ޅ. ނައިފަރުގައި އެމްޑީޕީގެ ހަރަކާތްތަކުގައި އެންމެ އިސްކޮށް އުޅުއްވި އެއް ބޭފުޅެއް ކަމަށްވާ މުހައްމަދު އިބްރާހީމް (ޑިކޭ) ޕީޕީއެމަށް ސޮއިކޮށްފިއެވެ. 

މުހައްމަދު އިބްރާހިމް ޕީޕީއެމާއި ގުޅުނުކަން އިއުލާންކޮށް، ފޯމު ހަވާލުކޮށްފައިވަނީ، ރޭ ނ.ވެލިދޫގައި އޮތް ޕީޕީއެމްގެ ޚާއްސަ ޖަލްސާގެ ތެރެއިންނެވެ. އޭނާ ޕާޓީއަށް ސޮއި ކުރި ފޯމު އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް އާއި ރޭގެ ޖަލްސާގައި ވަނީ ހަވާލުކޮށްފައެވެ. 

މުހައްމަދު އިބްރާހިމް އަކީ ނައިފަރުގައި އެމްޑީޕީ ހަރަކާތްތައް ފެށިގެން އައި އިރު އެންމެ އިސްކޮށް ހަރަކާތްތެރިވި އެއް ފަރާތެވެ. އަދި މިއަދާއި ހަމައަށްވެސް އެމްޑީޕީއަށް މާލީގޮތުންނާއި އެނޫން ގޮތް ގޮތުންވެސް އޭނާ ވަނީ އެހީވެދީފައެވެ. 

Advertisement

މުހައްމަދު އިބްރާހިމްގެ އިތުރުން ވެސް، ރައީސް ޔާމީން ނ އަތޮޅަށް ކުރެއްވި ދަތުރުފުޅުގައި އެމަނިކުފާނު ޒިޔާރަތްކުރެއްވި ރަށްރަށުން ޕީޕީއެމާއި ގުޅުނު ފަރާތްތަށްވަނީ ޕާޓީއަށް ސޮއި ކުރި ފޯމް ރައީސް ޔާމީނާއި ހަވާލުކޮށްފައެވެ. އަދި މީގެ ކުރިންވެސް ރައީސް ޔާމީން އަތޮޅުތަކަށް ކުރެއްވި ދަތުރުފުޅު ތަކުގެ ތެރެއިން އެޕާޓީއާއި ގިނަ ފަރާތްތަކެއް ވަނީ ގުޅިފައެވެ. އޭގެ ތެރޭގައި ވެރިކަންކުރާ މައި ޕާޓީ، އެމްޑީޕީގެ ގިނަ ފަރާތްތަކެއް ހިމެނޭ ކަމަށް އިދިކޮޅުން ބުނެއެވެ. 

އެމްޑީޕީގެ ފަރާތްތަށް އެ ޕާޓީ ދޫކުރާ މައިގަނޑު ސަބަބެއް ކަމުގައި، އެފަރާތްތަކައީ ހަވާލާދީ ޕީޕީއެމުން ބުނަނީ، މި ވެރިކަމުގައި ގެންގުޅޭ ދީނާ ބީރަށްޓެހި ސިޔާސަތު ކަމަށެވެ. އެގޮތުން، ބޮޑެތި ފާހިޝް ޢަމަލުތައް ފާޅުގައި ހިންގަމުންދާއިރުވެސް ފިޔަވަޅު ނާޅައި، ލާދީނީ ކަންކަމަށް ސަރުކާރުން ތަރުހީބު ދޭ ކަމަށް އެ ފަރާތްތަކުން ބުނާ ކަމަށް އިދިކޮޅުން ބުނެއެވެ.