ސަރުކާރު ހިންގާ މައި ޕާޓީ އެމްޑީޕީގެ ތެރޭގައި ސަރުކާރާއި ވާދަވެރި ޕީޕީއެމްގެ ފެކްޝަނެއް އުފެދިފައިވާކަމަށާއި، އެ ފެކްޝަނުން ޕީޕީއެމާއި ގުޅިގެން މަޖިލީހުގައި މަސައްކަތް ކުރަމުންދާކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒޭނާ އާދަމް ވިދާޅުވުމުން އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ރައްދު ދެއްވައިފިއެވެ.
އެމްޑީޕީގެ ތެރޭގައި ފެކްޝަންތަކެއް އުފެދިފައިވާކަމަށާއި، ސަރުކާރުގެ ވާދަވެރިންނާއި ގުޅިގެން އެމްޑީޕީގެ ބައެއް މަޖިލިސް މެމްބަރުން މަސައްކަތް ކުރައްވަމުންދާކަމަށް ރޮޒޭނާ ވަނީ ތުހުމަތުކުރައްވާފައެވެ. އަދި ޕީޕީއެމްގެ މެމްބަރުން މެދުވެރިކޮށް ސަރުކާރާއި ދެކޮޅަށް އިސްލާހުތައް ހުށައަޅަމުންދާކަމަށާއި، އެކަން އިއްޔެގެ މަޖިލިސް ބަލާލި ކޮންމެ މީހަކަށްވެސް ހާމަވާނެކަމަށް ރޮޒޭނާ ވިދާޅުވިއެވެ.
އައްޑޫ މީދޫ ދާއިރާގެ މެމްބަރު ރޮޒޭނާ އާދަމް
"އެމްޑީޕީގައި ޕީޕީއެމް ފެކްޝަނެއް އެބައޮތްކަމާ އެފެކްޝަނުން މަޖިލިސްތެރޭ ޕީޕީއެމް އާ އެކު މަސައްކަތް ކުރާކަން މީ މިހާރު ފޮރުވެން އޮތް ކަމެއްނޫން. ޕީޕީއެމް މެމްބަރުންލައްވާ ސަރުކާރާ ދެކޮޅަށް އިސްލާހުތަށް ހުށައަޅުއްވަނީ ކޮންބޭފުޅެއްކަން އިއްޔެގެ މަޖިލިސް ބަލާލިމީހަކަށްވެސް ސާފުވާނެ"
އައްޑޫ މީދޫ ދާއިރާގެ މެމްބަރު ރޮޒޭނާ އާދަމް
ރޮޒޭނާގެ މި ތުހުމަތުތަކަށް ވައްޑެ ވަނީ ޓްވީޓާގައި ރައްދުދެއްވާފައެވެ. އަދި ހޫނު ބަހުގެ ހަމަލާތަކެއްވެސް ރޮޒޭނާއަށް ރައްދުކުރައްވާފައެވެ.
އެގޮތުން ވައްޑެ ވިދާޅުވީ އެމްޑީޕީގެ ތެރޭގައި ފެކްޝަނެއް އުފެދިފައި ނުވާކަމަށެވެ. އެ ޕާޓީއަށް ޖެހިފައި އޮތީ 2013 ވަނަ އަހަރުގެ ރިޔާސީ އިންތިޚާބުގެ ބަހު ބުރުގައި ލައިގަތް މުސީބާތެއްކަމަށް ވައްޑެ ވިދާޅުވިއެވެ. ވައްޑެ ވަނީ އޭނާގެ ޓްވީޓުގައި ރޮޒޭނާ އެމްޑީޕީއަށް ސޮއި ކުރެއްވި އިރު ނަންގަވާފައިވާ ފޮޓޯއެއްވެސް ޓްވީޓާގައި ހިއްސާކުރައްވާފައެވެ.
އެއާއެކު އޭނާ ވިދާޅުވީ އޭރުވެސް އެމްޑީޕީގެ ބައެއް މެމްބަރުން އެކަމާއި ކަންބޮޑުވުން ފާޅުކޮށްފައިވާަކަމަށެވެ. އަދި ރޮޒޭނާ ޕާޓީއާ ގުޅުމުން ޕާޓީގެ ދުވަސް ދިޔައީކަމަށް ބައެއް ފަރާތްތައް ބުނެފައިވާކަމަށް ވައްޑެ ވިދާޅުވިއެވެ.
ރޮޒޭނާ އެމްޑީޕީއާއި ގުޅިވަޑައިގަތުމަށް ސޮއިކުރައްވަނީ
"ފެކްޝަނެއް ނޫން ކުޑަވަރެއްގެ މުސީބާތެއް އޮތީ. އެ މުސީބާތް އެމްޑީޕީތެރެއަށް ލައިގަތީ 2013 ރިޔާސީ އިންތިޚާބު ފަހުބުރު. އޭރުވެސް މިޕާޓީ ބައެއް މެމްބަރުން ކިޔާތީ އެހިން މިޕާޓީގެ ދުވަސް ދުއްވާލާނޭ"
އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ)
އެމްޑީޕީގެ ތެރޭގއި އެއް މެމްބަރަކު އަނެއް މެމްބަރަކަށް ބަހުގެ ހަމާލައް ބަދަލުކުރަން ފަށާފއިވަނީ މި ފަހުން ސަރުކާރުން ހުށައެޅި ބައެއް ބިލްތަކާއި ގުޅިގެން އުފެދުނު ޚިޔާލު ތަފާތުންތަކެއްގެ ތެރެއިންނެވެ.
އެގޮތުން އަންނަ އަހަރުގެ ޖެނުއަރީ މަހުން ފެށިގެން ރައްޔިތުން އަތުން ނަގާ ޓެކްސް ބޮޑުކުރުމށް މަޖިލީހަށް ހުށައެޅި ބިލާއި ގުޅިގެން އެމްޑީޕީގެ ބައެއް މެމްބަރުންގެ ނުރުހުން ވަނީ ސަރުކާރަށް އަމާޒުކުރައްވާފައެވެ. އަދި އެ ބިލާއި އެއްގޮތަށް ވޯޓު ދިނުމަށް އެމްޑީޕީއިން ވިޕްލައިން ނެރެފައި ވީނަމަވެސް، ކޮމެޓީ މަރުހަލާގައި އެމްޑީޕީގެ ބައެއް މެމްބަރުން ވިޕްލައިނާއި އެއްގޮތަށް ވޯޓު ދީފައެއް ނުވެއެވެ.
އެކަމާއި ގުޅިގެން އެ މެމްބަރުންނަކީ ވާދަވެރި ސިޔާސީ ޕާޓީއާއި ގުޅުން އޮންނަ ފަރާތްތަކުގެ ގޮތުގައި ސަރުކާރު ފާޅީގައި ތިއްބެވި ބައެއް މެމްބަރުން ގެންދަވަނީ ތުހުމަތު ކުރައްވަމުންނެވެ.
Advertisement
This content is created and paid for by advertisers and does not involve Voice Journalists
