ދެންވެސް ވަޢުދުވެ ވަޢުދު ފުއްދޭނީ ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އަށް ކަމަށް ވިދާޅުވެ އިދިކޮޅު ޕީޕީއެމްގެ ތަރުޖަމާނު ހީނާ ވަލީދު އަދުގެ ސަރުކާރަށް ހޫނު ރައްދެއް ދެއްވައިފިއެވެ. 

އިއްޔެ ރައީސް އޮފީހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ތަރުޖަމާނު މިއުވާން މުހައްމަދު ދެއްކެވި ވާހަކަތަކަށް ރައްދު ދެއްވައި ހީނާ ކުރެއްވި ޓުވީޓެއްގައި ވަނީ، އަދުގެ ސަރުކާރަށް ވަރަށް ބޮޑަށް ފާޑުވިދާޅުވެފައެވެ. އެގޮތުން، ހީނާ ވިދާޅުވީ، ރައީސް ޔާމީން ބިނާކުރެއްވި ބޮޑެތި އިމާރާތްތައް ރަހުނުކޮށް ލޯނުނަގައިގެންތިބެ، އެއްއަތުން އެމަނިކުފާނު ފެއްޓެވި މަޝްރޫޢުތަކުގެ ރިބަންފަށް ކަނޑަމުން، އަނެއްއަތުން މައިކު ހިފައިގެން ރައީސް ޔާމީން ވައުދުވާނެ ކަމެއްނެތޭ ބުނުމުން ހިނި އަންނަކަމަށެވެ.

"ދެންވެސް ވައުދުވެ ވައުދު ފުއްދޭނީ ރައީސް ޔާމީނަށް." ހީނާ ވިދާޅުވިއެވެ. 

ބޭއްވި ޕްރެސް ކޮންފަރެންސްގައި ކުރީގެ ރައީސް ޔާމީން އަބްދުލްގައްޔޫމަށް ނުސީދާ ފާޑުކިޔުންތަކެއް އަމާޒުކުރައްވާ ވާހަކަދައްކަވަމުން، މިއުވާން ވިދާޅުވީ ރައީސް ޔާމިންއަށް ވެރިކަން ލިބިވަޑައިގަތުމުން އަތޮޅުތެރޭގެ ރައްޔިތުންނަށް ކޮށްދެއްވަންޖެހޭ ކަންކަން ނުކޮށްދެއްވާ އޮތުމަކީ ބޮޑު ކަންބޮޑުވުމެއްގެ ގޮތުގައި ރައްޔިތުން ފާހަގަކުރާކަމަށެވެ. އަދި އެމަނިކުފާނުގެ ވެރިކަމުގައި މަސައްކަތްޕުޅު ކުރެއްވީ މާލެ ސަރަހައްދު ތަރައްގީކުރުމަށްކަމަށް މިއުވާން ވިދާޅުވިއެވެ. 

މިއުވާން ވިދާޅުވީ ކުރީ ސަރުކާރާއި ޚިލާފަށް މި ސަރުކާރުގެ ސިޔާސަތަކީ ލާމަރުކަޒީ ނިޒާމެއްގެ ތެރެއިން ވެރިކަން ކުރުން ކަމަށެވެ. އެގޮތުން ރައީސް ސޯލިހު އަމާޒަކީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާގެ އިތުރުން އަސާސީ ޚިދުމަތްތައް ގާއިމްކުރުންކަމަށް އޭނާ ވިދާޅުވިއެވެ. 

"ރައީސް ޔާމީން އިހަވަނދޫއަށް ވަޑައިގެން ވިދާޅުވި އައިސް ޕްލާންޓް، ބަނދަރުގެ ވާހަކަ. މިހާރުވެސް އެމަސައްކަތް އެރަށުގައި އެބަހިނގާ. ރަށްރަށް ވަޑައިގެން މާލޭގެ މަންޒަރު ފެންނަ ފޮޓޯއެއް ޖައްސަވައިގެން ވައުދުތައް ވަމުންދާއިރު އަޅުގަނޑުމެން މިސަރުކާރުގެ މިދައުރު ނިމޭއިރު ރަށްތަށުގެ އަސާސީ ޚިދުމަތްތައް އިތުރު ދައުރެއްގައި ކުރައްވަން ނުޖެހޭ ވަރަށް އަޅުގަނޑުމެން ކަންކަން ނިންމާނަން" މިއުވާން ވިދާޅުވިއެވެ.