އެއްޖިންސުން ޖިންސީ ގުޅުން ހިންގި މައްސަލައެއްގައި އިތުރު މީހެއްގެ މައްޗަށް މިއަދު ހުކުމް ކޮށްފިއެވެ. 

ކްރިމިނަލް ކޯޓުން މި މައްސަލާގައި ހުކުމް ކޮށްފައިވަނީ ދަފްތަރު ނަންބަރު ރސ 4549، މަޙްމޫދު ރިޔާޟް ނަމަކަށް ކިޔާ މީހެއްގެ މައްޗަށެވެ. އޭނާ އަކީ  ކަސްޓަމްސްގެ މުވައްޒަފެކެވެ. އޭނާ ހިމެނެނީ އެތައް ދިވެހިންނާއި އެކު އެއްޖިންސުން ގުޅުން ހިންގި ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގިރި އާއި އެކު އެއްޖިންސުން ގުޅުން ހިންގި މީހުންގެ ތެރޭގައެވެ. 

މަހްމޫދު ރިޔާޟުގެ މައްޗަށް ދައުލަތުން، އެއްޖިންސުން ޖިންސީ ގުޅުން ހިންގުމުގެ ދައުވާ އުފުލާފައިވަނީ ދިވެހިރާއްޖޭގެ ޤާނޫނުލްޢުޤޫބާތު ގެ 411 ވަނަ މާއްދާގެ (ހ) ގެ (2) ވަނަ ނަންބަރާ ޙަވާލާދީ، އެ މާއްދާގެ (ށ) ގެ (1) ވަނަ ނަންބަރުގެ ދަށުންނެވެ.

Advertisement

މަހްމޫދު ރިޔާޟުގެ މައްޗަށް ކްރިމިނަލް ކޯޓުން ކުރި ހުކުމުގައި ބުނީ،  އޭނާގެ މައްޗަށް ދައުލަތުން ދަޢުވާކުރި އެއްޖިންސުން ޖިންސީގުޅުން ހިންގުމުގެ ކުށުގެ ދަޢުވާއަށް މައްސަލައިގެ އިބްތިދާއީ އަޑުއެހުމުގަޔާއި އަވަސްނިޔާގެ އަޑުއެހުމުގައި ކުށަށް އިޢުތިރާފުވެފައިވާ ކަމަށެވެ. 

ވުމާއެކު ދިވެހިރާއްޖޭގެ ޤާނޫނުލްޢުޤޫބާތު ގެ 411 ވަނަ މާއްދާގެ (ހ) ގެ (2) ވަނަ ނަންބަރުގެ ދަށުން އެއްޖިންސުން ޖިންސީ ގުޅުން ހިންގުމުގެ ކުށުން މަޙްމޫދު ރިޔާޟް ކުށްވެރިވެއްޖެކަމަށް ކަނޑައަޅައި، މި ކުށުގެ ޢުޤޫބާތެއްގެ ގޮތުން، އެ ގާނޫނުގެ 411 ވަނަ މާއްދާގެ (ށ) ގެ (2) ވަނަ ނަންބަރާއި، އެ ޤާނޫނުގެ 1106 ވަނަ މާއްދާގެ (ށ) އާ ޙަވާލާދީ، އެ ޤާނޫނުގެ 1002 ވަނަ މާއްދާގެ (ހ) ގެ ދަށުން މަޙްމޫދު ރިޔާޟް 07 (ހަތެއް) މަހާއި 06 (ހައެއް) ދުވަހުގެ މުއްދަތަށް ޖަލަށްލުމަށް ޙުކުމްކޮށްފައިވާ ކަމަށެވެ. 

އެހެންނަމަވެސް ޖިނާއީ އިޖުރާއަތުގެ ޤާނޫނު ގެ 186 ވަނަ މާއްދާއަށް ރިޢާޔަތްކޮށް، މަޙްމޫދު ރިޔާޟް ތަންފީޒުކުރަންޖެހޭ ޖަލު އަދަބަކީ 06 (ހައެއް) މަހާއި 20 (ވިހި) މުއްދަތުގެ އަދަބެއް ކަމަށާއި، އަދި ޝަރީޢަތުން އަދަބު ކަނޑައެޅުމުގައި ޢަމަލުކުރާނެ ގޮތުގެ އުޞޫލު ގެ 37 ވަނަ މާއްދާއަށް ރިޢާޔަތްކޮށް، މި މުއްދަތުގެ ތެރެއިން 03 (ތިނެއް) މަހާއި 10 (ދިހައެއް) ދުވަހަކީ ޖަލު ޙުކުމެއްގެ ގޮތުގައި ތަންފީޒުކުރަންޖެހޭ މުއްދަތެއް ކަމަށާއި، ބާކީ 06 (ހައެއް) މަހާއި 20 (ވިހި) ދުވަހަކީ ގޭ ބަންދުގެ ޙުކުމެއްގެ ގޮތުގައި ތަންފީޒުކުރަންޖެހޭ މުއްދަތެއް ކަމުގައިވެސް ކްރިމިނަލް ކޯޓުން ވަނީ ކަނޑައަޅާފައެވެ. 

އެއްޖިންސުން ގުޅުން ހިންގުން ފަދަ ބޮޑެތި މައްސަލަ ތަކުގައި ކުށް ސާބިތުވާ މީހުންގެ އަދަބު ކުޑަ ކަމީ ގިނަ ރައްޔިތުން ކަންބޮޑުވުން ފާޅުކުރާ ކަމެކެވެ.