ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ނ އަތޮޅަށް ކުރައްވާ ދަތުރުފުޅައި ހޮޅުދޫއަށް ވަޑައިގަތުމުން އެމަނިކުފާނުގެ އިސްތިގުބާލުގައި ހުރި ކުއްޖަކު، ހުޅުދޫއާއި މީދޫ ބްރިޖަކުން ގުޅާލުމަށް ދެކޭ ހުވަފެން ރައީސް ޔާމީންއާއި ހިއްސާކުރައްވައިފިއެވެ. 

އެމަނިކުފާނު ހޮޅުދޫއަށް ވަޑައިގަތުމުން އެމަނިކުފާނުގެ އިސްތިގުބާލުގައި ހުރި އެ ކުއްޖާ ވަނީ ހޮޅުދޫއާއި މީދޫ ބްރިޖަކުން ގުޅާލުމަށް ދެކޭ ހުވަފެން ދައްކުވައިދޭ ކުރެހުމެއް ރައީސް ޔާމީންގެ އަތްޕުޅަށް އަރުވާފައެވެ.

އެ ކުރެހުމުގައި އޮތީ ހޮޅުދޫއާއި މީދޫ ބްރިޖަކުން ގުޅުވާލާފައިވާ މަންޒަރެވެ. އަދި އެ ބްރިޖާއެކު އުސް އިމާރާތްތަކާއި އެ ކުރެހުމުގައި ވަނީ ކުރަހާފައެވެ. 

Advertisement

ރައީސް ޔާމީންގެ އަތްޕުޅަށް އެރުވި އެ ކާޑުގައި "އައި ވިޝް މައި ޑްރީމް ކަމް ޓްރޫ" މިފަދައިން ލިޔެފައި އޮތެވެ. 

ހޮޅުދޫގެ ތުއްތު ކުއްޖަކު ރައީސް ޔާމީންގެ އަތްޕުޅަށް އެރުވި ކާޑު (އެ ކުއްޖާގެ ޑްރީމް)

ރައީސް ޔާމީން ރަށްރަށަށް ކުރައްވާ ދަތުރުފުޅުތަކުގައި އެމަނިކުފާނަށް މަރުހަބާ ދެންނެވުމަށް ތިބޭ ތުއްތު ކުދިން، މީގެ ކުރިންވެސް ވަނީ އެ ކުދިންގެ ޑްރީމްތައް ނުވަތަ ޝުއޫރުތައް ކާޑުތަކުގެ ސިފައިގައި ކުރަހާ ރައީސް ޔާމީންގެ އަތްޕުޅަށް އަރުވާފައެވެ. 

އެގޮތުން ރައީސް ޔާމީން އަކީ ހީރޯއެއްކަމަށް ލިޔެފައިވާ ކާޑެއް ހއ އަތޮޅަށް ކުރެއްވި ދަތުރުގައި ތުއްތު ކުއްޖަކު އެމަނިކުފާނާއި ހަވާލުކުރައްވާފައިވާކަން ފާހަގަކޮށްލެވެއެވެ. 

ރައީސް ޔާމީން ނ އަތޮޅަށް ކުރައްވާ ދަތުރުފުޅުގައި ހޮޅުދޫއަށް ވަޑައިގަތުމުން، ރައްޔިތުން ވަނީ ހޫނު މަރުހަބާއެއް ކިޔައިފައެވެ. އެމަނިކުފާނުގެ އިސްތިގުބާލުގައި ގިނަ އަދަދެއްގެ ރައްޔިތުން ބަނދަރު ސަރަހައްދުގައި ތިއްބެވިތަން ފެނިގެން ގޮސްފައިވެއެވެ.