ބްރޯޑްކާސްޓިންގ ކޮމިޝަނުން މީޑިއާނެޓް ބަލަނީ ކުދި ވިޔަފާރި ކުރާ ކުންފުންޏެއްގެ ގޮތުގައި ކަމަށާ، އެހެންނަމަވެސް، އެ ގޮތަށް އެކަން ނުވާނެ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެެއެވެ.
ދިވެހިރާއްޖޭގައި ރީ ބްރޯޑްކާސްޓިންގ ހިދުމަތްދޭ ހުރިހާ ފަރާތްތަކަށް ތަފާތުކުރުމެއްނެތި އިންސާފުވެރިކަމާއި ވާދަވެރިކަމާއިއެކު ވިޔަފާރިކުރެވޭނެ މާހައުލެއް ގާއިމްކޮށްދީ، ވަކިބައެއްގެ ނުފޫޒުން ކުދި އޮޕަރޭޓަރުންގެ ވިޔަފާރިތައް ހަލާކުކޮށްލުމަށް ދައުލަތުގެ މުއައްސަސާތައް މެދުވެރިކޮށް އަޅާފައިވާ ހުރަސްތައް ނައްތާލުމަށް ސަރުކާރަށް ގޮވާލައި މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ހުށަހެޅުއްވި ގަރާރަށް ބަހުސް ކުރައްވަމުން ޓޮމް ވިދާޅުވީ، ބްރޯޑްކާސްޓިން ކޮމިޝަނުން ބްރޯޑްކާސްޓިން ގަވާއިދު އެކުލަވާލައިފައިވަނީ ބްރޯޑްކާސްޓް ކުރުމުގެ ގާނޫނާއި ޚިލާފަށް ކަމަށެވެ.
އަދި ބްރޯޑްކާސްޓިންގ ގަވާއިދާއި ގުޅޭގޮތުން ބްރޯޑްކާސްޓިން ކޮމިޝަން މަޖިލީހުގެ ކޮމިޓީއަށް ހާޒިކޮށް ސުވާލު ކުރުމުން، އެ ގަވާއިދު ހެދިފައިވަނީ ގާނޫނާ ޚިލާފަށް ކަންވެސް އެ ކޮމިޝަނަށް ނޭނގޭ ކަމަށް ބުނެފައިވާ ކަމަށް ޓޮމް ވިދާޅުވިއެވެ.
"އެންޓި ކޮރަޕްޝަން ކޮމިޝަނުން ބްރޯޑްކާސްޓިން ކޮމިޝަންގެ މައްސަލަ ރަނގަޅަށް ބަލައިފިނަމަ ނާޖާއިޒު ގޮތުގައި ބަޔަކަށް ފައިދާ ހޯދުމުގެ އަމަލެއްގެ ގޮތުގައި ބްރޯޑްކާސްޓިން ކޮމިޝަންގެ މެންބަރުން މިވަނީ ގަވާއިދު ބަދަލުކޮށްފައި. 100 ޕަސެންޓް ކުންފުންޏަށް ނޫނީ ރާއްޖޭގައި ވިޔަފާރި ނުކުރެވޭނެ ކަމަށް. އެ ސެކްޓާގައި."
މަހިބަދޫ ދާއިރާގެ މެންބަރު އަހުމަދު ޠާރިގު
ޓޮމް ވިދާޅުވީ ބްރޯޑްކާސްޓިން ކޮމިޝަނުން ކޮށްފައި މިވަނީ، އެބޭފުޅުންގެ އަތުގައި ބިޑި އެޅޭ ފަދަ ކަމެއް ކަމަށާ, ގާނޫނު އަސާސީން ލިބިދީފައިވާ ހައްގެއް ގަވާއިދަކުން ހަނި ނުކުރެވޭނެ ކަމަށެވެ. އެހެންކަމުން، އެފަދަ ގަވާއިދެއް އެ ކޮމިޝަނުން އެކުލަވައިލި ކަމަށްޓަކައި، އެ ކޮމިޝަން އޭސީސީއަށް ހާޒިރުކުރަންޖެހޭ ކަމަށްވެސް އޭނާ ވިދާޅުވިއެވެ.
މިއާއެކު ޓޮމް ވިދާޅުވީ، ބްރޯޑްކާސްޓިން ކޮމިޝަންގެ މެންބަރުން މަޖިލީހުގެ ގަވާއިދު ކޮމިޓީއަށް ހާޒިރުކޮށް ސުވާކު ކުރުމުން، އެކޮމިޝަނުން މީޑިއާނެޓް ސިފަކޮށްފައިވަނީ ކުދި އަދި މެދުފަންތީގެ ވިޔަފާރިތަކުގެ ތެރެއިން ކަމަށެވެ.
"މީޑިއާނެޓް މި ކިހިނެއްތޯ ކުދި ވިޔަފާރީގެ ތެރޭގައި ހިމެނެނީ؟ ކުދި ވިޔަފާރި ޑިފައިން ކޮށްފައި ގާނޫނެއް އެބައޮތް. އެ ގާނޫނުގައި މި އޮންނަނީ 31 މުވައްޒަފުން ފެށިގެން 100 މުވައްޒަފުންނާ ދޭތެރޭގައި ހިމެނޭ ވިޔަފާރި ތަކަކީ ކުދި ވިޔަފާރި ތަކުގެ ގޮތުގައި. ނުވަތަ، 20 މިލިއަން ރުފިޔާއިން ދަށް ވިޔަފާރި ތަކަކީ ކުދި ވިޔަފާރި ތަކޭ. މީޑިއާ ނެޓަކީ 20 މިލިއަން ރުފިޔާގެ ހިސާބު ހަދާ ކުންފުންޏެއް ނޫން. އެއަށްވުރެ މާ ބޮޑު ފައިދާ ނަގާ ކުންފުންޏެއް. އެކަމު މި ދަންނަވާ ބްރޯޑްކާސްޓިން ކޮމިޝަނުން މީޑިއާނެޓް ޑިފައިން ކުރަނީ ކުދި ވިޔަފާރީގެ ތެރެއިން."
މަހިބަދޫ ދާއިރާގެ މެންބަރު އަހުމަދު ޠާރިގު
ޓޮމް ވިދާޅުވީ، ދިރާގަށް ދިފައިވާ ހުއްދަ އައު ނުކުރުމަށް ބްރޯޑްކާސްޓިންގ ކޮމިޝަނުން ނިންމެވީ، ދިރާގަކީ ބޭރުގެ ކުންފުންޏެއްގެ ހިއްސާ ބޮޑު ކުންފުންޏަކަށް ވާތީ ކަމަށް ބުނާއިރު، ރާއްޖެއިން ބޭރުގެ ކުންފުނިތަކަށް އެ ނޫން ގޮތްގޮތުންވެސް ފައިސާ ދާކަމަށެވެ. ވުމާއެކު އެއީވެސް ދީރާގާއި އެކު ހެދިފައިވާ އެއްބަސްވުން އައު ނުކުރަންވީ ސަބަބެއް ކަމަށް ނުފެންނަކަމަށެވެ.
އެހެންކަމުން ބްރޯޑްކާސްޓިން ގަވާއިދު ޖެހޭނީ އުވާލަން ކަމަށާ، އެ މައްސަލަ ކޮމިޓީގެ ތެރެއިންވެސް ބައްލަވާނެ ކަމަށް ޓޮމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
