ވެލާނާ އިންޓަރނޭޝަނަލް އެއަރޕޯޓުން ފުލުހުން ހައްޔަރު ކުރި އިންޑިއާ ދެ ޖާސޫސުންގެ މައްސަލަ ނުބަލައި އެމީހުން ފުރުވާލައިފިއެވެ. 

އިންޑިއާގެ ޖާސޫސުންތަކެއް ރާއްޖެގެ ވެލާނާ އިންޓަރނޭޝަނަލް އެއަރޕޯޓުން މިދިޔަ އޯގަސްޓްމަހުގެ 28 ވަނަ ދުވަހުގެ ރޭ ފުލުހުން ވަނީ އަތުލައިގަނެފައެވެ. 

އެކަމާއި ގުޅިގެން މައުލޫމާތު ދެމުން ފުލުހުން ބުނީ، ވެލާނާ އިންޓަރނޭޝަނަލް އެއަރޕޯޓްގައި ވެރިއަކު ނެތި ދޫކޮށްލާފައިވާ ލަގޭޖެއް ހުރި ކަމަށް ރިޕޯޓްކުރުމާއި ގުޅިގެން ފުލުހުން އެއާޕޯރޓްގައި އޮޕަރޭޝަނެއް ހިންގާފައިވާ ކަމަށެވެ. އަދި އެ މައްސަލާގައި އެއާރޕޯޓުން ހައްޔަރު ކުރި ދެ މީހުން ހައްޔަރު ކުރި ސަބަބާއި ގުޅޭގޮތުން މައުލޫތު ދެމުން ފުލުހުން ބުނީ، އެ ލަގެޖުގައި އޮތް ގަމީހެއްގައި ބަޓަން ކެމެރާއެއް އިންކަން އެނގުމާ އެކު ލަގެޖް ބެހެއްޓީ ކާކުކަން ބެލުމަށް ފަހު، އިތުރު ބައެއްކަންކަން ސާފުކުރުމަށް އެ ލަގޭޖާ ގުޅުންހުރި ދެ ބިދޭސީން ހައްޔަރުކުރީ ކަމަށެވެ.  

އެ ދެ މީހުން ހައްޔަރުކޮށް އޮގަސްޓު މަހު 29 ގައި ވަނީ ބަންދަށް 10 ދުވަސް ކޯޓުން ދީފަ އެވެ.

މި މައްސަލާގައި ފުލުހުން ހައްޔަރު ކޮށްފައިވަނީ 26 އަހަރުގެ މޯޑް އޮވައިސް އަދި ގޮގްޑާ ހާރޫން ނަމަކަށް ކިޔާ 41 އަހަރުގެ އިންޑިއާ ދެ ފިރިހެނުންނެވެ.

ފުލުހުންގެ މީޑިއާ އޮފިޝަލަކު ވިދާޅުވީ އެ މައްސަލައިގެ ތަހުގީގުކުރިއިރު އެ ދެ މީހުންގެ މައްޗަށް ޖިނާއީ ތުހުމަތެއް އުފުލެވޭ ވަރަށް ހެއްކާއި ގަރީނާ ހޯދިފައިނުވާ ކަމަށެވެ. އެހެންވެ، މިދިޔަ މަހުގެ 8 ވަނަ ދުވަހު ފުލުހުންގެ ބަންދުން ދޫކޮށްލައި ޖެހިގެން އައި ދުވަހު ރާއްޖެއިން ފޮނުވާލާފައިވާ ކަމަށް އޮފިޝަލް ވިދާޅުވި އެވެ.