ދިވެހިރާއްޖޭގައި މާދަމާ ފާހަގަކުރާ ނަސްރު ދުވަހާއި ގުޅިގެން އިހުތިޖާޖަށް ނުކުންނަން ނިންމާފައިވާ ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ބުނެފިއެވެ.
އިދިކޮޅު ހަރަކާތު ކޮމިޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޮމިޓީގެ ރައީސް މުހައްމަދު އިސްމާއިލް ވިދާޅުވީ، މާދަމާ ހަވީރު 4:00 ގައި މަސްމާރުކޭޓު ސަރަހައްދުގައި އިދިކޮޅުން އިހްތިޖާޖު ކުރުމަށް ނިންމާފައިވާ ކަމަށެވެ.
އަދި އިދިކޮޅުން މި ބާއްވާ ހަރަކާތަކީ މި ސަރުކަާރުން ނަސްރުގެ ދުވަސް ފާހަގަކުރުމަށް އެއްވެސް މަސައްކަތެއް ނުކުރާތީ، އެދުވަހު ދިވެހިންގެ ހައްގުގައި ދުނިޔެ ދޫކުރި 19 ޝަހީދުންގެ ޒިކުރާ އައު ކުރުމުގެ ގޮތުން ބާއްވާ އިހުތިޖާޖެއް ކަމަށްވެސް މުހައްމަދު އިސްމާއިލް ވިދާޅުވިއެވެ.
"ދިވެހިރާއްޖެ އިން 3 ނޮވެމްބަރު 1988 އިން ފެށިގެން މިއަދާއި ހަމައަށް އެދުވަސް ފާހަގަކުރަމުން އައިސް މި ސަރުކާރު އައި ފަހުން އެކަންކަން ނުކޮށް އެއީ ނުވާ ކަމެއް ކަމަށް ހަދާ، އެކަންކަން ވަޅުޖައްސާލަން އުޅޭ އުޅުމާ ދެކޮޅަށް އަޅުގަނޑުމެން ސުލްހަވެރިކަމާއެކު އިހްތިޖާޖެއް ކުރުމަށްޓަކައި މަސް މާރުކޭޓް ސަރަހަށްދަށް އަޅުގަނޑުމެން ނޮވެމްބަރު 3 ގައި 4:00 ގައި އެއްވާ ވާހަކަ އިއުލާން ކޮށްލުމަށްޓަކައި މި ފެށީ."
މުހައްމަދު އިސްމާއިލް
މުހައްމަދު އިސްމާއިލް ވިދާޅުވީ، އިދިކޮޅުން ކުރަމުން މިދާ މަސައްކަތް ތަކަކީ ދިވެހިރާއްޖޭގެ ގެއްލެމުންދާ އަސާސްތައް ނަގަހައްޓައި ދެމެހެއްޓުމަށްޓަކައި ކުރާ އިޚްލާޞްތެރި މަސައްކަތްތަކެއް ކަމަށެވެ.
ނޮވެމްބަރު 3 ގައި 19 ދިވެހިންގެ ލޭ މާލޭގެ ބިންމައްޗަށް އަޅާލިއިރު މުޅި ދިވެހިރާއްޖެ އޮތީ ރޯން ކަން ފާހަގަކޮށް މުހައްމަދު އިސްމާއިލް އިތުރަށް ވިދާޅުވީ، 18 ގަޑި އިރު ވަންދެން މުޅި ދިވެހިރާއްޖޭގެ ރާއްޖޭގެ ރައްޔިތުން ތިބީ އަނދިކަމުގެ ތެރޭގައި ކަމަށެވެ. އެހާ އިރުވަންދެން ރާއްޖޭގެ ވެރިކަމުގެ ނިޒާމް އޮތީ ކާކު އަތުގައި ކިހިނެއް ކަމެއްވެސް ދިވެހިންނަށް ނޭނގޭ ކަމަށް އޭނާ ވިދާޅުވިއެވެ.
ނޮވެމްބަރު 3 ވަނަ ދުވަހުގެ ޒިކުރާ އައު ކުރަންޖެހެނީ އެދުވަހުގެ ކަންކަން ފެށިގެން ދިޔައީ މިއަދުގެ މި ސަރުކާރުގައި އިސް މަގާމުގައި ތިއްބެވި ބޭބޭފުޅުންގެ ޢާއިލާތަކުން ކަން އެންމެނަށްވެސް އެންގުމަށްޓަކައި ކަމަށް ވެސް މުހައްމަދު އިސްމާއިލް ވިދާޅުވިއެވެ. އަދި މިއަދު އެކަންކަން ހަނދާންނުކޮށް ދޫކޮށްލައިފިނަމަ ދިވެހިންގެ އަސާސްތައް ގެއްލިގެންދާނެ ކަމަށާ ވުމާއެކު އެދުވަހު ދިވެހިންނަށް ޓަކައި ޝަހީދުވު އަބުތާލުންގެ ޒިކުރާ އައު ކުރަންޖެހޭ ކަމަށް އޭނާ ވިދާޅުވިއެވެ.
މުހައްމަދު އިސްމާއިލް އިތުރަށް ވިދާޅުވީ އިދިކޮޅުން މިކުރާ މަސައްކަތަކީ ގައުމީ މަސައްކަތެއް ކަމަށާ، އެހެން ކަމުން އެ ކޯލިޝަނުން އެދެނީ މާދަމާ އޮންނަ ހަރަކާތުގައި މާލެ، ހުޅުމާލެ، ވިލިމާލެ އަދި މާލެ ކައިރީ ރަށްރަށުގައި ދިރިއުޅެމުންދާ މީހުންވެސް ބައިވެރިވުން ކަމަށެވެ.
Advertisement
This content is created and paid for by advertisers and does not involve Voice Journalists
