ޗާގޯސް އާއި ރާއްޖޭގެ އިން ވަކިކުރުމުގެ މައްސަލައިގައި ޗާގޯސް ރަށްތަކުގެ ސިޔާދަތީ ބާރުވެރިކަން މޮރިޝަސްއަށް ދިނުމަށް ސަރުކާރުން ނިންމެވި ނިންމެވުމާއި ގުޅިގެން ކަންބޮޑުވުން ފާޅުކޮށް، އިދިކޮޅު ކޯލިޝަނުން މަގުމަތީގައި އިހުތިޖާޖެއް ކުރަން ނިންމައިފި އެވެ.
ޕީޕީއެމްގެ ޔޫތު ވިންގުން މިއަދު ބޭއްވި ނޫސްވެރިންގެ ބައްދަލުވުމުގައި އެޕާޓީން ބުނީ ފޯޅަވަހީގެ މައްސަލާގައި ރާއްޖޭގެ ހައްގުގައި އަޑުއުފުލުމަށް މިރޭ 8:30 ގައި ޕީޕީއެމް އޮފީސް ހިމެނޭ ސަރަހައްދުގައި ސުލްހަވެރި އިހްތިޖާޖެއް ފެށުމަށް ނިންމާފައިވާ ވާހަކައެވެ.
އަދި އެ ހަރަކާތަކީ ޕީޕީއެމްގެ ޔޫތު ވިންގުގެ އިސްނެގުމުގެ މަތިން ކުރިއަށް ގެންދާ ހަރަކާތެއް ކަމަށާއި އެ އިހުތިޖާޖުގައި ފޯޅަވަހީގެ މައްސަލާގައި މިހާތަނަށް ސަރުކާރުން ކަން ކޮށްފައިވާ ގޮތްތަކާއި އެ މައްސަލާގައި ދިވެހިންގެ ޝުއޫރުތައް ހުރި ގޮތް ސަރުކާރަށް އިއްވާނެ ކަމަށެވެ.
ޗާގޯސް އާއި ރާއްޖޭގެ އިން ވަކިކުރުމުގެ މައްސަލައިގައި 2019 ވަނަ އަހަރު މި ސަރުކާރުން ވޯޓް ދިނީ މޮރިޝަސްއާ ދެކޮޅަށް އިނގިރޭސިވިލާތާއި އެއްކޮޅަށެވެ. އެހެން ނަމަވެސް، ޗާގޯސް ރަށްތަކުގެ ސިޔާދަތީ ބާރުވެރިކަން މޮރިޝަސްއަށް އޮތް ކަމަށް އެއްބަސްވެ މިދިޔަ އޮގަސްޓު މަހު ރައީސް ސޯލިހް މޮރިޝަސްގެ ރައީސްއަށް ސިޓީއެއް ވަނީ ފޮނުވާފައެވެ. ނަމަވެސް އެކަން ސަރުކާރުން ހާމަކުރީ އިން ވަކިކުރުމުގެ މައްސަލައިގެ ޝަރީއަތުގައި މީގެ ދެހަފްތާ ކުރިންނެވެ. ސަރުކާރުގެ މި ކުއްލި ނިންމުމާއި ގުޅިގެން ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ.
Advertisement
This content is created and paid for by advertisers and does not involve Voice Journalists
