2018 ވަނަ އަހަރުގެ ރިޔާސީ އިންތިޚާބުގައި ރައީސް ޔާމީން އަބްދުލްގައްޔޫމު ވެރިކަން ބަދަލުކުރުމަށްޓަކައި ކޯލިޝަންއެއް ހަދައިގެން މިއަދުވެސް ވެރިކަން ދިފާއުކުރައްވަމުން ގެންދަވާ ހުރިހާ ސިޔާސީ ލީޑަރުންނަކީ ހީލަތްތެރިންކަމަށާއި، ދެން އެބޭފުޅުންނަށް ރައްޔިތުން ޖާގަ ނުދެއްވުމަށް ވާދަވެރި ސިޔާސީ ލީޑަރު ރައީސް ޔާމީން އެދިލައްވައިފިއެވެ.
ރައީސް ޔާމީން މިފަދައިން އިލްތިމާސްކުރައްވާފައިވަނީ ހއ ދިއްދޫގައި ބޭއްވި ޚާއްސަ ޖަލްސާއެއްގައި ވާހަކަދައްކަވަމުންނެވެ.
އެ ޖަލްސާގައި ވާހަކަދައްކަވަމުން ރައީސް ޔާމީން ވަނީ ސަރުކާރު ކޯލިޝަންގައި ރަސްމީކޮށް ތިއްބެވި ބޭފުޅުންނާއި، އަދި ސަރުކާރަށް ވާގިވެރިވަމުންދާ ސިޔާސީ ލީޑަރުންނަށް ބޮޑެތި ފާޑުކިޔުންތަކެއް އަމާޒުކުރައްވާފައެވެ.
ގައުމުގައި ރައްޔިތުންގެ ކަންބޮޑުވުން ހުރި ބޮޑެތި މައްސަލަތައް ފެންމަތިވެ، އިސްލާމްދީނާއި ގައުމުގެ މިނިވަންކަމަށް ލޮޅުން އަރާ ކަންކަން ފާޅުގައި ސަރުކާރުން ކުރަމުންދާއިރުވެސް ކޯލިޝަންގެ ލީޑަރުން ތިއްބަވަނީ އެކަންކަން ދިފާއު ކުރައްވައިގެންކަމަށް ރައީސް ޔާމީން ވިދާޅުވިއެވެ. އަދި އެގޮތަށް އެބޭފުޅުން އަމަލުކުރައްވަނީ މި ސަރުކާރުގެ ތެރެއިން އެމީހުން ލިބެމުންދާ މަންފާތައް ދެމެހެއްޓުމަށްކަމަށްވެސް ވިދާޅުވިއެވެ.
އެއާއެކު ރައީސް ޔާމީން ވިދާޅުވީ ކުރިއަށް އޮތީ އަނެއްކާވެސް ރައްޔިތުން ގުބޯ ހެއްދުމަށް ސިޔާސީ ލީޑަރުން ރައްޔިތުންގެ ގާތަށް އަންނަ ރިޔާސީ އިންތިޚާބުގެ ދުވަސްވަރުކަމަށެވެ.
އިންތިޚާބާއި ދިމާކޮށް ކޯލިޝަންގެ ލީޑަރުން މުޅިން އާ ވާހަކަތަކެއް ހިފައިގެން ރައްޔިތުންގެ ގާތަށް އަންނާނެކަމަށާއި، އަނެއްކާވެސް އެމީހުން ބޭނުންވާ ފަރާތަކަށް ވޯޓު ދިނުމަށް ރައްޔިތުންގެ ކިބައިން އެދޭނެކަމަށެވެ. އެހެން ނަމަވެސް ދެން އެއިން އެއްވެސް ބޭފުޅަކަށް ޖާގަ ނުދެއްވުމަށް ރައީސް ޔާމީން ވަނީ ރައްޔިތުންގެ ކިބައިން އެދިވަޑައިގެންފައެވެ.
"މިހާރު މި މޫސުމުގައި އަނެއްކާވެސް ތިބޭފުޅުންގެ އަރިހަށް ޒިޔާރަތްތަކެއް ކުރަން ފަށާނެ، އެކަމަކު އެ ޒިޔާރަތްތަކަށް ތިބޭފުޅުން ފުރުސަތު ނުދެއްވިއްޔާ މާ ރަނގަޅުވާނެ. މިތަނުގައި އަޅުގަނޑު އެދެނީ އެމްޑީޕީއަށް ތާއީދުކޮށްގެން، މިވެރިކަމަށް ތާއީދުކޮށްގެން މި ޖާޑީގައި މިތިބަ އެއްވެސް ސިޔާސީ ޕާޓީއަކަށް، އެއްވެސް ސިޔާސީ މީހަކަށް ޖާގަ ނުދެއްވަން. އެއީ ހީލަތްތެރިން، އެއީ މަކަރުވެރިން، އެއީ އަޅުގަނޑުމެންނަށް ކެހިދިން ފަރާތްތައް"
ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން
ރައީސް ޔާމީން ތިލަދުންމައްޗަށް ކުރެއްވި މި ދަތުރުފުޅުގައި ރައްޔިތުންނާއި މުޚާތަބުކުރައްވާ ކޮންމެ ފަހަރަކުމެ ކޯލިޝަނުން މި ގައުމާއި ރައްޔިތުންނަށް ވަމުންދާ އިހުމާލުތަކުގެ ވާހަކަތައް ފަށްފަށްކުރައްވާއެވެ. އަދި ކުރިއަށް އޮތް ރިޔާސީ އިންތިޚާބަށް ރައްޔިތުން ތައްޔާރުވާއިރު، ކޯލިޝަން ލީޑަރުން ޖަވާބުދާރީ ކުރުވުމަށްވެސް އެދިވަޑައިގަންނަވައެވެ.
އެމަނިކުފާނު ވިދާޅުވާގޮތުގައި ކުރިއަށް އޮތް ރިޔާސީ އިންތިޚާބަކީ މި ގައުމު އަނބުރާ ދިވެހިންނަށް ހޯދުމަށް ލިބިގެންދާނެ ފަހު ފުރުސަތެވެ. އަދި މި ފުރުސަތަކީ މި ގައުމުގައި އިސްލާމްދީނާއި މިނިވަންކަން ދެމި އޮތުމާއި ނެތުމުގެ މައްޗަށް ބިނާވެގެންދާނެ އިންތިޚާބެއްގެ ގޮތުގައި ސިފަކުރައްވައެވެ.
އެއާއެކު، ރިޔާސީ އިންތިޚާބުގައި ވޯޓުދެއްވާއިރު، ކޯލިޝަން ލީޑަރުންގެ ފަރާތުން ގައުމަށް ލިބުނު ގެއްލުންތައް މިނެކިރުމަށްފަހު ގައުމީ ވިސްނުމަކުން ވޯޓުދެއްވުމަށްވެސް އެމަނިކުފާނު ވަނީ އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
