މިއަދު "ވޮއިސް" ގެ ބަދިގެއިން މި ގެނެސްދޭނީ ވަރަށް ފަސޭހައިން ވަރަށް މީރުކޮށް ތަންދޫރީ ޗިކަން ހަދާލާނެ ގޮތެވެ. ތަންދޫރީ ޗިކަން އަކީ ފަރާޓާ އާއި އެކީ ކާލަން ވަރަށް މީރު އެއްޗެކެވެ. ނުވަތަ ގާލިކް ރައިސް ކަހަލަ ބަތަކާއި އެކު ކާލަންވެސް ހަމަ ބަރާބަރު ވާނެއެވެ. 

1 ކިލޯ ކުކުޅު (ކޮށާފަ)

1 ތަންދޫރީ މަސާލާ ޕެކެޓް (ޝާން ބްރޭންޑް)

1 ތަށި ޕްލޭން ޔޯގަޓް

3 ލޮނުމެދު (ގާނާފައި)

2 ސައި ސަމްސާ ކުކުޅު ހަވާދު

1 އިންޗި އިނގުރު ކޮޅެއް (ގާނާފައި)

2 ޗިކަން ސްޓޮކް ކިޔުބް

02 މޭޒުމަތީ ސަމުސާ ލުނބޯ ހުތް

2 ސައި ސަމުސާ ގަރަމް މަސާލާ

ރަތް ކުލައިގެ ކާކުލަ ކޮޅެއް

ބޯތަށްޓެއްގެ ތެރޭގައި ކުކުޅު ކޮޅު ފިޔަވައި ދެން ހުރި ހުރިހާ އެއްޗެއް ރަނގަޅަށް އެކުަލަވާލައި ޕޭސްޓް ގަނޑު ތައްޔާރު ކޮށްލާށެވެ. ދެން އެ ޕޭސްޓް އެއްކޮށް ކުކުޅުގައި ރަނގަޅަށް އުނގުޅައި ލުމަށްފަހު މަތި ރަނގަޅަށް ބަންދު ކުރި އެއްޗެއްގެ ތެރޭގައި 2 ގަޑި އިރު ވަންދެން މެރިނޭޓް ކުރުމަށް ފުރިޖްގައި ބަހައްޓާލާށެވެ. އެއަށްފަހު ފުރިޖުން ނަގާފަ 180 ޑިގުރީގައި 30-40 މިނެޓް ވަންދެން ނުވަތަ ރޯފިލަންދެން އަވަނުން ފިހެލާށެވެ.

ނޯޓް: ޗިކަން ސްޓޮކް ކިޔުބް ބޭނުން ކުރާއިރު އޭގެ ލޮނު ގިނައިން ހުންނަ ވައްތަރު ކިޔުބް ބޭނުން ކުރާ ނަމަ ވަކިން ކުކުޅަށް ނުވަތަ ޕޭސްޓް އަށް ލޮނު ނުލި ނަމަވެސް ލޮނު ރަހަ ހެޔޮވަރަށް ލާނެއެވެ.