ދިވެހިރާއްޖޭގައި އަރަބި ތައުލީމު ކިޔަވައިދޭ ހަމައެކަނި ސުކޫލު ކަމަށްވާ އަރަބިއްޔާ ސުކޫލާއި މެދު ސަރުކާރުން އިހުމާލުވެފައިވާކަން ފާހަގަކޮށް އެ ސުކޫލުގެ ބެލެނިވެރިންގެ ފަރާތުން ގިނަ ކަންބޮޑުވުންތަކެއް ހިއްސާކޮށްފިއެވެ. 

އަރަބިއްޔާ ސުކޫލުގެ ބޯޑާއި ޕީޓީއޭގެ މަންދޫބުން ގުޅިގެން ބޭއްވި ނިއުސް ކޮންފަރެންސްގައި، ޕީޓީއޭގެ މެމްބަރުންނާއި، މަންދޫބުން ވަނީ ސުކޫލަށް ދިމާވެފައިވާ ދަތިތަކާއި، މިހާރު ދަރިވަރުން ކިޔަވަމުންދާ ގޮތުގެ އިތުރުން، ސަރުކާރުން އަޅާދޭނެކަމަށް ބުނި އާ ސުކޫލުގެ ޕްލޭނަށް ގެނައި ބަދަލުގެ ސަބަބުން ހުރި ކަންބޮޑުވުންތައްވެސް ހިއްސާކޮށްފައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޓީއޭގެ ނައިބުރައީސް ޢާއިޝަތު ޝާދިޔާ ވިދާޅުވީ މިހާރު އަރަބިއްޔާ ސުކޫލުގެ ދަރިވަރުން ވަގުތީ ސުކޫލެއްގައި ކިޔަވަމުންދަނީ ވަރަށް ގިނަ ޙިދުމަތްތަކުން މަހުރޫމެ ތިބެ ކަމަށެވެ. 

އެގޮތުން ދަރިވަރުންގެ ހަށިގަނޑުގެ ދުޅަހެޔޮކަން ކަށަވަރުކުރުމަށް ނަގަން ޖެހޭ ޕިސިކަލް އެކްސަސައިޒް ގަޑި ގަވައިދުން ނުނެގޭ ކަމަށާއި، ސުކޫލުގައި ލެބޯޓްރީއެއް އަދި ލައިބްރަރީއެއްވެސް ނެތްކަން އޭނާ ފާހަގަކުރެއްވިއެވެ. 

އަރަބިއްޔާ ސުކޫލުގެ ބެލެނިވެރިންގެ ކަންބޮޑުވުންތައް ހިއްސާކުރައްވަމުން ޕީޓީއޭގެ މެމްބަރު ޔޫސުފް ވިދާޅުވީ، ހަމަހަމަ ކަމާއެކު ސުކޫލުތަކަށް ޚިދުމަތް ކުރުމަކީ ސަރުކާރަށް ގާނޫނުން މަތިކޮށްފައިވާ ޒިންމާއެއް ނަމަވެސް އެ ޒިންމާ އަދާކުރުމުގައި ސަރުކާރުން ނުކުޅެދިފައިވާކަމަށެވެ. 

އަރަބިއްޔާ ސުކޫލަކީ ރާއްޖޭގައި އަރަބި ތައުލީމު ކިޔަވައިދޭ ހމައެކަނި ސުކޫލަށްވެފައި، މިހާރުވެސް 800އަށް ވުރެ ގިނަ ދަރިވަރުން އެ ސުކޫލުގައި ކިޔަވަމުންދާއިރު، އަހަރުތަކެއް ވަންދެން އެ ސުކޫލަށް ދިމާވެފައިވާ ޖާގައިގެ ދަތިކަމަށް ހައްލެއް ހޯދާދެވިފައި ނުވާކަމަށެވެ. 

އަރަބިއްޔާ ސުކޫލުގެ ދާއިމީ އިމާރާތް އެޅުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބާ ޖަމާލުއްދީން ސުކޫލު ކަނޑައަޅާދެއްވި ދެއްވުމަކީ، އަރަބިއްޔާ ސުކޫލުގެ ބެލެނިވެރިން އުފަލާއެކު ބަލައިގަތް ކަމެއްކަމަށް ޔޫސުފް ވިދާޅުވިއެވެ.

އެހެން ނަމަވެސް އެޑިއުކޭޝަން މިނިސްޓްރީއިން އެފަހުން ސުކޫލު އެޅުމުގެ ޕްލޭނަށް ގެނައި ބޮޑު ބަދަލުގެ ސަބަބުން އަރަބިއްޔާއަށް ކައިރި މުސްތަގުބަލެއްގައި ޖާގައިގެ ދަތިކަން އަނެއްކާވެސް ދިމާވެ، އިތުރު ދަތުވަރުންނަށް ސުކޫލުން ފުރުސަތު ނުލިބޭ ވަރަށް އެ ދަތި ތަހަންމަލް ކުރަން ޖެހޭނެކަމަށް ޔޫސުފް ވިދާޅުވިއެވެ. 

ޔޫސުފް އިތުރަށް ވިދާޅުވީ އަރަބިއްޔާ ސުކޫލަށްވުރެ މާ އާބާދީ ކުދި ސުކޫލުތަކަށް މާ ބޮޑެތި ޖާގަތައް ދީފައިވާކަން ފާހަގަކުރެވޭކަމަށެވެ. 

ގަވައިދުގައި ބުނާގޮތުން ރާއްޖޭގެ ސުކޫލެއްގެ ބޮޑުމިނުގައި މަދުވެގެން 25 އަކަފޫޓު ހުންނަން ވާނެކަން ބަޔާންކޮށްފައިވީ ނަމަވެސް އަރަބިއްޔާ ސުކޫލަށް ދީފައި މިވާ ޖާގައަކީ އެއަށް ވުރެ މާ ބޮޑުތަން ކުޑަ ޖާގައެއްކަމަށް އޭނާ ވިދާޅުވިއެވެ. އަދި މިހާރު އޮތް ޕްލޭނާއި އެއްގޮތަށް ސުކޫލު އަޅައިފިކަމަށް ވާނަމަ، ސުކޫލުގައި ޕީއީ ގަޑި ނަގަން ދަތިވެ އަނެއްކާވެސް ޖާގައިގެ ދަތިކަން ދިމާވެ، އެ ސުކޫލުން ނިކުންނަން ޖެހޭ ހާލަތު ދާދި އަވަހަށް މެދުވެރި ވެދާނެކަން އޭނާ ފާހަގަކުރެއްވިއެވެ. 

އަރަބިއްޔާ ސުކޫލުގެ ދަރިވަރުން މިހާރު ކިޔަވަމުންދަނީ ވަގުތީ ސުކޫލެއްގައިކަމުން ދަރިވަރުންނަށް ތައުލީމީ މުގައްރަރުގެ ތެރެއިން ވަރަށް ގިނަ ކަންކަން އުނިވާކަން ބެލެނިވެރިން ގެންދަނީ ފާހަގަކުރައްވަމުންނެވެ. 

ވަގުތީ ސުކޫލެއްގައި ގިނަ ދުވަސްތަކެއް ހޭދަކުރަން ޖެހުމަކީ ދަރިވަރުންނާއި ބެލެނިވެރިންނަށްވެސް ވަރަށް ބޮޑެތި ތަކުލީފުތަކެއް ކުރިމަތިވާ ކަމެއްގެ ގޮތުގައި ޕީޓީއޭއިން ފާހަގަކުރެއްވިއެވެ. 

އެގޮތުން ސުކޫލު ބޯޑުގެ މެމްބަރު އަބްދުއްރަހްމާނު ވިދާޅުވީ ސުކޫލުގެ އާ އިމާރާތް ރައީސް އިބްރާހިމް މުހައްމަދު ސޯލިހު ވެލެއްވި ވައުދާއި އެއްގޮތަށް ނިންމާ ލެވިފައި ނުވާކަންވެސް ފާހަގަކުރެއްވިއެވެ. 

ޕީޓީއޭގެ މެމްބަރުން ނޫސްވެރިންނަށް ހިއްސާކުރި މައުލޫމާތަށް ބަލާއިރު، އެ ސުކޫލުގެ މަސައްކަތް އަވަސްކުރުމަށް ޕީޓީއޭއިން ވަނީ ގިނަ މަސައްކަތްތަކެއް ކޮށްފައެވެ. އެގޮތުން 2021 ވަނަ އަހަރުގެ ޑިސެމްބަރު މަހުގެ 20 ވަނަ ދުވަހު ޕީޓީއޭއިން ރައީސުލްޖުމްހޫރިއްޔާ އާއި ބައްދަލުކުރައްވާ އަރަބިއްޔާ އަށް ދިމާވެފައިވާ މައްސަލަތައް ވަނީ ހިއްސާކޮށްފައެވެ. 

ބާ ޖަމާލުއްދީން ސުކޫލުގެ ބިން އަރަބިއްޔާއަށް ހަމަޖައްސާދެއްވާފައިވަނީ އެ ބައްދަލުވުމުގެ ތެރެއިންކަމަށް ޕީޓީއޭއިން ވަނީ ބުނެފައެވެ. އެހެން ނަމަވެސް 7 އޯގަސްޓު 2022 ގައި އަރަބިއްޔާ ސުކޫލުގެ ޖާގަ ކުޑަކޮށް ސެޕްޓެމްބަރު 10އަކަށް ތަން ތަޅާލާ މަސައްކަތް ފައްޓަވާނެކަމަށް އެޑިއުކޭޝަން މިނިސްޓަރު ވިދާޅުވެފައިވާކަން ޕީޓީއޭއިން ފާހަގަކުރެއްވިއެވެ. 

ސުކޫލެއް އެޅުމަށް ހޭދަކުރެވޭ މުއްދަތަކީ 17 މަސް ދުވަސްކަމަށް ވާއިރު، ދައުރު ނިންމާލުމުގެ ކުރިން އަރަބއްިޔާގެ އާ ސުކޫލު އަޅާނެކަމަށް ވިދާޅުވި ވިދާޅުވުމާއި އެއްގޮތަށް މަސައްކަތް ނިންމާލެވުމަކީ ނާދިރު ކަމެއްކަން ޕީޓީއޭގެ މެމްބަރު އަބްދުއްރަހުމާނު ވަނީ ވިދާޅުވެފައެވެ. 

އަރަބިއްޔާ ސުކޫލުގެ ބެލެނިވެރިންގެ ކަންބޮޑުވުންތައް ހިއްސާކުރައްވަމުން އަރަބިއްޔާގެ ޕީޓީއޭއިން ބުނީ އަރަބިއްޔާ ސުކޫލަށް ބޭނުންވަނީ ދާއިމީ ހައްލެއްކަމަށެވެ. އެއްތަނުން އަނެއްތަނަށް ބަދަލުވާން ޖެހުމާއި، އެހެން ސުކޫލަކާއެކު އިމާރަތް ޝެއަރކުރަން ޖެހުން ފަދަ ގޮންޖެހުންތައް އަރަބިއްޔާއަށް ދިމާވެފައިވާާތާ އެތައް އަހަރެއް ވެގެން ގޮސްފައިވާކަން ޕީޓީއޭއިން ވަނީ ފާހަގަކޮށްފައެވެ. 

އެއާއެކު އެބޭފުޅުން އެދިލެއްވީ ދާއިމީ ހައްލެއް ހޯދާދިނުމަށެވެ. ރާއްޖޭގެ އެހެން ސުކޫލުތަކަށްވެސް ދީފައިވާ ގޮތަށް، އަދި ގަވައިދުގައި ބުނާ އުސޫލުން އެކަށީގެންވާ ޖާގައެއް އަރަބިއްޔާ ސުކޫލަށްވެސް ހޯދާދިނުމަށެވެ.

އަރަބިއްޔާ ސުކޫލުގެ ދަރިވަރުންނާއި ސުކޫލުގެ މުސްތަގުބަލަށް ވިސްނަވާ އެ އިންތިޒާމުތައް ސަރުކާރުން ހަމަޖައްސާދެއްވުމަކީ ބެލެނިވެރިންގެ އާދޭސްކަމަށް ޕީޓީއޭއިން ވަނީ ބުނެފައެވެ.