ބަރުދަން ލުއިކުރާ ކަމަށް ބުނެ ރާއްޖޭގައި ވިއްކުން މަން ޕްރޮޑަކްޓެއް ސޯޝަލް މީޑިއާ މެދުވެރިކޮށް ވިއްކަމުންދާތީ ސަމާލުވުމަށް އެދިއްޖެއެވެ. 

މޯލްޑިވްސް ފުޑް އެންޑް ޑްރަގް އޮތޯރިޓީން ނެރުނު ބަޔާނެއްގައި ބުނީ، ބަރުދަން ލުއި ކުރާ ކަމަށްބުނެ ވިއްކަމުންގެންދާ ޖަމޫ ސުރުތު އާޔޫ (Jamu Surut ayu) ގައި ޑޮކްޓަރީބޭސް، ލައިޑުކެއިން (Lidocaine) އަދި ސުބްޔޫޓްރަމަން (Sibutramine) ހިމެނޭ ކަމަށް ދުނިޔޭގެ ގައުމުތަކުން ކޮށްފައިވާ ލެބޯޓްރީ ތަހުލީލުތަކުން ދައްކާ ކަމަށެވެ. އަދި މިސަބަބާއި ހުރެ، މި ޕްރޮޑަކްޓް ދުނިޔޭގެ ގައުމުތަކުގައި މަނާކޮށްފައިވާ ކަމަށްވެސް އެ އޮތޯރިޓީން ފާހަގަކޮށްފައިވެއެވެ. 

%100 ގުދުރަތީ މާއްދާތަކުން އުފައްދާފައިވާ ހާބަލް ޕްރޮޑަކްޓެއްގެ ގޮތުގައި އިޝްތިހާރުކޮށްފައިވާ އެ އުފެއްދުމުގައި ހިމެނޭ ލައިޑުކެއިން އަކީ އައްސި ކުރުމަށް ބޭނުންކުރާ ބޭހަކަށްވާއިރު މި ބޭސް ކެއުމުގެ ސަބަބުން އިންސާނެއްގެ ހަށިގަނޑަށް ކޮށްފާނެ ނުރައްކާތެރި އަސަރުތައް އަދި މިހާތަނަށް އަން ތާޒާ ކުރެވިފައިވެސް ނުވާ ކަމަށާ، މީގެ އިތުރުން ސުބްޔޫޓްރަމަން އަކީ އޭގައި ހިމެނޭ ނުރައްކާތެރި ސައިޑް އިފެކްޓްތަކުގެ ސަބަބުން ގިނަ ގައުމުތަކުގައި މަނާކޮށްފައިވާ ބޭހެއް ކަމަށްވެސް އެ އޮތޯރިޓީން ބުނެއެވެ. އަދި އެ ބޭހުގައި ހިމެނޭ ސައިޑް އިފެކްޓްތަކުގެ ތެރޭގައި ފުރަމޭ ހަލާކުވުން، ހާޓްއެޓޭކް އަދި ސްޓްރޯކް ޖެހުން ހިމެނޭ ކަމަށްވެސް ހާމަކޮށްފައިވެއެވެ. 

ވީމާ މިޕްރޮޑަކްޓް (Ayu Surut Jamu) ރާއްޖެ އެތެރެކުރުމާއި، ވިއްކުމާއި، އަދި ބޭނުން ކުރުމަކީ މަނާކަމެއްކަމަށާ، ރައްކާތެރިކަމުގެ ފިޔަވަޅެއްގެ ގޮތުން އިންޓަނެޓް އަދި އެނޫންވެސް ގޮތްގޮތުން މިފަދަ އުފެއްދުންތައް ގަންނައިރު، ފުރިހަމަ މައުލޫމާތު ހޯދުމަށާއި މިފަދަ "ހެލްތް ފްރޯޑް" ތަކަށް އާއްމު ރައްޔިތުން ސަމާލުވުމަށްވެސް އެ އޮތޯރިޓީން ވަނީ އެދިފައެވެ.

މިކަމާއި ގުޅޭ އިތުރު މައުލޫމާތު ބޭނުންނަމަ އެ އޮތޯރިޓީގެ ހޮޓްލައިން ނަންބަރު 7200321 ފޯނަށް ގުޅުމަށްވެސް އެ އޮތޯރިޓީން އެދުފައިވެއެވެ.