ނުކުޅެދުންތެރިކަން ހުންނަ ފަރާތްތަކުގެ އިނާޔަތް ވަރަށް އަވަހަށް ބޮޑު ކުރެވިގެން ދާނެ ކަމަށާ އެހެން ނަމަވެސް، ބޮޑުވާނެ ތާރީޚެއް ބުނަން ނޭނގޭ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ނުކުޅެދުންތެރިކަން ހުންނަ ފަރާތްތަކުގެ އިނާޔަތް ބޮޑު ކުރެވޭނީ ކިހާތަނަކުތޯ ނޫސްވެރިއެއް ކުރެއްވި ސުވާކަށް ޖަވާބު ދެއްވަމުން މިއުވާން ވިދާޅުވީ، ނުކުޅެދުންތެރިކަން ހުންނަ ފަރާތްތަކުގެ އެލަވަންސް ބޮޑު ކުރުމުގެ މަސައްކަތް މިހާރުވެސް ކުރިއަށްދާކަމަށެވެ. އަދި މާ ގިނަ ދުވަހެއް ނުވެ އެކަން ވާނެ ކަމަށްވެސް އޭނާ ވިދާޅުވިއެވެ.
"މާގިނަ ދުވަހެއް ނުވެ އިރާދަކުރެއްވިޔާ އެކަން ހަމަޖެހިގެންދާނެ. އެކަން ކޮށްދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ވަނީ ދެއްވާފައި. އެހެންކަމުން އެކަން މާ ގިނަ ދުވަހެއް ނުވެވާނެ. ދެން އަޅުގަނޑަށް ސީދާ ސްޕެސިފިކްކޮށް ދަންނަވާކަށްނެތް. އެހެންނަމަވެސް ވަރަށް އަވަހަށް އިރާދަކުރެއްވިޔާ ވާނެ." ނުކުޅެދުންތެރިކަން ހުރި ފަރާތްތަކުގެ އިނާޔަތް ވަރަށް އަވަހަށް ބޮޑު ކުރާނެ ކަމަށާ އެހެން ނަމަވެސް އެކަން ކުރާނެ އިރެއް އަދިވެސް ބުނަން ނޭނގޭކަން ފާހަގަކުރައްވައި މިއުވާން ވިދާޅުވިއެވެ.
ނުކުޅެދުންތެރިކަން ހުންނަ މީހުންނާއި ކުދީންނަށް ދައުލަތުން މިހާރު ދެނީ މަހަކު 2،000 ރ. ގެ އިނާޔަތެކެވެ. އެ އިނާޔަތް ބޮޑު ކުރައްވާނެ ކަމަށް މި އަހަރުގެ ފެބްރުއަރީ މަހުގެ ތިންވަނަ ދުވަހު ރައީސް ޞާލިހު އިއްވެވި ރިޔާސީ ބަޔާނުގައިވެސް ވަނީ ވިދާޅުވެފައެވެ.
އެގޮތުން، ރައީސް ޞާލިހް ދެއްކެވި ވާހަކަފުޅުގެ ތެރޭގައި އެދުވަހުވެސް އެމަނިކުފާނު ވަނީ، މިހާތަނަށް އައިއިރުވެސް ނުކުޅެދުންތެރިކަން ހުންނަ މީހުންނާބެހޭ ޖުމްލަ އަދަދާ ތަފްޞީލް އެނގޭ ޤައުމީ ދަފްތަރެއް ރާއްޖޭގައި އެކަލަވާލާފައި ނެތް ކަން ފާހަގަކުރައްވާފައެވެ. އަދި އެފަދަ ދަފްތަރެއް އެކުލަވާލުމުގެ މަސައްކަތް ކުރިއަށް ދާކަމުގައިވެސް ރައީސް ވިދާޅުވިއެވެ.
މިއާއެކު އެމަނިކުފާނު ވަނީ އެދަފްތަރު ނިންމައި މިއަހަރުގެ ފަހު ކުއާރޓާގައި ނުކުޅެދުންތެރިކަން ހުންނަ މީހުންނަށް ސަރުކާރުންދޭ ޢިނާޔަތް ބޮޑު ކުރުމަށް ނިންމަވާފައިވާ ކަމަށްވެސް ހާމަކުރައްވާފައެވެ.
އޭގެ ފަހުން، ސެޕްޓެމްބަރު މަހު ކުރިއަށްދިޔަ ތިންވަނަ ވިއަވަތި ކޮންފަރެންސްގައިވެސް ނުކުޅެދުންތެރިކަން ހުންނަ ފަރާތްތަކުގެ އިނާޔަތް ވަރަށް އަވަހަށް ބޮޑު ކުރެވިގެންދާނެ ކަމަށް ރައީސް ވިދާޅުވިއެވެ. އެދުވަހުވެސް ރައީސް ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ދޭ އިނާޔަތް ބޮޑުކުރުމަށް ކުރަމުންދާ މަސައްކަތްތަކުގެ ތެރެއިން މިހާރު ކުރައްވަމުން ގެންދަވާ މަސައްކަތަކީ ދަފްތަރެއް އެކުލަވައިލުމުގެ މަސައްކަތް ކަމަށާ އެ މަސައްކަތް ނިމުމާއެކު ނުކުޅެދުންތެރިކަން ހުރި ފަރާތްތަކަށް ދޭ އިނާޔަތް ބޮޑު ކުރައްވާނެ ކަމަށެވެ. އެހެންނަމަވެސް އަދިވެސް އެކަން ކުރާނެ ތާރީހެއް ސަރުކާރުން ހާމަކުރައްވާފައި ނުވެއެވެ.
Advertisement
This content is created and paid for by advertisers and does not involve Voice Journalists
