ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ނ އަތޮޅަށް ކުރައްވާ ދަތުރުފުޅުގައި ނ ހޮޅުދޫއަށް ވަޑައިގަތުމުން ހޫނު މަރުހަބާއެއް ދަންނަވައިފިއެވެ. 

ރައީސް ޔާމީން ހޮޅުދޫއަށް ވަޑައިގެންފައިވަނީ މިރޭގެ 8:30 ހާއިރުގައެވެ. އެވަގުތު އެމަނިކުފާނަށް މަރުހަބާ ދެންނެވުމަށް ގިނަ އަދަދެއްގެ ރައްޔިތުން އެ ރަށުގެ ބަނދަރު ސަރަހައްދުގައި ތިބިކަން ފާހަގަކޮށްލެވެއެވެ. 

ރައީސް ޔާމީން ވަނީ އެމަނިކުފާނުގެ އިސްތިގުބާލުގައި ތިއްބެވި ހުރިހާ ރައްޔިތުންނާއި ސަލާމްކުރައްވާފައެވެ. 

Advertisement

އެމަނިކުފާނު ހުޅުދޫއަށް ވަޑައިގެންފައިވަނީ މިއަދު އެ އަތޮޅު ކެނދިކުޅުދޫއަށް ވަޑައިގަތުމަށްފަހުގައެވެ. 

ކެނދިކުޅުދޫއިންވެސް ރައީސް ޔާމީންއަށް ހޫނު މަރުހަބާއެއް ކިޔާފައިވާއިރު، އެ މަނިކުފާނުވަނީ އެރަށުގެ ޕީޕީއެމްގެ ހަރަކާތްތަކުގައި އިސްކޮށް ހަރަކާތްތެރިވާ ފަރަާތްތަކާއި، ޒުވާނުންނާއި ބައްދަލުކުރައްވާފައެވެ. 

ރައީސް ޔާމިން އަތޮޅުތެރެއަށް ކުރައްވާ މި ދަތުރުފުޅަކީ އަތޮޅުތެރޭގެ ރައްޔިތުންނާއި ބައްދަލުކުރައްވާ އެ ރައްޔިތުންގެ ކަންބޮޑުވުންތައް އަޑުއެއްސެވުމުގެ އިތުރުން ކުރިއަށް އޮތް ރިޔާސީ އިންތިޚާބަށް ޕީޕީއެމްގެ މެނިފެސްޓޯއަށް ބޭނުންވާ މުހިންމު މައުލޫމާތުތައް އެއްކުރުމަށް ކުރައްވާ ދަތުރުފުޅުތަކެއްކަން ފާހަގަކޮށްލެވެއެވެ.