ބާރަށު ސުކޫލުގައި ދިވެހި މާއްދާ ކިޔަވައިދެމުން ދަނީ އިންޑިއާ ޓީޗަރެއްކަމަށް ބާރަށު ދާއިރާގެ ކުރީގެ މެމްބަރު އަދި އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބުރާހިމް ޝުޖާއު ވިދާޅުވެއްޖެއެވެ. 

ޝުޖާއު މިފަދައިން ވިދާޅުވެފައިވަނީ ރައީސް ޔާމީން ބައިވެރިވެވަޑައިގެން ބާރަށުގައި ބޭއްވި ޚާއްސަ ޖަލްސާއެއްގައި ވާހަކަައްކަވަމުންނެވެ. 

ޝުޖާއުގެ ވާހަކަފުޅުގައި ވިދާޅުވީ އިންޑިއާގެ ނުފޫޒު ދިވެހިރާއްޖެއަށް އޮތް މިންވަރު ރާއްޖޭގެ އެކި ހިސާބުތަކަށް ބަލާލުމުންވެސް ފާހަގަކުރެވޭކަމަށެވެ. 

އެގޮތުން ބާރަށު ސުކޫލުގައި ދިވެހި މާއްދާ ކިޔަވައިދޭނެ ދިވެހި މުދައްރިސެއް ނެތްކަމަށް ބުނެ އެ މާއްދާ ކިޔަވައިދެމުންދަނީ އިންޑިއާ މީހެއްކަމަށް ޝުޖާއު ވިދާޅުވިއެވެ. 

ޝުޖާއު ވިދާޅުވީ މިހާރު އިންޑިއާއިން ކުރަމުންދާ މަސައްކަތަކީ ބާރަށާއި ކައިރީގައި އޮތް ހަނިމާދޫއިން ދިވެހިރައްޔިތުން ބޭލުމުގެ މަސައްކަތްކަމަށެވެ. އެއަށްފަހު އެމީހުންގެ މިސްރާބު ބާރަށާއި ދިމާލަށް ބަދަލުކޮށް ނުލާނެކަމަށް ދަންނަވަން ނުކެރޭނެކަމަށް ޝުޖާއު ވިދާޅުވިއެވެ. 

ޝުޖާއު އިތުރަށް ވިދާޅުވީ، ބާރަށުގެ ރައްޔިތުންނަނީ އިންޑިއާ ސިފައިން ރާއްޖޭގައި ތިބުމާއި ދެކޮޅަށް އަބަދުވެސް އިހުތިޖާޖު ކުރާ ރައްޔިތުންތަކެއް އުޅޭ ރަށެއްކަމަށެވެ. އަދި އިންޑިއާ ސިފައިން ރާއްޖެ ދޫކޮށް ދަންދެން އެ ރަށުގެ ރައްޔިތުން އެފަދައިން އިހުތިޖާޖު ކުރާނެކަމަށެވެ. 

ޝުޖާއު މިފަދައިން ވިދާޅުވެފައިވާއިރު، ރައީސް ޔާމީން ބޮޑުތިލަދުންމައްޗަށް ކުރައްވާ ދަތުރުފުޅުގައި ބާރަށަށް ވަޑައިގަތުމުން، އެމަނިކުފާނަށް ހޫނު މަރުހަބާ އެއް ކިޔުމަށްފަހު، އެމަނިކުފާނުގެ ސަޕޯޓަރުން ވަނީ އިންޑިއާ ސިފައިން ރާއްޖޭގައި ތިބުމާއި ދެކޮޅަށް އަޑުއުފުލާ ސުލްހެވެރި ހިނގާލުމެއް ކުރިއަށް ގެންގޮސްފައެވެ.