މަންޒިލްތައް ހިޔާރު ކުރުމުގެ އިތުރު ފުރުސަތުތައް ފަސިންޖަރުންނަށް ލިބިގެންދާނެ ކަމަށެވެ.

ފްލައި ދުބާއީގެ ދަތުރުތައް ރާއްޖޭގެ ދެކުނުގައިވާ ގަމަށް ފެށުމާއެކު، މި އެއާލައިނުން ދަތުރު ކުރާ ފަސިންޖަރުންނަށް ރާއްޖޭގެ ރީތި ގިނަ ރަށްތަކަކަށް ދަތުރު ކޮށްލުމުގެ ފުރުސަތު ލިބިގެންދާނެ. ގަމަށް މި ފަށާ ދަތުރު ތަކާއި އެކު، ރާއްޖޭގެ ދެކުނުގެ ރިސޯޓް ތަކަށް ޒިޔާރަތް ކުރާ ފަތުރުވެރިންވެސް، ސީ ޕްލޭން ގައި ނޫނީ، ބޯޓުގައި ކުރަންޖެހޭ ދަތުރުތައް މަދުވެ، ވަރަށް ގިނަ ވަގުތު ސަލާމަތް ކުރެވޭނެ.  ރާއްޖެއަކީ އަކީ ޔޫއޭއީ، ޖީސީސީ އަދި ސީއައިއެސްގެ މެދުގައި ޗުއްޓީ ހޭދަކުރުމުގައި އެންމެ މަގުބޫލު އެއް މަންޒިލްގެ ގޮތުގައި މި އޮތީ". ފްލައި ދުބާއީގެ ސިއީއޯ ޣައިތު އަލް ޣައިތު ވިދާޅުވިއެވެ.

އޭގެ އިތުރުން އޭނާ ވިދާޅުވީ، މި ދަތުރުގެ ސަބަބުން ޔޫރަޕާއި ގުޅުވާލެވޭނެ ކަމަށެވެ.

ފްލައި ދުބާއީން ދުބާއީ އާއި ވެލާނާ އިންޓަނޭޝަނަލް އެއާޕޯޓާއި ދެމެދު ދަތުރުތައް ފެށީ 2013 ވަނަ އަހަރު އެެވެ. އަދި އަންނަ އަހަރުން ފެށިގެން ގަމާއި ދެމެދު ދަތުރުތައް ފަށާއިރު، ހަފްތާއަކު 28 ފްލައިޓް ރާއްޖެ އާ ދެމެދު ބާއްވާނެ ކަމަށް ބުނެފައި ވެއެވެ. 

ފްލައި ދުބާއި އިން ގަމުން ދުބާއި އަށް އިކޮނޮމީ ކްލާސް ޓިކެޓެއްގ  އަގު އުޅެނީ، 550 ޑޮލަރަށެވެ. އަދި ބިޒްނަސް ކްލާސް ޓިކެޓެއްގެ އަގު 1600 ޑޮލަރަށް އަރައެވެ. ފްލައި ދުބާއި އިން ދަތުރު ކުރަން ބޭނުންވާ ފަރާތް ތަކުން flydubai.com ވެބްސައިޓް މެދުވެރިކޮށް ނުވަތަ ފްލައި ދުބާއި އެޕް މެދުވެރިކޮށް ވެސް ޓިކެޓް ނެގޭނެއެވެ. 

ފްލައި ދުބާއިގެ ޝެޑިއުލް އާއި ޓިކެޓްގެ އަގާއި ގުޅޭ އިތުރު މައުލޫމާތު ތައް އަންނަނިވި ލިންކުން ލިބޭނެއެވެ.  https://www.flydubai.com/en/plan/timetable