ދިވެހިރާއްޖޭގައި ސެކިއުލާ ނުވަތަ އަލްމާނީ ދައުލަތެއް ހިންގުމަށް ޖާގަ ނުދެއްވާނެކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.
ރައީސް ޔާމިން މިފަދައިން ވިދާޅުވެފައިވަނީ ހއ ބާރަށުގައި ބޭއްވި ޚާއްސަ ޖަލްސާއެއްގައި ވާހަކަދައްކަވަމުންނެވެ.
އެ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ އެމްޑީޕީއިން ޕީޕީއެމްއަށް ބަދަލުވާ ބައެއް މީހުން ކައިރިން އެ މީހުން ސިޔާސީ ފިކުރު ބަދަލުކުރައްވާ ސަބަބު އޮޅުން ފިލުއްވާފައިވާކަމަށެވެ.
އެގޮތުން ވާހަކަދެކެވުނު ޒުވާނަކު، އޭނާ އެމްޑީޕީ ދޫކޮށް ޕީޕީއެމްއާއި ގުޅުނީ، އެމްޑީޕިއިން ދިވެހިރާއްޖޭގައި އިސްލާމްދީނާއި ބީރައްޓެހި ކަންކަން ފެތުރުމަށް މަސައްކަތް ކުރަމުންދާކަމަށް ގަބޫލުކުރެވޭތީކަމަށް ބުނެފައިވާކަމަށް ރައީސް ޔާމިން ވިދާޅުވިއެވެ. އަދި އޭނާގެ އެ ވިސްނުމަކީ އެމަނިކުފާނު ތާއީދުކުރައްވާ އަދި ބަލައިގަންނަ ވިސްނުމެއްކަން ފާހަގަކުރެއްވިއެވެ.
ރައީސް ޔާމީން ވިދާޅުވީ ދިވެހިރާއްޖޭގައި އިސްލާމްދީން ނޫން އެހެން ދީނަކަށް ޖާގަ ދިނުމަށް އެމަނިކުފާނު ތާއީދު ނުކުރައްވާކަމަށެވެ. އަދި ސެކިއުލާ ސަރުކާރެއް މިތަނުގައި ގާއިމުކުރާކަށް ޖާގަ ނުދެއްވާނެކަމަށް ރައީސް ޔާމީން ވަނީ ވިދާޅުވެފައެވެ.
"އަޅުގަނޑުމެން ތާއީދެއް ނުކުރަން، އަޅުގަނޑުމެން ޖާގައެއް ނުދޭނަން މި ރާއްޖޭގައި ސެކިއުލާ ވެރިކަމެއް އޮންނާކަށެއް. މިއީ އިސްލާމީ ހަޟާރަތު އެތައް ސަތޭކަ އަހަރަކަށް އޮތް ތަނެއް. އެއީ މާތް ރަސްކަލާނގެ އަޅުގަނޑުމެންނަށް ދެއްވި އެންމެ ވަރުގަދަ ނިއުމަތް. އެހެންވީމަ އިސްލާމަކަށްވެ، އަދި އިސްލާމްދީން މަރިވެރިކުރުމަށާއި، އިސްލާމްދީނަށް ކަމޭހިތުމަށް އަޅުގަނޑުމެން ކުރާ މަސައްކަތުގައި، މިތަން ސެކިއުލާ ވެގެން ގޮސް ދައުލަތުން މިއިން އެއްވެސް ކަމަކާ ނުބެހި އެމީހަކު އުޅޭނެގޮތަކަށް އެމީހަކު އުޅުން، މިކަން ކުރާކަށް ޖާގައެއް ދޭކަށް އަޅުގަނޑުވެސް ބޭނުމެއް ނޫން"
ރައީސް ޔާމީން
ރައީސް ޔާމީން އިތުރަށް ވިދާޅުވީ، ގައުމެއް ގައުމަކަށް ވަނީ ނޫނީ ރަށެއްގެ ރައްޔިތުން ރައްޔިތުންނަށް ވަނީ އެމީހުންގެ އަމިއްލަ ވަންތަ ސިފަތަކެއް ހުރުމުންކަމަށެވެ. ދިވެހިންނަނީ އެއްބަހަކުން ވާހަކަދައްކާ، އެއް ދީނަކަށް ތަބާވެގެން ތިބި އަމިއްލަ ވަންތަ ސިފަތަކެއް ލިބިފައިވާ ރައްޔިތުންތަކެއް ކަމަށް ވީ ހިނދު މި ސިފަތައް ނެތިދިއުމަށް ޖާގަ ނުދެއްވުމަށް ރައީސް ޔާމީން ވަނީ އެދިވަޑައިގެންފައެވެ.
ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބަކީ މި ގައުމުގައި އިސްލާމްދީން އޮތުމާއި ނެތުމުގެ މައްޗަށް ނެގޭ ވޯޓެއްކަން ތަކުރާރުކޮށް ފާހަގަކުރައްވާ، ރައީސް ޔާމިން ވަނީ ވޯޓުދެއްވާއިރު ރައްޔިތުން މި ކަންކަމާއި ދޭތެރޭގައި ފުންކޮށް ވިސްނާވަޑައިގަތުމަށް އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
