ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެރިކަން ކުރައްވަމުންދާ ގޮތަށް މަގުމަތީގައި އުޅޭ "ޕާޓޭ" އަކުވެސް ވެރިކަން ކުރައްވާނެކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ. 

ޑރ ޖަމީލު މިފަދައިން ވިދާޅުވެފައިވަނީ ރައީސް ސޯލިހުއަށް ބޮޑެތި ފާޑުކިޔުންތަކެއް އަމާޒުކުރައްވާ ކުރެއްވި ޓްވީޓެއްގައެވެ. 

އެގޮތުން ޑރ ޖަމީލު ވިދާޅުވީ ރައީސް ސޯލިހު ވެރިކަމާއި ހަވާލުވެވަޑައިގެން ފަހުން، ކުންފުނިތައް ބަނގުރޫޓުވެފައިވާކަމަށެވެ. އަދި ސަރުކާރުގެ މަގާމުތައް އިންތިހާއަށް އިތުރުކޮށް ޚަރަދުތައް އެތައް ނުގަނެއް ބޮޑުކޮށްފައިވާއިވާ ކަމަށެވެ. 

Advertisement

ސަރުކާރުގެ އިތުރުން އެމްޑީޕީއަށް ރައްޔިތުންގެ މަޖިލީހުގެ މެޖޯރިޓީވެސް ދީފައިވައިރު، އެކަން ކުރީ ވައުދު ފުއްދުމަށްކަމަށް ޑރ. ޖަމީލު ވިދާޅުވިއެވެ. 

އެއާއެކު ވިދާޅުވީ، މި ސަރުކާރަށް ވައުދު ނުފުއްދުނުތާގައި، ރައްޔިތުންނަށް ތަކުލީފުޖެއްސުން ނޫން ކަމެއް ސަރުކާރުން ކުރަމުން ނުދާކަމަށެވެ. އަދި ރައީސް ސޯލިހު ވެގެންދާނީ ތާރީހުގައިވެސް ވެރިއަކު ގައުމަށް އެއްބޮޑު ގެއްލުން ދިން ފަރާތުގެ ގޮތުގައިކަމަށް ޑރ ޖަމީލު ވިދާޅުވިއެވެ. 

އެކަންކަން ފާހަގަކުރައްވާ ޑރ ޖަމީލު އިތުރަށް ވިދާޅުވީ، ރައީސް ސޯލިހު މިހާރު ވެރިކަން ކުރައްވަމުންދާ ގޮތަށް މަގުމަތީގައި އުޅޭ ޕާޓޭއެއްވެސް ވެރިކަން ކުރާނެކަމަށެވެ.

ޑރ ޖަމީލު މިފަދައިން ސިފަކުރައްވާފައިވަނީ ޒިންމާދާރު ކަމެއްނެތި ރައީސް ސޯލިހު ވެރިކަން ކުރައްވަމުން ދާ ދިއުން ސިފަކުރެއްވުމަށްކަމަށް ބެލެވެއެވެ.