ވާދަވެރި ސިޔާސީ ލީޑަރު އަދި 2023 ވަނަ އަހަރުގެ ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމިން އަބްދުލްގައްޔޫމު ބޮޑު ތިލަދުންމައްޗަށް ކުރައްވާ ދަތުރުފުޅުގައި މިއަދު ހަވީރު ހއ ބާރަށަށް ވަޑައިގަތުމުން ހޫނު މަރުހަބާއެއް ދަންނަވައިފިއެވެ. 

ރައީސް ޔާމީން ދާދި ދެންމެ އަކު ބާރަށަށް ވަޑައިގެންފައިވާއިރު އެމަނިކުފާނުގެ އިސްތިގުބާލަށް އެރަށުގެ ބަދަނރު ސަރަހައްދު ފިޔާތޮށި ކުލައިގެ ދިދައާއި ގައުމީ ދިދައާއި "އިންޑިއާ އައުޓް" ދިދަ އިން ވަނީ ވަރަށް ބޮޑަށް ޒީނަތްތެރިކޮށްފައެވެ. 

ރައީސް ޔާމީންގެ އިސްތިގުބާލުގައި ގިނަ އަދަދެއްގެ ބަޔަކު ތިބިއިރު، އެމަނިކުފާނު ވަޑައިގެންނެވިއިރު، އިސްތިގުބާލުގައި ތިބި މީހުންނާއި ސަލާމް ކުރައްވާފައެވެ. އެއަށްފަހު ރާއްޖޭގައި އިންޑިއާ ސިފައިން ތިބުމާއި ދެކޮޅަށް އަޑުއުފުލައި، އެފަދަ ޝުއޫރުތައް ފާޅުކޮށްފައިވާ ބެނާއާއި "އިންޑިއާ އައުޓް" ދިދަ ހިފައިގެން ބާރަށުގެ މަގުމަތީގައި ރައީސް ޔާމީން އާއި އެކު ޕީޕީއެމްގެ ގިނަ އަދަދެއްގެ ރައްޔިތުން ވަނީ ރެލީއެއް ބާއްވާފައެވެ. 

Advertisement

ރައީސް ޔާމީން ބާރަށަށް ވަޑައިގެން ބޭއްވެވި އިންޑިއާ އައުޓް ހިނގާލުމުގެ ތެރެއިން-- ފޮޓޯ: ޕީޕީއެމް

ރައީސް ޔާމީންގެ ބާރަށުގެ މި ދަތުރުފުޅުގައި ބާރަށު ރައްޔިތުންނާއި ބައްދަލު ކުރެއްވުމަށް ހަމަޖެހިފައިވާ އިރު، މި ބައްދަލުކުރެއްވުމަށްފަހު މިއަދު ހަވީރު ހއ. ދިއްދޫ އަށް ވަޑައިގަންނަވަން ވަނީ ހަމަޖެހިފައެވެ. 

ރައީސް ޔާމީން ހއ އަށް ކުރައްވާ މި ދަތުރުފުޅުގައި އެ އަތޮޅުގެ ފަސް ރަށަކަށް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން އިއްޔެ އެމަނުކުފާނު ވަނީ އިހަވަންދޫ އާއި ތުރާކުނަށް ވަޑައިގެންފައެވެ. 

ހއ އަތޮޅަށް ރައީސް ޔާމީން ކުރައްވާ މި ދަތުރުފުޅުގެ މަގްސަދުތަކުގެ ތެރޭގައި، 2023 ވަނަ އަހަރުގެ ޕީޕީއެމްގެ ރިޔާސީ މެނިފެސްޓޯއަށް މަޢުލޫމާތުތައް އެއްކުރެއްވުމާއި ރައްޔިތުންނަށް ބޭނުންޖެހިފައިވާ ކަންކަމާއި ގުޅޭގޮތުން މަޝްވަރާ ކުރެއްވުން ހިމެނެއެވެ.