ރައްޔިތުންނަށް ދަތިވެފައިވާ ކަންކަމުގެ ވާހަކަ ހިއްސާކުރުމުން، އެކަން ހައްލުކޮށްނުދީ ރިއެކްޓު ނުކޮށް ހުންނަވަން ދަތިފުޅުވާކަމަށް ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.
"މަވެސް ޕީޕީއެމް" ގެ ނަމުގައި އިހަވަންދޫގައި ބޭއްވި ޚާއްސަ ޖަލްސާއެއްގައި ވާހަކަދައްކަވަމުން ރައީސް ޔާމީން ވިދާޅުވީ ރައީސުލްޖުމްހޫރިއްޔާގެ މަގާމަކީ ވަރަށް ގިނަ މަސްއޫލިއްޔަތުތަކެއް ކޮނޑުގައި އަޅުއްވައިގެން ރައްޔިތުންގެ ޝަކުވާތައް ހުންނާނެކަން ދަނެގެން އަދާކުރައްވަން ޖެހިވަޑައިގަންނަވާ މަގާމެއްކަމަށެވެ.
އެހެންކަމުން އެ މަގާމު އަދާކުރައްވާއިރު، އެމަނިކުފާނު ކަންކަމުގައި ރިއެކްޓު ކުރައްވާނެކަމަށާއި، އަދި ރައްޔިތުންނަށް ދަތިވެފައިވާ ކަންކަމުގެ ވާހަކަ ހިއްސާކުރެއްވުން ރިއެކްޓު ނުކުރައްވާ 3 ދުވަސް ވަންދެން ނިދިކުރައްވާފައި އޮންނަވާ ބޭފުޅަކުކަމުގައި އެމަނިކުފާނު ނުވާނެކަމަށް ރައީސް ޔާމީން ވިދާޅުވިއެވެ.
"އަޅުގަނޑަކީ ރިއެކްޓު ކުރާ މީހެއް، އެހެންވީމަ ރައްޔިތުންގެ ޝަކުވާ އައިމަ ތިން ދުވަސް ވަންދެން ނިދާލާކަށް ނޯވެވޭ އަޅުގަނޑަކަށް"
ރައީސް ޔާމީން
ރައީސް ޔާމީން މިފަދައިން ވިދާޅުވެފައިވަނީ ރައީސް ސޯލިހު ކަންކަމުގައި ގޮތް ނިންމާލެއް ލަސްކަމުން، ރައްޔިތުންނަށް އޭގެން ދަތިތަކާއި ކުރިމަތިވާކަން ފާހަގަކުރައްވާ ފާޑުވިދާޅުމަށެވެ.
ރައީސް ސޯލިހުއަށް ބޮޑު ކަމެއް ދިމާވިޔަސް ރިއެކްޓު ނުކުރައްވާކަމަށާއި، އަދި އެކަމާއި އެއްޗެއް ވިދާޅުވުމުގެ ބަދަލުގައި މީހާ ހަޖެހެންދެން ނިދިކުރައްވާކަމަށް ފަސްޓް ލޭޑީ ފަޒުނާ އަހުމަދު ވަނީ ވިދާޅުވެފައެވެ. އަދި އެއީ އެމަނިކުފާނުގެ ތަބީއަތުގައި ހުންނަ ސިފައެއްކަމަށް އެކަމަނާ ވިދާޅުވެފައިވެއެވެ.
އެހެން ނަމަވެސް ރައީސް ޔާމީންގެ ވާހަކައިގައި ވަނީ ރައީސްޖުމްހޫރިއްޔާ އަދާކުރައްވާ މަސްއޫލިއްޔަތު ތަކަކީ ވަރަށް ބުރަ މަސްއޫލިއްޔަތެއްގެ ގޮތުގައި ސިފަކުރައްވާފައެވެ. އަދި ކަންކަމުގައި ރިއެކްޓުކުރުން ލަސްކުރައްވާނަމަ، އޭގެ ސަބަބުން ރައްޔިތުންނާއި ގައުމަށް ބޮޑެތި ގެއްލުންތަކެއް ވެގެން ދިއުމަކީވެސް އެކަށީގެންވާކަމެއްކަމަށް އެމަނިކުފާނު ސިފަކުރެއްވިއެވެ.
ވެރިކަމަށް އަންނަންވާނީ ވެރިކަމުގެ ހުރިހާ މަސްއޫލިއްޔަތުތަކެއް އަދާކުރެއްވުމަށް ނަފްސު ތައްޔާރުކޮށް، އެ މަސްއޫލިއްޔަތުގެ ހުރި ބުރަދަން އެނގިލައްވައިގެން ރައްޔިތުންނަށް ޚިދުމަތް ކުރެވޭނެކަމުގެ ޔަގީންކަމާއި އެކުގައިކަން އެމަނިކުފާނުގެ ވާހަކައިގައި ވަނީ ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
