ސަރުކާރުގެ ފަރާތުން ރައްޔިތުންގެ މަޖިލީހަށް ބިލު ހުށައަޅާއިރު، ދިރާސާނުކޮށް ބިލުތައް ފަރުމާކުރަމުންދާކަން ފާހަގަކުރައްވާ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ(އިންތި) ފާޑުވިދާޅުވެއްޖެއެވެ.
ސަރުކާރުން މަޖިލީހަށް ބިލުތައް ފޮނުވާއިރު، އެކަށީގެންވާ ދިރާސާތަކެއް ނުކުރައްވާކަން ފާހަގަކުރައްވާ އިންތިގެ ފާޑިކިޔުން އަމާޒުކުރައްވާފައިވަނީ ސަރުކާރުގެ ފަރާތުން ކެޔޮދޫ ދާއިރާގެ މެމްބަރު ހުސެއިން ގާސިމް ހުށައަޅުއްވާފައިވާ ދިވެހިރާއްޖޭގެ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުންނެވެ.
އެ ބިލަށް ބަހުސްކުރައްވަން ފައްޓަވަމުން އިންތި ވިދާޅުވީ މީގެކުރިންވެސް އެ ބިލަށް ބަހުސްކުރައްވަމުން ފާހަގަކުރި ގޮތަށް އެ ބިލުގައި ވާ އުސޫލީ މައްސަލަ އެ ގޮތަށް އޮތްކަން ފާހަގަކުރައްވާކަމަށެވެ.
އިންތި ވިދާޅުވީ ސަރުކާރުން މި ބިލު ފިނުއްވަވާ ރައްޔިތުންގެ މަޖިލީހުގެ އެޖެންޑާއަށް އައުމުގެ މަގުމަތީގައި ވަނިކޮށް އެ ބިލަށް އިތުރު އިސްލާހެއް ފޮނުވުމަށް އޭޖީ އޮފީހުން މަސައްކަތް ކުރަމުންދާކަމުގެ މައުލޫމާތު ލިބިފައިވާކަމަށެވެ. އެގޮތުން ފަނޑިޔާރުންގެ ޕެންޝަނާއި، ފަނޑިޔާރުން މުސްކުޅިކުރައްވާނެ އުމުރާއި ގުޅިގެން އެ ބިލަށް އިސްހާލުތަކެއް ގެނައުމުގެ މަސައްކަތް އޭޖީ އޮފީހުން ކުރަމުންދާކަމުގެ މައުލޫމާތު ލިބިފައިވާކަމަށް އިންތި ވިދާޅުވިއެވެ.
ބިލެއް ފޮނުވާއިރު އެކަށީގެންވާ ދިރާސާތައް ނުކޮށް، ކަމާ ގުޅުންހުރި އިދާރާތަކާއި މަޝްވަރާ ކުރުމެއްނެތި ބިލު ފަރުމާކުރުމަށްފަހު، ހުށައަޅާ، އަނެއްކާ އެ ބިލަށް އިތުރު ކަންތައްތަކެއް ހިމެނުމަށް އިތުރު އިސްލާހުތައް ގާތް ގާތުގައި ފޮނުވާނަމަ. މަޖިލީހުގައި އެ ބިލަކާއި ގުޅިގެން ވާހަކަދައްކާ، ބަހުސްކުރައްވާނެ ގޮތެއް އެނގިވަޑައި ނުގަންނަވާކަމަށް އިންތި ވިދާޅުވިއެވެ.
އެގޮތުން ސަރުކާރުން ފޮނުވާ ބިލެއް ދިފާއުކޮށް ވާހަކަދައްކަންވެސް އެނގޭނީ، ސަރުކާރުން އެ ފޮނުވި ބިލަކީ ރަނގަޅު ބިލެއްކަންވެސް ކަށަވަރުވެގެންކަމަށް އިންތި ވިދާޅުވިއެވެ.
"ބިލު ދިފާއުކުރަން އެނގޭނީ އެ ބިލު މިހާރު ފޮނުވާފައި އޮތް ގޮތް ރަނގަޅުކަމަށް ޔަގީންވާނަމަ ތާ، އަޅުގަނޑުމެންނަށް ދިފާއުކުރަން އެނގޭނީ. އެހެން ނަމަވެސް އެ ވިދާޅުވަނީ އެ ބިލަށްވެސް އިސްލާހު އެބަ ފޮނުވަމޭ، ބިލު އަދި އެޖެންޑާއަށް އައުމުގެ މަގުމަތީގައި ވަނީ"
މާފަންނު އުތުރު ދާއިރާގެ މެމްބަރު އިމްތިޔާޒް
އިންތި ގެ ވާހަކައިގައި ވަނީ ސަރުކާރުން މަޖިލީހަށް ބިލު ފޮނުވަނީ ކަމާ ގުޅުންހުރި އިދާރާތަކާއި މަޝްވަރާ ކުރުމެއް ނެތި ތޯ އައްސަވާފައެވެ.
ސަރުކާރުން މި ގޮތަށް ބިލު ފޮނުވުމުގެ ސަބަބުން ރައްޔިތުންގެ މަޖިލީހުގެ އެތައް ވަގުތުތަކެއް، އަދި މެމްބަރުންގެ ހަކަތަ ބޭކާރުވެގެންދާކަމަށް އިންތިގެ ވާހަކައިގައި ވަނީ އިޝާރާތްކުރައްވާފައެވެ.
ސަރުކާރުން ބިލުތައް ފޮނުވާއިރު ދިރާސާ ނުކުރައްވާކަން ފާހަގަކުރައްވާ އިތުރު މިސާލެއްވެސް އިންތި ވަނީ ހިއްސާކުރައްވާފައެވެ.
އިންތި ވިދާޅުވީ ޚާރިޖީ ކަންކަމާއި ގުޅޭ ބައެއް އަމަލުތަކަކީ ޖިނާއީ ކުށަކަށް ހެދުމަށް ސަރުކާރުން ބިލެއް ހުށައަޅުއްވާފައިވާއިރު، ކަމާ ގުޅުންހުރި އިދާރާތަކާއެކު މަޝްވަރާކޮށްފައި ނުވާކަން ކޮމެޓީ މަރުހަލާގައި ބިލު ދިރާސާ ކުރިއިރު ފާހަގަކުރެވިފައިވާކަމަށެވެ.
އެގޮތުން ސަރުކާރުން އެ ބިލު ފޮނުވުމުގެ މަގްސަދުގައި ބަޔާންކޮށްފައި ހުރި ކަންކަން ފޮރިން މިނިސްޓްރީއަށް ފަހުމުވެސް ނުވާކަން އެ ބިލާ ގުޅޭގޮތުން ކޮމެޓީ މަރުހަލާގައި ފޮރިން މިނިސްޓްރީއާއި ސުވާލުކުރުން ބުނެފައިވާކަމަށް އިންތި ވިދާޅުވިއެވެ.
"ފޮރިން މިނިސްޓްރީއިން ވިދާޅުވީ ސަރުކާރުގެ ފަރާތުން ފޮނުވާފައިވާ އެ ބިލުން، އެ ހާސިލްކުރަން އެ އުޅޭ މަގްސަދު ހާސިލްވުމަށްޓަކައި އޭގައި ބަޔާންކޮށްފައި ހުރި ކަންތައްތައް ފަހުމުވެވަޑައި ނުގަންނަވާކަމަށް، އަދި އެ ޑްރާފްޓް އިސްހާލުކުރުމުން މެނުވީ އެއަށް ކޮމެންޓެއް ކުރަން އެނގިވަޑައިނުގަންނަވާކަމަށް. ދަންނަވަން މި އުޅޭ ވާހަކައަކީ ޚާރިޖީ ގުޅުންތަކުގެ ބައެއް އަމަލުތައް އެއީ ޖިނާއީ ކުށަކަށް ހަދާ ބިލެއް ސަރުކާރުގެ ފަރާތުން ޑްރާފްޓްކުރައްވާ ފޮނުވިއިރު، ކަމާގުޅުންހުރި ވުޒާރާތަކާއި މަޝްވަރާ ނުކުރައްވަނީތޯ"
މާފަންނު އުތުރު ދާއިރާގެ މެމްބަރު އިމްތިޔާޒް
އިންތި ވިދާޅުވީ މިފަދަ އުސޫލީ މައްސަލަތައް ގިނަ ގިނައިން ފެންމަތިވަމުން ދިއުމަކީ ކަންބޮޑުވާ ކަމެއްކަމަށެވެ.
ކޮމެޓީ މަރުހަލާގައި މެމްބަރުން މުހިންމު މަސައްކަތްތަކެއް ކޮށް ބިލުތައް އިސްލާހުކުރުމަށްފަހު ފޮނުވުން، އެ ބިލުތައް މުޅިން އެހެން ގޮތަކަށް އަނބުރާލުމަށްޓަކައި ތަޅުމަށް ފޮނުވަމުންދާކަން ފާހަގަކުރެވިފައިވާކަމަށްވެސް އިންތި ވިދާޅުވިއެވެ. އަދި މިކަހަލަ އުސޫލީ މައްސަލަތަކަށް އެޑްރެސް ކުރެވިގެން ނޫނީ މި ކަންކަން ހައްލުކުރެވޭނެކަމަށް ގަބޫލު ނުކުރައްވާކަމަށް އިންތި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
