ދާއިރާ ރައީސުން ހޮވުމަށް އިދިކޮޅުން ކުރިއަށް ގެންދާ އިންތިޚާބުގައި 90 އިންސައްތަ މީހުން ވޯޓުލައިފިކަމަށް ޕީޕީއެމްގެ ރަޖިސްޓްރާ ހަމްދާން ނާސިރު ވިދާޅުވެއްޖެއެވެ. 

އިންތިޚާބާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން ހަމްދާނު ވިދާޅުވީ ދާއިރާ ރައީސުންގެ އިންތިޚާބުގެ ވޯޓުލުން މާލެއާއި އަތޮޅުތެރޭގައިވެސް ކުރިއަށް ދާކަމަށެވެ. 

މިއަދު ހެނދުނު 10:00 އިން ފެށިގެން ވޯޓުލުން ކުރިއަށްދާއިރު މިހާތަނަށް އިންތިޚާބުގައި ވޯޓުލެވޭ 90 އިންސައްތަ މީހުން ވޯޓުލާފައިވާކަމަށް ހަމްދާނު ވިދާޅުވިއެވެ. 

Advertisement

އިންތިޚާބު ކުރިއަށް ދިޔަ ވަގުތު ކޮންމެވެސް ވަރެއްގެ މައްސަލަތައް ދިމާވި ނަމަވެސް، ވަރަށް އަވަހަށް އެކަންކަން ހައްލު ކުރެވި އެއްވެސް ކަހަލަ ހަމަނުޖެހުމަކާއި ނުލާ ވޯޓުލުމުގެ ކަންކަން ކުރިއަށް ދާކަންވެސް އޭނާ ފާހަގަކުރެއްވިއެވެ. 

މި އިންތިޚާބުގެ ވޯޓު ފޮށިތައް 5:00 ގައި ބަންދުކުރުމަށް ނިންމާފައިވާކަމަށާއި، އެހެން ނަމަވެސް އޭގެ ކުރިން ވޯޓުލުމަށް ކިއުތަކުގައި ތިއްބެވި ފަރާތްތަކަށް އެ ފުރުސަތު ލިބިގެންދާނެކަމަށް ހަމްދާނު ވިދާޅުވިއެވެ. 

ދާއިރާ ރައީސުން ހޮވުމަށް ޕީޕީއެމުން މިއަދު ކުރިއަށް ގެންދާ އިންތިޚާބުގެ އިންތިޒާމުތައް ބައްލަވާލެއްވުމަށް ޕީޕީއެމްގެ ރައީސް އަބްދުﷲ ޔާމީން އަބްދުލްގައްޔޫމުވެސް ވަނީ މާލޭގައި ވޯޓުލުން ކުރިއަށް ގެންދާ ހެންވޭރު ދަނޑަށް ވަޑައިގެންފައެވެ. 

ހަމްދާނުގެ ވާހަކައިގައިވެސް އެކަން ފާހަގަކުރެއްވިއެވެ. އަދި ރައީސް ޔާމީންއަށް ޝުކުރު އަދާކުރެއްވިއެވެ. 

އެއާއެކު ހަމްދާނު ވިދާޅުވީ ދާއިރާ ރައީސުން ހޮވުމަށް ބޭއްވި އިންތިޚާބަށް އާންމުންގެ ބޮޑު ތަރުހީބެއް ލިބިގެން ގޮސްފައިވާކަމަށެވެ. އަދި އެކަމަޓަކައި ޕީޕީއެމްގެ އާންމު މެމްބަރުންނަށްވެސް ޝުކުރު އަދާކުރާކަމަށް ހަމދާނު ވަނީ ވިދާޅުވެފައެވެ.