ގދ.ހޯޑެއްދޫ ރަޝީދު، ފުލުހުންގެ ބެލުމުގެ ދަށުގައި ހުއްޓާ ކުއްލި ގޮތަކަށް ނިޔާވި މައްސަލަ އިންސާފުވެރިކަމާއެކު ތަޙްޤީޤުކުރުމަށް އިދިކޮޅު ޕީޕީއެމް/ޕީއެންސީ ކޯލިޝަނުން ގޮވާލައިފިއެވެ. 

އިދިކޮޅު ކޯލިޝަންގެ، ގދ. ހޯޑެއްދޫ ސްޓިއަރިންގ ކޮމިޓީގެ ރައީސްގެ މަގާމުގައިވެސް ހުންނެވި ރަޝީދު ކުއްލި ގޮތަކަށް ނިޔާވުމާއި ގުޅިގެން އިދިކޮޅުން ނެރުނު ބަޔާނެއްގައި ވަނީ އެކޯލިޝަންގެ ލީޑަރު އަދި ޕީޕީއެމްގެ ރައީސް، ރައީސް ޔާމީން ޢަބްދުލްޤައްޔޫމްގެ ނަންފުޅުގައްޔާއި ޕީޕީއެމް ޕީއެންސީގެ ލީޑަރޝިޕްގެ ނަމުގައި ޢާއިލާއަށް ތަޢުޒިޔާ އަރިސްކޮށް މަރްޙޫމްގެ ފުރާނައަށް ސުވަރުގޭގެ ދާއިމީ ނިޢުމަތް ލެއްވުންއެދި ދުޢާކޮށްފައެވެ.

އެއާއިއެކު އެ ބަޔާނުގައި ވަނީ، ރަޝީދު ނިޔާވީ ފުލުހުން އޭނާ ހައްޔަރުކޮށްގެ ގެންގޮސް ލޯންޗެއްގައި ފުލުހުންގެ ބެލުމުގެ ދަށުގައި ހުއްޓާކަމަށް ޢާއިލާއިން މައުލޫމާތުދޭ ކަމަށާ، އޭނާގެ ހައްޔަރުކޮށްގެން ގެންދިޔައިރުވެސް އޭނާގެ މެޔަށް ތަދުވާކަމަށް ބުނަމުންދިޔަ ކަމަށާއި އެހެންނަމަވެސް ފުލުހުން މިކަމަށް އެއްވެސް ވަރަކަށް ސަމާލުކަން ދީފައި ނުވާކަން ފާހަގަކޮށްފައެވެ. އަދި އެތައް އިރެއްފަހުން އޭނާ މަޑަވެއްޔަށް ގެންދިޔައިރުވެސް މަރުވެފައިވާކަމާއި، ފުލުހުން މިމައްސަލައިގައި ޢަމަލުކޮށްފައިވަނީ ވަރަށް ޒިއްމާދާރުކަން ކުޑަކޮށްކަންވެސް އިދިކޮޅުން ވަނީ ބުނެފައެވެ.

ދިވެހި ފުލުހުންނަކީ ރައްޔިތުންގެ ސަލާމަތާ ރައްކާތެރިކަން ކަށަވަރުކުރުމަށް ހުވާކޮށްގެންތިބި ބަޔަކަށްވާއިރު، ފުލުހުންގެ އެ ޢަމަލު ވަރަށް ހަރުކަށި ޢިބާރާތުން ކުށްވެރިކޮށް އެ މައްސަލަ ވީހާވެސް އަވަހަކަށް މިނިވަންކަމާ އިންސާފުވެރިކަމާއެކު ތަޙްޤީޤުކުރުމަށް އިދިކޮޅުން ވަނީ ގޮވާލާފައެވެ.

އަދި އެ ކަމުގައި އިހުމާލުވެފައިވާ ފަރާތްތަކާމެދު ފިޔަވަޅު އަޅާ އިންސާފު ހޯދައިދިނުމުގެ މަސައްކަތް އަވަސް ކުރުމަށްވެސް ވަނީ ގޮވާލާފައެވެ.