ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ވާހަކަދައްކަވަމުން ބޭނުންފުޅު ނުވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ. 

ރައީސް ނަޝީދު މިފަދައިން ވިދާޅުވީ، ރައީސް ޞާލިހު އެމްޑީީޕީ ގައުމީ މަޖިލީހުގެ މެންބަރުންނާއި ބައްދަލު ކުރެއްވުމުގެ ގޮތުން މާދަމާރޭ ކ. އާރަށުގައި އޮންނަ ފަރީއްކޮޅަކަށް ގައުމީ މަޖިލީހުގެ މެމްބަރުންނަށް ދަޢުވަތު އެރުވުމާއި ގުޅިގެން އެ މެސެޖަށް ރައްދު ދެއްވައި އެ ގުރޫޕަށް ކުރެއްވި މެސެޖެއްގައެވެ. 

އެ މެސެޖާއި ގުޅިގެން ރައީސް ނަޝީދު ވިދާޅުވީ، މާލޭގައި ހުރި ނަމަވެސް ރައީސް ޞާލިހުގެ ގައުމީ މަޖިލިސް ބައްދަލުވުމަށް ވަޑައިނުގަންނަވާނެކަމަށެވެ. 

Advertisement

"ރައީސުލްޖުމްހޫރިއްޔާ ވެސް އަޅުގަނޑާއި ވާހަކަ ދައްކަވައި، އެކީ ކަންކަން ކުރާކަށް ބޭނުންފުޅެއް ނުވޭ. ވީމާ އަޅުގަނޑުވެސް ދެން ބޭނުމެއް ނޫން." ރައީސް ނަޝީދު، ރައީސް ޞާލިހުގެ ގައުމީ މަޖިލިސް ބައްދަލުވުމަށް ވަޑައިގަންނަވަން ބޭނުންފުޅުނުވާ ސަބަބު ހާމަކޮށް ވިދާޅުވިއެވެ. 

ބަންގްލަދޭޝްގެ ރައްޔިތެއް ކަމަށްވާ އަލަމްގީރުއާ އެކު އެއްޖިންސުން ގުޅުން ހިންގި ވީޑިއޯއެއް ލީކުވީ މައްސަލައިގައި ރައީސް ނަޝީދުގެ ކޮއްކޮ އަދި، ގާނޫނީ ވަކީލު އަހްމަދު ނާޒިމް އަބްދުއްސައްތާރު ފުލުހުން ހައްޔަރު ކުރުމާއި ގުޅިގެން އެކަމާއި ނުރުހުން ވެގެން ރައީސް ޞާލިހުގެ އިސްތަށިފުޅުގައި ޒިނޭގެ ތުހުމަތު ވެސް ރައީސް ނަޝީދު ވަނީ އަޅުވާފައެވެ. އެގޮތުން ރައީސް ޞާލިހު އަންހެންކުއްޖަކާއެކު ޒިނޭ ކުރާ މަންޒަރު ފެންނަ ހަތަރު ފޮޓޯއެއް ލިބިފައިވާ ކަމަށާއި، އެ ފޮޓޯތައް ފުލުހުންނަށް ލިބިފައިވޭތޯ ރައީސް ނަޝީދު ވަނީ ސުވާލު ކުރައްވާފައެވެ. އަދި އެ އަންހެންކުއްޖާ އަކީ ވަރަށް ގާތް އާއިލީ ރައްޓެއްސެއްގެ ދަރިއެއްކަމަށް ބެލެވޭ ކަމަށް ވެސް ނަޝީދު ވިދާޅުވިއެވެ.

ރައީސް ނަޝީދުގެ އެ ވާހަކަތަކާއި ގުޅިގެން  ރައީސް ޞާލިހާއި ދެ ބޭފުޅުންގެ ގުޅުން ވަރަށް ބޮޑަށް ހީނަރުވެފައިވާ ކަމަށް ގިނަ ބަޔަކު އަންނަނީ ބުނަމުންނެވެ.