ގއ. ނިލަންދޫ ސުކޫލުގެ ތިޖޫރި ފަޅާލާ ދެ ލައްކައެއްހާ ރުފިޔާ ވަގަށް ނެގި މައްސަލައިގައި ހިމެނޭ މީހުންނަށް ވައްކަން ކޮށްގެން ނެގި ފައިސާއަށްވުރެ ކުޑަ ޖޫރިމަނާއެއް ދައްކަން ކްރިމިނަލް ކޯޓުން ހުކުމް ކޮށްފިއެވެ.

2016 ވަނަ އަހަރުގެ ޑިސެމްބަރު މަހުގެ 29 ދުވަހުގެ ދަންވަރުގެރޭ ދަންވަރު ގއ. ނިލަންދޫ ސުކޫލުގެ ޕްރިންސިޕަލް އިންނަ ކޮޓަރީގެ ކުޑަދޮރުގެ ތަންޑު ކަށިގަނޑަކުން މަތާލައި، އެއަށްފަހު ދަގަނޑެއް ބޭނުންކޮށްގެން ކުޑަދޮރުގެ ދަގަނޑުތައް މަތާލުމަށް ފަހު، އެ ކޮޓަރިއަށް ވަދެ، އެ ސުކޫލުގެ ތިޖޫރި ހަލާކުކޮށްލައިގެން 199،090 (އެއް ލައްކަ ނުވަދިހަ ނުވަ ހާސް، ނުވަދިހަ) ރުފިޔާ ވަނީ ފޭރިގެންފައެވެ.

މި މައްސަލައިގައި ދައުލަތުން ދައުވާ އުފުލާފައިވަނީ އެރަށު، ދިހްޝާނާވިލާ، އަލީ ޝާކިރާއި ހަމަ އެރަށު ފޫޅުމާގޭ، ޝިމާއު އަހުމަދެވެ. އެ ދެ މީހުންގެ މައްޗަށް ޖުމުލަ ތިން ދައުވާއެއް އުފުލާފައިވެއެވެ. އެއީ، ވައްކަން ކުރުމުގެ ކުށުގެ ދައުވާއާއި، މުދަލަށް ގެއްލުން ދިނުމުގެ ކުށުގެ ދައުވާއާއި އެނގިހުރެ ހުއްދަ ނޫން ތަނަކަށް ވަނުމުގެ ކުށުގެ ދައުވާއެވެ.

މި ތިން ދައުވާއަށް ވެސް އަލީ ޝާކިރު ވަނީ އިއުތިރާފުވެފައިވާއިރު، މި މައްސަލައިގާ ދެން ހިމެނޭ ޝިމާއުގެ މައްސަލަ ވަކި ގަޒިއްޔާއެއްގެ ގޮތުގައި ބެލުމަށް ކްރިމިނަލް ކޯޓުން ވަނީ ހުކުމްކޮށްފައެވެ.

ޝާކިރު ކުށަށް އިއުތިރާފުވުމުން ތިން ދައުވާވެސް ކުރިޔަށް ގެންގޮސްފައިވަނީ އަވަސް ނިޔާގެ ޝަރީއަތެއްގެ ގޮތުގައެވެ.

އިއްޔެ މި މައްސަލައިގައި ކްރިމިނަލް ކޯޓުން ޝާކިރުގެ މައްޗަށް އުފުލާފައިވާ ތިން ދައުވާގެވެސް ހުކުމްކޮށްފައިވާއިރު, އެ ތިން ދައުވާއާއި ގުޅިގެންވެސް ޖޫރިމަނާ ފައިސާ ދެއްކުމަށް ވަނީ ހުކުމް ކޮށްފައެވެ. 

އެގޮތުން ވައްކަން ކުރި މައްސަލައިގައި 23،600 ރުފިޔާގެ ޖޫރިމަނާއަކާއި،  މުދަލަށް ގެއްލުންދިން މައްސަލައިގައި 10،800 ރުފިޔާގެ ޖޫރިމަނާއެއް ކޮށްފައިވާއިރު އެނގިހުރެ ހުއްދަ ނޫން ތަނަކަށް ވަން މައްސަލައިގާ 5،400 ރުފިޔާއިން އޭނާ ޖޫރިމަނާ ކުރުމަށް ވަނީ ހުކުމް ކޮށްފައެވެ. އެއީ، ޖުމުލަ 39،800 ރުފިޔާއެވެ.

މިފަދަ މައްސަލަތަކުގައި ކުރިން ކުށުގެ ރެކޯޑެއް ނެތް ނަމަ، އަދި ޝަރީއަތަށް އެއްބާރުލުން ދޭ ނަމަ ކުށުގެ އަދަބު ލުއިކޮށްދެއެވެ.