ޕީޕީއެމްގެ ރައީސް، ކުރީގެ ރައީސް ޔާމީން އަބްދުލްގައްޔޫމްގެ އަތޮޅުތަކަށް ކުރައްވަމުން ގެންދަވާ ދަތުރުތަކުގެ ތެރެއިން ނ.އަތޮޅަށް ވަޑައިގަތުމަށް ހަމަޖެހިއްޖެއެވެ.
ރައީސް ޔާމީން ނ އަތޮޅަށް ވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހު އެވެ. އެހެން ނަމަވެސް އެމަނިކުފާނު ވަޑައިގަންނަވަނީ ނ.އަތޮޅުގެ ކޮންކޮން ރަށަކަށްކަމެއް ސާފެއް ނުވެއެވެ.
ރައީސް ޔާމީންގެ އަތޮޅު ދަތުރު ތަކުގައި އެންމެ ފަހުން ވަޑައިގަތީ ހއ. އަތޮޅުގެ ބައެއް ރަށަރަށެވެ.
އެއީ ހއ. ކެލާ އާއި ބާރަށާއި ދިއްދޫ އާއި އިހަވަންދޫ އަދި ތުރާކުނެވެ. މިދަތުރުގަިއވެސް ވަނީ އެރަށްތަކުގައި ޖަލްސާ ބާއްވާފައެވެ. އަދި ޕާޓީގެ ގިނަ ހަރަކާތްތަކެއްވެސް އެރަށްތަކުގައި ވަނީ ބާއްވާފައެވެ.
އަންނަ ރިޔާސީ އިންތިހުބުގައި ރައީސް ޔާމީން ވާދަ ކުރައްވަން ނިންމަވައި އެ މަނިކުފާނަކީ ޕީޕީއެމްގެ ރިޔާސީ ކެންޑިޑޭޓް ކަމަށް ވަނީ ކަނޑައަޅާފަ އެވެ. އެ އިންތިހާބުގެ ކެމްޕޭނުގައި ރައީސް ޔާމީން ބޭނުންފުޅު ކުރައްވާނެ މެނިފެސްޓޯއަށް މައުލޫމާތު އެއް ކުރުމާއި ރައްޔިތުން ބޭނުންވާ ކަންކަން ދެނެގަތުމުގެ މަސައްކަތް މި ދަތުރުގައިވެސް ކުރައްވާނެ ކަމަށް ބެލެވެއެވެ.
Advertisement
This content is created and paid for by advertisers and does not involve Voice Journalists
