ޖަލުތަކުގައި ވިޔަސް، ނުވަތަ އެހެން ތަނެއްގައި ވިޔަސް އަނިޔާވެރިކަން އޮތުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ފުރުސަތެއް ނުދޭނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ. 

މިއުވާން މިފަދައިން ވިދާޅުވެފައިވަނީ، ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި ޖަލުތަކުގައި ތިބޭ ގައިދީންނަށް އަނިޔާ ކުރާ ކަމަށް އެމީހުންގެ ޢާއިލާތަކުން ބުނާ ކަން ފާހަގަކޮށް ނޫސްވެރިއެއް ކުރި ސުވާލަށް ޖަވާބު ދެއްވަމުންނެވެ. 

އެގޮތުން ނޫސްވެރިޔާ ކުރި ސުވާލުގައި އޭނާ ވަނީ ޖަލުތަކުގައި ބަންދުކޮށްފައި ތިބި ފަރާތްތަކަށް ރަނގަޅު ބޭސްފަރުވާގެ ކަންކަން ފުރިހަމަ ނުވާކަމަށާ، އަދި ކަރެކްޝަނަލް ސަރވިސަސްގެ ބައެއް މުވައްޒަފުންގެ ފަރާތުން ޖަލުތަކުގައި ތިބޭ މީހުންނަށް އަނިޔާ ލިބޭ ކަމަށްވެސް ބައެއް ފަރާތްތަކުން ހާމަކޮށްފައިވައިވާ ކަމަށް ބުނެފައެވެ. 

Advertisement

އެގޮތުން އަނިޔާ ކުރާ މައްސަލަ އާއި ގުޅިގެން ގައިދީއެއްގެ ޢާއިލާއިން ކަންބޮޑުވުންފާޅުކޮށް ރައީސް އޮފީހަށް ސިޓީއެއް ލުމުން ޝަރީއަތުގައި ހިނގަމުންދާ މައްސަލަތަކުގައި ރައީސް އޮފީހުގެ ދައުރެއް ނޯންނާނެ ކަމަށް އެ އޮފީހުން ބުނެފައިވާ ކަމަށްވެސް ޢާއިލާއިން މައުލޫމާތު ދޭ ކަމަށާ، ވުމާއެކު އެފަދަ މައްސަލަތައް ތަހުގީގުކޮށް އެ މައްސަލަ ތަކުގައި ހިމެނޭ ފަރާތްތަކާއިމެދު ރައީސް އޮފީހުން ފިޔަވަޅު ނާޅަނީ ކީއްވެތޯ ނޫސްވެރިޔާ ވަނީ ސުވާލު ކުރައްވާފައެވެ. 

އެސުވާލަށް ޖަވާބު ދެއްވަމުން މިއުވާން ވިދާޅުވީ، އެއްވެސް ގައިދީއަކަށް ޖަލުގައި އަނިޔާ ކުރާނަމަ އެކަން ކަމާބެހޭ އިދާރާތަކަށް ހުށަހަޅައިގެން އެ މައްސަލަ ކުރިއަށް ގެންދިޔުމުގެ ފުރުސަތު އޮންނާނެކަމަށެވެ. 

ޝަރީއަތުގައި ހިނގަމުންދާ މައްސަލައަކާއި ގުޅިގެން ސަރުކާރުން އެކަމުގެ ތެރެއަށް އިތުރަށް ނުވަންނާނެ ކަމަށާ އެހެންނަމަވެސް، އަނިޔާއެއް ލިބިފައިވާނަމަ ކަނޑައެޅިފައިވާ ސިސްޓަމްގެ ތެރެއިން އެ މައްސަލަ އެއް ބެލޭނެ ގޮތްތައް ކަނޑައެޅިފައި ހުންނާނެ ކަމަށެވެ. 

ޖަލު ގައިދީންނަށް ކަރެކްޝަނަލް ސަރވިސަސްގެ ބައެއް މުވައްޒަފުން އަނިޔާ ކުރާ މައްސަލަ އަކީ ދޭތެރެ ދޭތެރެއިން ފެންމަތިވާ ކަމެކެވެ. ވަކިން ޚާއްސަކޮށް ގައިދީންގެ ބޭސްފަރުވާގެ ޚިދުމަތަށް ހުރަސްއަޅާ ކަމަށާ، އޭގެ ސަބަބުން ގައިދީންގެ ހާލު ސީރިއަށްވެ މަރުވެގެންދާ ކަމުގެ ތުހުމަތުތައް ވެސް ކުރެވެއެވެ.

އެގޮތުން ދާދިފަހުން ޖަލުގައި ހުކުމް ތަންފީޒުކުރަމުންދަނިކޮށް ނިޔާވި މީހެއްގެ މައްސަލާގައިވެސް އޭނާއަށް ބޭސްފަރުވާގެ ޚިދުމަތް ފޯރުކޮށްދިނުމުގައި އިހުމާލުވެފައިވާ ކަމަށް ޢާއިލާއިން ވަނީ ތުހުމަތު ކޮށްފައެވެ. އެހެން ނަމަވެސް ހޯމް މިނިސްޓަރ ޢިމްރާން ވަނީ އެކަން ދޮގު ކުރައްވާފައެވެ.