ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ނ އަތޮޅަށް ކުރައްވާ ދަތުރުފުޅުގައި ދާދި ދެންމެއަކު ނ. މަނަދޫއަށް ވަޑައިގެންފިއެވެ.

ރައީސް ޔާމީންއަަށް މަނަދޫއިން މަރުހަބާ ދެންނެވުމަށް އިދިކޮޅަށް ތާއީދު ކުރާ ކުދި ބޮޑު ގިނަ ރައްޔިތުން ވަނީ އެ ރަށުގެ ބަނދަރު ސަރަހައްދަށް އެއްވެފައެވެ. އެގޮތުން އެއްވެ ތިބި ގިނަ މީހުން ތިބީ، ގައުމީ ދިދަ އާއި، އިންޑިއާ އައުޓް ދިދައާއި ޕީޕީއެމްގެ ދިދަ ހިފައިގެންކަން ފާހަގަކޮށްލަންޖެހެއެވެ. 

ރައީސް ޔާމީން ވަނީ އެމަނިކުފާނުގެ އިސްތިގުބާލުގައި ތިއްބެވި ހުރިހާ ރައްޔިތުންނާއި ސަލާމްކުރައްވާފައެވެ.

ރައީސް ޔާމީން ނ އަތޮޅަށް ކުރައްވަމުންދާ މި ދަތުރުފުޅު ތެރެއިން ބުދަ ދުވަހު ވަނީ ނ. ކެނދިކުޅުދޫ އަށާއި ހޮޅުދޫއަށްވެސް ވަޑައިގެން އެރަށް ރަށުގެ ރައްޔިތުންނާއި ބައްދަލު ކުރައްވާފައެވެ. އެއަށްފަހު އިއްޔެ މަގޫދޫއާއި މިލަދޫއަށްވެސް ވަނީ ވަޑައިގެންފައެވެ. އަދި މިއަދުގެ މަނަދޫ ދަތުރުފުޅަށްފަހު ދެން އެމަނިކުފާނު ވަޑައިގަންނަވާނީ އެމަނިކުފާނުގެ މަންމާފުޅުގެ އުފަންރަށް، ނ. ވެލިދޫ އަށެެވެ. 

ރައީސް ޔާމިން އަތޮޅުތެރެއަށް ކުރައްވާ މި ދަތުރުފުޅަކީ އަތޮޅުތެރޭގެ ރައްޔިތުންނާއި ބައްދަލުކުރައްވާ އެ ރައްޔިތުންގެ ކަންބޮޑުވުންތައް އަޑުއެއްސެވުމުގެ އިތުރުން ކުރިއަށް އޮތް ރިޔާސީ އިންތިޚާބަށް ޕީޕީއެމްގެ މެނިފެސްޓޯއަށް ބޭނުންވާ މުހިންމު މައުލޫމާތުތައް އެއްކުރުމަށް ކުރައްވާ ދަތުރުފުޅުތަކެއްކަން އިދިކޮޅުން ބުނެއެވެ. 

އަދި މި ދަތުރުފުޅު ތަކުގެ ތެރެއިން ޕާޓީގެ މެންބަރުން އިތުރު ކޮށް، ޕާޓީގެ ހަރަކާތްތައް އިތުރަށް ވަރުގަދަކުރުމުގެ މަސައްކަތް ކުރައްވާނެކަމަށްވެސް ބުނެފައިވެއެވެ.