ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ބޮޑުތިލަދުންމއްޗަށް ކުރައްވާ ދަތުރުފުޅުގެ ފަހު މަންޒިލްކަމަށްވާ ހއ ދިއްދޫއަށް ވަޑައިގެންފިއެވެ. 

އެއާއެކު އެރަށުންވެސް އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ. 

އެމަނިކުފާނު ދިއްދޫއަށް ވަޑައިގެންފައިވަނީ އެ އަތޮޅު ބާރަށަށް ވަޑައިގެން އެ ރަށުގައި އޮތް ޚާއްސަ ޖަލްސާއެއްގައި ބައިވެރިވެވަޑައިގަތުމަށްފަހު މިއަދު އިރުއޮއްސެމުން ދިޔަ ވަގުތުގައެވެ. 

އެ ވަގުތުވެސް އެމަނިކުފާނުގެ އިސްތިގުބާލުގައި ގިނަ އަދެއްގެ އާންމު ރައްޔިތުން ދިއްދޫގެ ބަނދަރު ސަރަހައްދަށް ވަނީ އެއްވެފައެވެ. އަދި އެމަނިކުފާނުގެ އިސްތިގުބާލަށް ދިއްދޫ ވަރަށް ބޮޑަށް ޒީނަތްތެރިކޮށްފައިވާކަން ފާހަގަކޮށްލެވެއެވެ. 

ރައީސް ޔާމީން ވަނީ އެމަނިކުފާނަށް މަރުހަބާ ދެންނެވުމަށް އިސްތިގުބާލުގައި ތިއްބެވި ރައްޔިތުންނާއި ސަލާމްކުރައްވާފައެވެ. 

ހއ އަތޮޅަށް ރައީސް ޔާމީން ކުރައްވާ ދަތުރުފުޅުގެ އެންމެ ފަހު ރަށަށް އެމަނިކުފާނު މިއަދު ވަޑައިގެންފައިވާއިރު، މިރޭ އެމަނިކުފާނު ބައިވެރިވެވަޑައިގަންނަވާ ވަރަށް ޚާއްސަ ޖަލްސާއެއް ދިއްދޫގައި ބޭއްވުމަށް ވަނީ ހަމަޖެހިފައެވެ. އަދި މި ހަފްލާގައި ރައީސް ޔާމީން ވާހަފުޅުދެއްކެވުމަށްވެސް ހަމަޖެހިފައިވެއެވެ. 

ރައީސް ޔާމީން ހއ އަތޮޅުގެ ފަސް ރަށަށް ކުރެއްވި މި ދަތުރުފުުގައި ރަށްރަށުން ވަރަށް ބޮޑު ތަރުހީބެއް އެމަނިކުފާނަށް ލިބިފައިވެއެވެ. އަދި އަލަށް ޕީޕީއެމްއާއި ގުޅުނު ގިނަ އަދަދެއްގެ ބަޔަކު ވަނީ އެ ރަށްރަށުގައި ބޭއްވުނު ހަފްލާތަކުގެ ތެރެއިން ރައީސް ޔާމިންގެ އަތްޕުޅަށް ފޯމު އަރުވާފައެވެ. 

ރައީސް ޔާމިންގެ މި ދަތުރުފުޅިގެ މައިގަނޑު އެއް މަގްސަދަކީ ކުރިއަށް އޮތް ރިޔާސީ އިންތިޚާބުގެ މެނިފެސްޓޯ އެކުލަވާލުމަށް ރައްޔިތުންގެ ޚިޔާލާއި ހުށައެޅުއްވުންތައް ހޯއްދެވުމެވެ. ހއ އަތޮޅުގައި ކުރިއަށް ގެންދިޔަ އެކި ހަފްލާތަކުގައި ވާހަކަފުޅު ދައްކަވަމުން ޕީޕީއެމްގެ ބައެއް ތަސައްވުރުގެ ވާހަކަތައް އެމަނިކުފާނު ވަނީ ހިއްސާކުރައްވާފައެވެ. 

އޭގެ ތެރޭގައި ހއ އަތޮޅަށް ޚާއްސަކޮށް އެމަނިކުފާނުގެ ވެރިކަމެއްގައި ކޮށްދެއްވާނެ މުހިންމު ކަންކަން ރައީސް ޔާމީން ވަނީ އިއުލާނުކުރައްވާފައެވެ. ހަމައެހެންމެ ރާއްޖޭގެ މަސްވެރިންނަށްނާއި ގުޅުންހުރި މުހިންމު ކަންކަމުގެ ވާހަކަތައްވެސް އެމަނިކުފާނު ވަނީ ހިއްސާކުރައްވާފައެވެ.