ސަރުކާރުގެ ޚަރަދުތައް ކުޑަ ކުރުމުގެ ބަދަލުގައި ރައްޔިތުންގެ އަތުން ނަގާ ޓެކްސް ބޮޑުކުރުމަށް ނިންމުމާއި ގުޅިގެން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބުރާހިމް ޝުޖާއު ފާޑުވިދާޅުވެއްޖެއެވެ.
ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ޝުޖާއު ވިދާޅުވީ، ރައްޔިތުންގެ އަތުން ނަގާ ޓެކްސް ބޮޑުކުރުމުގެ ކުރިން ސަރުކާރުގެ ޚަރަދުތައް ކުޑަ ކުރަން ޖެހޭކަމަށެވެ. އަދި ރައްޔިތުންގެ އަތުން ފައިސާ ނަގައިގެން މި ސަރުކާރުން އިގްތިސާދީ ހަރަކާތްތައް ހިންގުމުގެ ބަދަލުގައި، އިސްރާފު ކުރަމުންދާކަމަށް ޝުޖާއު ވިދާޅުވިއެވެ.
އަދި އެ ފައިސާ ޚަރަދުކުރަމުންދަނީ ސަރުކާރު ހިންގާ މައި ޕާޓީ އެމްޑީޕީގެ އެކްޓިވިސްޓުންނަށްކަމަށް ޝުޖާއު ވަނީ ވިދާޅުވެފައެވެ.
"ސަރުކާރަށް އާމްދަނީ ހޯދޭނެ މަސައްކަތެއް މި ސަރުކާރަށް ދެއްކިފައެއް ނުވޭ ތިޔަ ލޮބިވެތި ރައްޔިތުންގެ އަތުން ލާރި ނަގައިގެން، ލާރި ފެލައިގެން ނޫނިއްޔާ. ސަރުކާރު ހިންގަން އަދިވެސް މި އުޅެނީ ރައްޔިތުން ފެލަން. އެހެންނެއް ނޫނެއް ނޯންތޯ ކަންކުރަންވީ! މި ސަރުކާރުގެ ޚަރަދު ކުޑަކުރަން ކޮން އިރަކުތޯއޭ ރައީސް ސޯލިހު ވިސްނަވާނީ؟ އެއީ ނޫންތޯ ރައްޔިތުން އުފައްދަންވީ ސުވާލަކީ. ރައްޔިތުން އަތުން ޖީއެސްޓީ މާދަމާ އެ ބޮޑުކޮށްލަނީ 6 ޕަސެންޓުން 8 ޕަސެންޓަށް. ލިބޭ ލާރިކޮޅު މި ހޭދަކުރަނީ ޕާޓީ މީހުންނަށް އަޗާ ތަޅަން"
ޕީއެންސީގެ ނައިބުރައީސް ޝުޖާއު
ޝުޖާއުގެ ވާހަކައިގައިވަނީ ސަރުކާރުން ކުރަމުންދާ ދަތުރުތަކަށްވެސް ގިނަ ފާޑުކިޔުންތައް އަމާޒުކުރައްވާފައެވެ. ސަރުކާރަށް އާމްދަނީ ހޯދޭނެ ވަސީލަތްތައް ގާއިމްކުރެވިފައި ނުވާއިރު، ދަތުރުތަކަށް ކުރާ ޚަރަދު އެތައް ގުނައަކަށް އިތުރުކޮށްފައިވާކަން އޭނާ ފާހަގަކުރެއްވިއެވެ. އަދި ސަރުކާރުގެ ދަތުރުތަކުގައި ބޮޑެތި ވަފުދުތައް ގެންދާކަންވެސް ފާހަގަކުރެއްވިއެވެ.
އެއާއެކު ޝުޖާއު ވިދާޅުވީ، ސަރުކާރުގެ ބޭކާރު ޚަރަދުތައް ކުޑަ ނުކޮށް ރައްޔިތުންގެ އަތުން ނަގާ ޓެކްސް އެންމެ ރުފިޔާއެއް ބޮޑުކުރެވިގެން ނުވާނެކަމަށެވެ. އަދި އެކަމަށް ޖާގަ ނުދެއްވުމަށްވެސް ޝުޖާއު ވަނީ އެދިލައްވާފައެވެ.
Advertisement
This content is created and paid for by advertisers and does not involve Voice Journalists
