ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު އައްޑޫ ސިޓީގެ ހުރިހާ ރަށަކަށް ވަޑައިގަންނަވަން ނިންމާފައިވާކަން އިދިކޮޅުން އިއުލާނުކޮށްފިއެވެ. 

ރައީސް ޔާމީންގެ ކުރައްވަން ނިންމާފައިވާ ދަތުރުފުޅުތަކާއި ގުޅޭގޮތުން މައުލޫމާތު ދެއްވުމަށް އިދިކޮޅުން ބޭއްވި ނޫސްވެރިންގެ ބައްދަލުވުމުގައި އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ ނ އަތޮޅަށް ކުރެއްވި ދަތުރުފުޅަށްފަހު ރައީސް ޔާމީން އައްޑޫ ސިޓީގެ ހުރިހާ ރަށަކަށް ދަތުރުފުޅު ކުރައްވަން ނިންމަވާފައިވާކަމަށެވެ. 

އެގޮތުން މި މަހުގެ 6 އިން 9 އަކަށް އެމަނިކުފާނު އައްޑޫ ސިޓީއަށް ވަޑައިގަންނަވަން ނިންމާފައިވާކަމަށް ހީނާ ވިދާޅުވިއެވެ. އަދި މި ދަތުރުފުޅުގައި އެ ސިޓީގެ ހުރިހާ ރަށަކަށް އެމަނިކުފާނު ވަޑައިގަންނަވާނެކަމަށް ހީނާ ވިދާޅުވިއެވެ. 

Advertisement

ރައީސް ޔާމީން އައްޑޫ ސިޓީއަށް ކުރައްވާ މި ދަތުރުފުޅުގައި އައްޑޫ ސިޓީގެ ރައްޔިތުންނާއި ބައްދަލުކުރައްވާނެއެވެ. އަދި ރަށްރަށުގައި އޮތް ޕީޕީއެމްގެ ސްޓިއަރިން ކޮމެޓީތަކާއި، ކައުންސިލްތަކާއިވެސް ބައްދަލުކުރެއްވުމަށް ވަނީ ނިންމަވާފައެވެ. 

ރައީސް ޔާމީން އައްޑޫ ސިޓީއަށް ކުރައްވާ މި ފަތުރުފުޅަކީ ޕީޕީއެމްގެ ރިޔާސީ ޓިކެޓު ލިބިވަޑައިގެންނެވުމަށްފަހު އަތޮޅުތެރެއަށް ކުރައްވާ 4ވަނަ ދަތުރުފުޅެވެ. 

އިދިކޮޅު ތަރުޖަމާނު ހީނާ ވަލީދު ނޫސްވެރިންނަށް މައުލޫމާތު ދެއްވަނީ 

އެމަނިކުފާނު އަތޮޅުތެރެއަށް ކުރައްވާ ދަތުރުފުޅުތަކުގެ މައިގަނޑު މަގްސަދަކީ ރައްޔިތުންގެ ހާލު ބެއްލެވުމާއި، ރައްޔިތުންނަށް ބޭނުން ޖެހިފައިވާ ކަންކަން ބައްލަވާލެއްވުމެވެ. އޭގެ އިތުރުން ކުރިއަށް އޮތް ރިޔާސީ އިންތިޚާބަށް ޕީޕީއެމުން ތައްޔާރުކުރާ މެނިފެސްޓޯއަށް މައުލޫމާތު އެއްކުރުމާއި ރައްޔިތުންގެ ޚިޔާލު ހޯއްދެވުމަކީވެސް އެމަނިކުފާނުގެ ދަތުރުފުޅުގަކުގެ މަގްސަދުތަކުގެ ތެރޭގައި ހިމެނޭ މުހިންމު ކަންކަމެވެ. 

ނޮވެމްބަރު މަހު ރައީސް ޔާމީންގެ އިތުރު ދަތުރުފުޅުތަކެއްވެސް ރޭވިފައިވާކަމަށް އިދިކޮޅުން ވަނީ އިއުލާނުކޮށްފައެވެ. 

އެގޮތުން ފުވައްމުލަކާއި ގދ އަތޮޅަށްވެސް އެމަނިކުފާނު ވަޑައިގެންނެވުމަށް ވަނީ ނިންމަވާފައެވެ. އެހެން ނަމަވެސް އެ އަތޮޅުތަކަށް އެމަނިކުފާނު ވަޑައިގަންނަވާނެ ސީދާ ތާރީހެއް އިދިކޮޅުން އަދި ހާމަކޮށްފައެއް ނުވެއެވެ.