މެލޭޝިއާގެ ކުންފުންޏަކުން އުފައްދާ ލޮލަށް އަޅާ ބޭހެއްގައި ޑިފެކްޓެއް ހުރުމާއި ގުޅިގެން އެ ބޭހާއި މެދު ސަމާލުވުމަށް ފޫޑް އެންޑް ޑްރަގް އޮތޯރިޓީން އަންގައިފިއެވެ. 

އެ އޮތޯރިޓީން ކުރި އިއުލާނެއްގައި ބުނީ، މެލޭޝިޔާގެ ކުންފުންޏެއް ކަމަށްވާ ޑްއޯފާމާ ( Duopharma M Sdn . Bhd ) އިން އުފައްދާ ލޮލަށް އަޅާ ބޭހެއް ކަމަށްވާ އެލާސިން އައި ޑްރޮޕްސް (Allersine eye drops) ގެ ބެޗް ނަންބަރު 200230L, 200827L, 193033L, 200608L, 200607L, އާއި 200825L ގައި ޑިފެކްޓެއް ހުރި ކަމަށް މެލޭޝިއާގެ ޑްރަގް ރެގިއުލޭޓަރީ "ނޭޝަނަލް ފާމަސޫޓިކަލް ރެގިއުލޭޓަރީ އެޖެންސީން އެ އޮތޯރިޓީ އަށް އަންގާފައިވާ ކަމަށެވެ. 

އަދި އެ ބެޗް ތަކުގެ ތެރެއިން ދެ ބެޗެއް ( 193033L، 200607L) ރާއްޖެއަށް ފޯރުކޮށްދީފައިވާ ކަމަށްވެސް އެ އެލާޓްގައި ބަޔާން ކޮށްފައިވާ ކަމަށް އެ އިއުލާނުގައި ވެއެވެ. 

މީގެ އިތުރުން އެ އިއުލާނުގައި ބުނީ، އެ ބޭހަކީ އެ އޮތޯރިޓީގައޮ ރެޖިސްޓްރީ ކޮށް ރާއްޖެއަށް އެތެރެކުރުމާއި ވިއްކުމުގެ ލިސްޓުގައި ހިމެނޭ ބޭހެއް ކަމަށް ވުމާއެކު، އެ ބޭސް ރަޖިސްޓްރީ ކޮށްފައިވާ ފަރާތާއި ގުޅިގެން އެ އޮތޯރިޓީން އެ ބޭހުގެ އެ ބެޗްތައް މާކެޓުން ނަގަމުން ގެންދާނެ ކަމަށެވެ. 

އަދި އެ ބޭސް ބޭނުންކުރާ ފަރާތްތަކުންވެސް ބޭހުގެ އެ ބެޗުގެ ބޭސް ބޭނުން ނުކުރުމަށް އެ އޮތޯރިޓީން ވަނީ އެދިފައެވެ. 

މިއާއެކު އެ ޢިއުލާނުގައި ބުނީ، ރައްކާތެރިކަމުގެ ފިޔަވަޅެއްގެ ގޮތުން ބޭސް އެތެރެ ކުރާއިރު، ޚާއްސަ ސަމާލުކަމެއްދީގެން ޕޯޓްތަކުގައި ބަލައި ފާސްކުރަމުން ގެންދާނެ ކަމަށެވެ. އަދި މި ބޭސްތަކާއި ގުޅޭ ގޮތުން އެއްވެސް މައުލޫމާތެއް ލިބިއްޖެނަމަ އެ އޮތޯރިޓީގެ ހޮޓްލައިން ނަމްބަރު 7200321 ގުޅައިގެން މައުލޫމާތު ހިއްސާ ކުރުމަށްވެސް އެދިފައިވެއެވެ.