އެތެރޭގެ އިންތިޚާބާއި ގުޅިގެން ޕީޕީއެމްގެ ސުލްހައަށް ބުރޫއަރާނެ އެއްވެސް ކަމެއް ވިޔަ ނުދިނުމަށް ޕީޕީއެމްގެ ރައީސް ޔާމީން އަބްދުލްގައްޔޫމު އިލްތިމާސް ކުރައްވައިފިއެވެ. 

އެމަނިކުފާނު މިފަދައިން އިލްތިމާސް ކުރައްވާފައިވަނީ ދާއިރާ ރައީސުން ހޮވުމަށް ކުރިއަށް ގެންދާ އިންތިޚާބުގެ އިންތިޒާމުތައް ބައްލަވާލެއްވުމަށް ހެންވޭރު ދަނޑަށް ޒިޔާރަތްކުރެއްވުމަށްފަހު ނޫސްވެރިންނަށް ދެއްވި ބަސްދީގަތުމެއްގައެވެ. 

އެގޮތުން ނޫސްވެރިއަކު ކުރި ސުވާލަށް ޖަވާބުދެއްވަމުން ރައީސް ޔާމީން ވިދާޅުވީ ދާއިރާ ރައީސުން ހޮވުމަށް މި ބާއްވާ އިންތިޚާބަކީ 2023 ވަނަ އަހަރުގެ ރިޔާސީ އިންތިޚާބުގެ ކުރިން ބޭއްވޭ މުހިންމު ބޮޑު އިންތިޚާބެއްކަމަށެވެ. 

Advertisement

މި އިންތިޚާބުގެ ވާދަވެރިކަމާއި، ކެންޑިޑޭޓުންގެ މެދުގައި އޮތް ޝައުގުވެރިކަން ވަރަށް ބޮޑަށް ފެންނަމުންދާކަމަށް ރައީސް ޔާމީން ވިދާޅުވިއެވެ. 

އެއާއެކު އެމަނިކުފާނު ވިދާޅުވީ ވާދަވެރިކަމާއެކު މި އިންތިޚާބު ކުރިއަށް ގެންދިޔަ ނަމަވެސް، އަދި ނަތީޖާތައް ކޮންމެ ގޮތަކަށް ނިކުތް ނަމަވެސް، ޕާޓީގެ އެތެރޭގައި ބައިބައިވުމެއް އުފެދޭގޮތަށް ނުވަތަ ޕީޕީއެމްގެ ސުލްހައަށް ބުރޫއަރާގޮތަށް އެއްވެސް ބޭފުޅަކު އެއްވެސް ކަމެއް ނުކުރެއްވުމަށް ރައީސް ޔާމީން ވަނީ އިލްތިމާސްކުރައްވާފައެވެ. 

މި އިންތިޚާބަކީ ރިޔާސީ އިންތިޚާބު ކާމިޔާބުކުރުމަށް ކުރެވޭ މަސައްކަތެއްކަމަށާއި، ރިޔާސީ އިންތިޚާބަކީ ގައުމުގެ މިނިވަންކަމާއި ގުޅުންހުރި މަސައްކަތަކަށްވާތީ، އެ ފިކުރު އިސްކުރުމަށްވެސް އެމަނިކުފާނު ވަނީ އިލްތިމާސްކުރައްވާފައެވެ.