ނަސްރުގެ ދުވަހާއި ގުޅިގެން އިދިކޮޅުން ކުރާ އިހްތިޖާޖު ފަށައިފިއެވެ. 

މާލޭގެ މަސް މާރުކޭޓް ސަރަހައްދުގައި ފެށި މި އިހްތިޖާޖުގެ ތެރެއިން އިދިކޮޅުން ވަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ކަން ހިނގައިދިޔަ ގޮތުގެ ކުޑަ  ޑެމޮންސްޓްރޭޝަނެއް ދައްކާލާފައެވެ. އެގޮތުން އެދުވަހު ގައުމަށް ޣައްދާރުވި މީހުންގެ ފޮޓޯ ހިމެނޭ މާސްކު ބޮލުގައި އަޅުވައި އެމީހުންގެ ނަން ހިމެނޭ ބޯޑެއް ކަރުގައި އަޅުވައިގެން، އެމީހުން ހައްޔަރު ކޮށް ބިޑި އަޅުވައިގެން ގެންދިޔަ ގޮތް ދައްކުވައިދީފައިވެއެވެ. 

މީގެ އިތުރުންވެސް މިއަދާއި ގުޅޭ ތަފާތު އެކި ޝުއޫރުތައް އިދިކޮޅުގެ މުޒާހަރާގެ ތެރެއިން ބައިވެރިން އަންނަނީ ފައުޅުކުރަމުންނެވެ. 

އިދިކޮޅުން ކުރިއަށް ގެންދާ މުޒާހަރާގެ ތެރެއިން-- ފޮޓޯ: ޕީޕީއެމް

އިދިކޮޅުން ކުރިއަށް ގެންދާ މި ހަރަކާތާއި ގުޅޭގޮތުން މައުލޫމާތު ދެއްވަމުން ޕީޕީއެމްގެ ހަރަކާތު ކޮމިޓީގެ ރައީސް މުހައްމަދު އިސްމާއިލް އިއްޔެ ވިދާޅުވީ އެ ހަރަކާތަކީ މި ސަރުކަާރުން ނަސްރުގެ ދުވަސް ފާހަގަކުރުމަށް އެއްވެސް މަސައްކަތެއް ނުކުރާތީ، އެދުވަހު ދިވެހިންގެ ހައްގުގައި ދުނިޔެ ދޫކުރި 19 ޝަހީދުންގެ ޒިކުރާ އައު ކުރުމުގެ ގޮތުން ބާއްވާ އިހުތިޖާޖެއް ކަމަށެވެ.  

މުހައްމަދު އިސްމާއިލް ވިދާޅުވީ، އިދިކޮޅުން ކުރަމުން މިދާ މަސައްކަތް ތަކަކީ ދިވެހިރާއްޖޭގެ ގެއްލެމުންދާ އަސާސްތައް ނަގަހައްޓައި ދެމެހެއްޓުމަށްޓަކައި ކުރާ އިޚްލާޞްތެރި މަސައްކަތްތަކެއް ކަމަށެވެ. 

އަދި ނޮވެމްބަރު 3 ވަނަ ދުވަހުގެ ޒިކުރާ އައު ކުރަންޖެހެނީ އެދުވަހުގެ ކަންކަން ފެށިގެން ދިޔައީ މިއަދުގެ މި ސަރުކާރުގައި އިސް މަގާމުގައި ތިއްބެވި ބޭބޭފުޅުންގެ ޢާއިލާތަކުން ކަން އެންމެނަށްވެސް އެންގުމަށްޓަކައި ކަމަށް ވެސް މުހައްމަދު އިސްމާއިލް ވިދާޅުވިއެވެ. އަދި މިއަދު އެކަންކަން ހަނދާންނުކޮށް ދޫކޮށްލައިފިނަމަ ދިވެހިންގެ އަސާސްތައް ގެއްލިގެންދާނެ ކަމަށާ ވުމާއެކު އެދުވަހު ދިވެހިންނަށް ޓަކައި ޝަހީދުވު އަބުތާލުންގެ ޒިކުރާ އައު ކުރަންޖެހޭ ކަމަށް އޭނާ ވިދާޅުވިއެވެ.