ސަރުކާރު ކޯލިޝަންގައި ހިމެނޭ އެހެން ސިޔާސީ ޕާޓީތަކުގެ ލީޑަރުން ބާކީކޮށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަޝްވަރާކުރައްވަނީ ހަމައެކަނި އަދާލަތު ޕާޓީގެ ލީޑަރު އަދި ސަރުކާރުގެ ހޯމް މިނިސްޓަރު އިމްރާނު އާ އެކަނި ކަމަށް އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
ހީނާ މިފަދައިން ވިދާޅުވެފައިވަނީ ފޯޅަވަހި މައްސަލައިގައި މަޝްވަރާ ނުކުރައްވާކަމަށް ކުރީގެ ރައީސް މައުމޫނު އަބްދުލްގައްޔޫމުގެ ސިޔާސީ ޕާޓީ އެމް.އާރު.އެމް އިން ބަޔާނެއް ނެރުމާއި ގުޅިގެން ކުރެއްވި ޓްވީޓެއްގައެވެ. މައުމޫނުގެ އިތުރުން ޖުމްހޫރީ ޕާޓީގެ ލީޑަރު އަދި އެމްޑީޕީގެ ރައީސް މުހައްމަދު ނަޝީދުވެސް ވަނީ އެ މައްސަލައިގައި ސަރުކާރުން އަމަލުކޮށްފައިވާ ގޮތާއި މެދު ނުރުހުން ފާޅުކުރައްވާފައެވެ.
އެއާއެކު ހީނާ ވިދާޅުވީ ޗާގޯސް މައްސަލައިގައި ރައީސް ސޯލިހު އަމަލުކުރައްވާފައިވަނީ ވަރަށް މަކަރުވެރި ގޮތަކަށް ކަމަށެވެ. ކޯލިޝަންގެ އެންމެ ޕާޓުނަރަކާއި ކަންކަން ހިއްސާކުރެއްވުމަށްފަހު ދެން ތިބި މީހުންނާއި އެއްވެސް ކަމެއް ހިއްސާ ނުކުރައްވާކަމަށް ހީނާ ވިދާޅުވިއެވެ.
ހީނާ ވަނީ ރައީސް ސޯލިހުއަކީ ކަންކަމުގައި މަޝްވަރާ ކުރައްވާ ލީޑަރެއްކަމަށް ވިދާޅުވެ އިމްރާނު ތައުރީފުކުރައްވަނީ ހަމައެކަނި އިމްރާނާއި ކަންކަން ހިއްސާކުރައްވާތީތޯ އައްސަވާ ސުވާލުވެސް ކުރައްވާފައެވެ.
ފޯޅަވަހި މައްސަލައިގައި ސަރުކާރުން ކުއްލިގޮތަކަށް ސްޓޭންޑް ބަދަލުކޮށް މޮރިޝަސްކޮޅަށް ޖެހުމާއި ގުޅިގެން ސަރުކާރަށް ބޮޑެތި ފާޑުކިޔުންތަކެއް ދަނީ އަމާޒުވަމުންނެވެ. އަދި ސަރުކާރުގެ އެ ނިންމުމާއެކު ރާއްޖޭގެ ސަރަހައްދުން ބޮޑު ބައެއް ގެއްލިގެން ދިއުމުގެ ފުރުސަތު އޮތުމާއި އެކުގައެވެ.
ސަރުކާރު ކޯލިޝަނަށް ނިސްބަތްވާ ސިޔާސީ ޕާޓީތަކާއި، ސަރުކާރުގެ ވާދަވެރިންވެސް މިކަމުގައި ސަރުކާރަށް ނުރުހުން އަމާޒުކޮށް މޮރިޝަސްކޮޅަށް އަރަން ޖެހުނު ސަބަބު ހާމަކުރުމަށް ދަނީ ގޮވާލަމުންނެވެ.
އެހެން ނަމަވެސް މިހާތަނަށް ސަރުކާރުން ބުނެފައިވަނީ، އެފަދައިން ސްޓޭންޑް ބަދަލުކުރުމުން ދިވެހިންނަށް އަދި ރާއްޖެއަށް ލިބޭނެ އެއްވެސް ގެއްލުމެއް ނެތްކަމަށެވެ.
Advertisement
This content is created and paid for by advertisers and does not involve Voice Journalists
