ދިވެހިރާއްޖޭގެ ފޮރިން މިނިސްޓަރު ޝާހިދު، ރާއްޖެއިން ބޭރުގައި ހުންނެވި ނަމަވެސް، އެމަނިކުފާނު އަންނަނީ މިނިސްޓަރު ކަމުގެ ޒިންމާ އަދާކުރައްވަމުން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ރައީސް އޮފީހުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި، މިނިސްޓަރު ޝާހިދު އދ. ގެ އާއްމު މަޖިލީހުގެ ދައުރު ހަމަ ވުމުން ވެސް ރާއްޖެ ވަޑައިނުގަންނަވާ ހުންނަވާތީ، އެމަނިކުފާނު ރާއްޖެ ވަޑައިގެން ޒިންމާ ތަކާއި ހަވާލުވެވަޑައިގަންނަވާނީ ކޮންއިރަކު ތޯ ނޫސްވެރިއެއް ކުރި ސުވާލަށް ޖަވާބު ދެއްވަމުން މިއުވާން ވިދާޅުވީ، މިނިސްޓަރު ޝާހިދު ރާއްޖެ ވަޑައިގަންނަވާނެ ތާރީޚް ދަންނަވަން ނޭނގޭ ކަމަށެވެ. އެހެންނަމަވެސް، އަންނަ ހަފްތާ ތެރޭގައި ޝާހިދު ރާއްޖެ ވަޑައިގަންނަވާނެ ކަމަށް ވެސް މިއުވާން ވިދާޅުވިއެވެ.
މިއާއެކު މިއުވާން ވިދާޅުވީ، ރާއްޖެއިން ބޭރުގައި ހުންނެވި ނަމަވެސް، މިނިސްޓަރު އަންނަނީ ފޮރިން މިނިސްޓަރެއްގެ ޒިންމާ އަދާކުރައްވަމުން ކަމަށެވެ. އެގޮތުން ޔޫއެންޖީއޭގެ ރިޔާސަތުގެ ދައުރު ނިމި ވަޑައިގެންނެވުމަށްފަހުގައިވެސް، މިހާރު ކުރިއަށްދާ އާއްމު މަޖިލީހުގެ ހައި ލެވެލް ވީކް ގައި ރައީސުލްޖުމްހޫރިއްޔާ ގެ ފަރާތުންވެސް ބައިވެރިވެ ވަޑައިގެންނެވީ މިނިސްޓަރު ޝާހިދު ކަމަށް އޭނާ ވިދާޅުވިއެވެ.
"އޭގެ ފަހުގައި އދ. ގެ ބައެއް ބައްދަލުވުން ތަކަށްފަހު، ޖަޕާންގެ ކުރީގެ ބޮޑުވަޒީރުގެ ޖަނާޒާގައި ބައިވެރިވެ ވަޑައިގަތުމަށް ޓޯކިޔޯއަށްވެސް ވަޑައިގަތް. އަދި އޭގެ ފަހުގައި ރައީސުލްޖުމްހޫރިއްޔާ ގެ އަރިހުގައި ބަހްރައިންއަށްވެސް ވަޑައިގެންނެވި. އަދި އޭގެ ފަހުން އަޅުގަނޑުމެންނަށް ފެނިގެން މިދިޔަ، އދ ގެ އިންސާނީ ހައްގުތަކާ ބެހޭ ކައުންސިލްގައި ރާއްޖެ ތަމްސީލް ކުރުމަށް، އިންތިހާބް ވެގެން ދިޔައިރު، އެކަމާ ގުޅޭ ބައްދަލުވުން ތަކުގައިވެސް ބައިވެރިވެ ވަޑައިގެންނެވި. ޒިންމާތައް އަދާ ނުކުރައްވަނީއެއް ނޫން. ޒިންމާ އަދާ ކުރައްވާ." މިއުވާން ވިދާޅުވިއެވެ.
މިއުވާން ވިދާޅުވީ ރާއްޖެއިން ބޭރުގައި ހުންނަވައިގެންވެސް މިނިސްޓަރު ޝާހިދު ކުރައްވަމުންދާ ދަތުރުފުޅުތަކުގައި އެމަނުކުފާނު އަދާކުރައްވަމުން އެދަނީ ފޮރިން މިނިސްޓަރުގެ ޒިންމާ ކަމަށެވެ.
ޝާހިދުގެ އާންމު މަޖިލީހުގެ ރިޔާސަތުގެ ދައުރު ހަމަވީ ސެޕްޓެމްބަރު 12 ގަ އެވެ. އަދި އދ. ގެ ރިޔާސަތުގައި ޝާހިދު ނިއު ޔޯކް ހުންނެވި އަހަރެއްހާ ދުވަހުގެ ތެރޭގައި ވަޒީރުކަމުގެ މުސާރައިގެ އިތުރުން ދައުލަތުން ވަނީ އޭނާގެ ބައެއް ދަތުރުފުޅުތަކަށް ވެސް ހަރަދުކޮށްފަ އެވެ.
ވަޒީރަކު އެހެން ވަޒީފާއެއް އަދާކުރުން ގާނޫނު އަސާސީއިން މަނާކޮށްފައި ވަނިކޮށް ޝާހިދު އދ. ގެ އާންމު މަޖިލީހުގެ ރިޔާސަތާ ހަވާލުވެވަޑައިގަތުމުގެ ގާނޫނީ ސައްހަކަމާ ގުޅޭގޮތުން ރައްޔިތުންގެ މަޖިލީހުގެ މެމްބަރުންނާއި ގާނޫނީ ވަކީލުން ހިމެނޭހެން، ބައެއް ފަރާތްތަކުން އޭރު ސުވާލުއުފެއްދެވި އެވެ.
Advertisement
This content is created and paid for by advertisers and does not involve Voice Journalists
