އިސްލާމްދީނަށް ހޭލުންތެރިކަން އިތުރުކުރުމާއި ދީނަށް ޚިދުމަތްކުރުމާއި ދީނީ ޢިލްމު އުނގަންނައިދިނުމުގެ ދާއިރާއިން؛ ދީނީރޮނގުން ޚިދުމަތްކުރުމާއި، ހޭލުންތެރިކަން އިތުރުކުރުމުގެ ރޮނގުން ހިތްވަރު ދިނުމުގެ ގައުމީ އިނާމު, އައްޝައިޚް އިލްޔާސް ޙުސައިން އަށް ދެއްވައިފިއެވެ.

ރޭ ގައުމީ އިނާމު ދެއްވުމަށް ބޭއްވި ރަސްމީ ޖަލްސާގައި އިލްޔާސަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.

ޝައިހް އިލްޔާސާއި ގުޅޭ ގޮތުން ރައީސުލްޖުމްހޫރިއްޔާގެ އޮފީހުން ތައްޔާރު ކުރެއްވި ރިޕޯޓްގައި ވަނީ، އޭނާގެ ތަޢުލީމީ ހަޔާތަށް އަލިއަޅުވާލާފައެވެ. އަދި ދިވެހި މުޖުތަމަޢުގައި އިސްލާމްދީނުގެ ވަޙުދަތު ދަމަހައްޓައި، އިސްލާމީ އުސޫލުތައް ނަގަހައްޓައި، އިސްލާމީ ތަޢުލީމަށް ހޭލުންތެރިކަން އިތުރުކުރުމަށްޓަކައި އެކި ފެންވަރުގައި ތަފާތު މަސައްކަތްތައް އިލްޔާސް ކުރިއަށް ގެންދަވާފައިވާ ކަމަށްވެސް އެ ރިޕޯޓުގައި ބުނެފައިވެއެވެ.

Advertisement

"ދަޢުވާގެ މައިދާނުގައި ކުރެއްވި މަސައްކަތްތަކުގެ ތެރެއިން ކުރިއަށް ގެންދަވައިފައިވާ އެކި ޕުރޮގްރާމުތަކުގައި، 200 އަށްވުރެ ގިނަ މައުޟޫޢަށް ދެއްވި ދަރުސްތައް ސީޑީއަށް ރެކޯޑު ކުރައްވައި، ރާއްޖޭގެ ކަންކޮޅުތަކަށް ބެއްސެވިއެވެ. އަދި ސޯޝަލް މީޑިއާ މެދުވެރިކުރައްވައި، އިސްލާމްދީނަށް ހޭލުންތެރި ކުރުވުމުގެ ތަފާތު ކުރު ވީޑިއޯ ޕުރޮގްރާމުތައް ހުށަހަޅުއްވަމުން ގެންދަވައެވެ." ރައީސް އޮފީހުގެ ރިޕޯޓްގައި ވެއެވެ.

2010 ވަނަ އަހަރުން ފެށިގެން 2014 ވަނަ އަހަރާ ހަމަޔަށް ދިވެހިރާއްޖޭގެ ފިޤްހު އެކެޑަމީގެ މެންބަރުކަންވެސް އިލްޔާސް ކުރެއްވިކަން ރައީސް އޮފީހުން ވަނީ ފާހަގަ ކުރައްވާފައެވެ.

ޝެއިޚް އިލްޔާސް އަކީ ރައީސް ޞާލިހު ވެރިކަމަށް ގެނައުމަށް ގިނަ މަސައްކަތް ތަކެއް ކުރެއްވި ބޭފުޅެކެވެ. އެގޮތުން، އެމަނިކުފާނުގެ ކެންޕެއިން ކޮށްދެއްވުމަށްވެސް ގިނަ ރަށްރަށަށް ވަޑައިގެން، ޕޯޑިއަމްތަކުގައި ރައީސް ޞާލިހު އަށް ތައުރީފް ކުރައްވައި ވާހަކަތައް ދައްކަވާފައިވެއެވެ.