ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ނ އަތޮޅަށް ކުރައްވާ ދަތުރުފުޅުގައި ނ މަގޫދޫއަށް ކުރެއްވި ދަތުރުފުޅަށްފަހު ދާދި ދެންމެއަކު ނ. މިލަދޫއަށް ވަޑައިގެންފިއެވެ.

ރައީސް ޔާމީންއަަށް މިލަދޫއިން މަރުހަބާ ދެންނެވުމަށް އިދިކޮޅަށް ތާއީދު ކުރާ ގިނަ ރައްޔިތުން ވަނީ އެ ރަށުގެ ބަނދަރު ސަރަހައްދަށް އެއްވެފައެވެ. އެގޮތުން އެއްވެ ތިބި ގިނަ މީހުން ތިބީ، ގައުމީ ދިދަ އާއި، އިންޑިއާ އައުޓް ދިދައާއި ޕީޕީއެމްގެ ދިދަ ހިފައިގެންކަން ފާހަގަކޮށްލަންޖެހެއެވެ. 

ރައީސް ޔާމީން ވަނީ އެމަނިކުފާނުގެ އިސްތިގުބާލުގައި ތިއްބެވި ހުރިހާ ރައްޔިތުންނާއި ސަލާމްކުރައްވާފައެވެ.

Advertisement

ރައީސް ޔާމީން ނ އަތޮޅަށް ކުރައްވަމުންދާ މި ދަތުރުފުޅު ތެރެއިން އިއްޔެ ވަނީ ނ. ކެނދިކުޅުދޫ އަށާއި ހުޅުދޫއަށްވެސް ވަޑައިގެން އެރަށް ރަށުގެ ރައްޔިތުންނާއި ބައްދަލު ކުރައްވާފައެވެ. 

ރައީސް ޔާމިން އަތޮޅުތެރެއަށް ކުރައްވާ މި ދަތުރުފުޅަކީ އަތޮޅުތެރޭގެ ރައްޔިތުންނާއި ބައްދަލުކުރައްވާ އެ ރައްޔިތުންގެ ކަންބޮޑުވުންތައް އަޑުއެއްސެވުމުގެ އިތުރުން ކުރިއަށް އޮތް ރިޔާސީ އިންތިޚާބަށް ޕީޕީއެމްގެ މެނިފެސްޓޯއަށް ބޭނުންވާ މުހިންމު މައުލޫމާތުތައް އެއްކުރުމަށް ކުރައްވާ ދަތުރުފުޅުތަކެއްކަން އިދިކޮޅުން ބުނެއެވެ. 

އަދި މި ދަތުރުފުޅު ތަކުގެ ތެރެއިން ޕާޓީގެ މެންބަރުން އިތުރު ކޮށް، ޕާޓީގެ ހަރަކާތްތައް އިތުރަށް ވަރުގަދަކުރުމުގެ މަސައްކަތް ކުރައްވާނެކަމަށްވެސް ބުނެފައިވެއެވެ.