ސަރުކާރުގެ ޚަރަދުތައް ކުޑަނުކޮށް ދައުލަތަށް އާމްދަނީ ހޯދުމުގެ ބުރަ އުފުލަން ރައްޔިތުންނަށް ޖެއްސުމާއި ދެކޮޅުކަަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ. 

ޝިޔާމު މިފަދައިން ވިދާޅުވެފައިވަނީ ޓެކްސް ގާނޫނަށް ސަރުކާރުން ހުށައަޅާފައިވާ އިސްލާހަށް ފާޑުވިދާޅުވެ ކުރެއްވި ޓްވީޓެއްގައެވެ. 

ޝިޔާމު ވިދާޅުވި ގޮތުގައި ޓެކްސް ގާނޫނަށް ސަރުކާރުން ހުށައަޅާފައިވާ މައިގަނޑު ދެ އިސްލާހަކީ ޓީޖީއެސްޓީ %12 އިން %16 އަށް ބޮޑުކުރުމާ ޖީއެސްޓީ %6 އިން %8 އަށް ބޮޑުކުރުމެވެ. 

Advertisement

އެކަން އެގޮތަށް ހިމަނާފައިވާއިރު ދައުލަތަށް ލިބެން ޖެހޭ 16 ބިލިއަން ރުފިޔާ ހޯދުމަށް އެއްވެސް މަސައްކަތެއް ކޮށްފައި ނުވާކަން ޝިޔާމު ފާހަގަކުރެއްވިއެވެ. 

އަދި ވިދާޅުވީ ސަރުކާރުގެ ޚަރަދުތައް ކުޑަކޮށްފައި ނުވާއިރު، ނުވަތަ އެފަދަ ސިޔާސަތެއް ނުގެންގުޅުއްވާއިރު، ދައުލަތަށް އާމްދަނީ ހޯދުމަށް ރައްޔިތުންގެ އަތުން ޓެކްގް ނެގުމާއި އޭނާ ދެކޮޅުކަމަށެވެ. ސަރުކާރުގެ ޚަރަދުތައް ކުޑަނުކޮށް ދައުލަތަށް އާމްދަނީ ހޯދުމުގެ ބުރަ އުފުލަން ރައްޔިތުންނަށް ޖައްސައިގެން ނުވާނެކަމަށް ޝިޔާމު ވަނީ ވިދާޅުވެފައެވެ. 

އަންނަ އަހަރުގެ ޖެނުއަރީމަހުގެ އެކަކުން ފެށިގެން ރައްޔިތުންގެ އަތުން ނަގާ ޓެކްސް ބޮޑުކުރުމަށް ސަރުކާރުން މަޖިލީހަށް ބިލެއް ހުށައަޅާފައިވާއިރު، އެ ބިލާއި ގުޅިގެން ހޫނު ބަހުސެއް ވަނީ ފެށިފައެވެ. 

ޓެކްސް ބޮޑުކުރުމަކީ ސަރުކާރު ހިންގުމަށް ކޮންމެެހެން ބޭނުން ކަމެއްކަމަށް ބިލަށް ތާއީދުކުރާ މެމްބަރުން ބުނަމުންދާއިރު، ރައްޔިތުންގެ އަތުން ޓެކްސް ބޮޑު ނުކޮށް އެ ޚަރަދުތައް ފޫބެއްދޭނެ ގޮތެއް ނެތީތޯ ބައެއް މެމްބަރުން ގެންދަވަނީ ސުވާލު އުފައްދަވަމުންނެވެ. 

ސަރުކާރުގެ ޚަރަދުތައް ކުޑަނުކޮށް ރައްޔިތުންގެ އަތުން ނަގާ ޓެކްސް ބޮޑުކުރުމަކީ ކޮށްގެންވާނެ ކަމެއް ނޫންކަމަށް ބިލާއި ދެކޮޅަށް ބަހުސްކުރާ ގިނަ މެމްބަރުން ފާހަގަކުރައްވައެވެ.