މިއަދު ދެ ރަށެއްގައި ކުރިއަށް ގެންދިޔަ ބައި-އިލެކްޝަންގެ ދެ ގޮނޑި ޕީޕީއެމް ކާމިޔާބުކޮށްފިއެވެ. 

މިއަދު ކުރިއަށް ގެންގޮސްފައިވަނީ ނ. މަގޫދޫ ކައުންސިލްގެ އަންހެން މެންބަރު އިންތިޚާބު ކުރުމަށް ބާއްވާ ބައި- އިލެކްޝަނާއި، ލ. ކަލައިދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންއެވެ. 

މި ދެ އިންތިޚާބުވެސް ކާމިޔާބުކޮށްފައިވަނީ ޕީޕިއެމްގެ ކެންޑިޑޭޓުންނެވެ. 

Advertisement

އެގޮތުން އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ގޮނޑިއަށް ޕީޕީއެމްގެ ފަރާތުން ވާދަކުރި ކެންޑިޑޭޓަށް 197 ވޯޓު ލިބިފައިވާއިރު، އެ އިންތިޚާބުގައި ވާދަކުރި އެމްޑީޕީގެ ކެންޑިޑޭޓަށް ލިބުނީ 192 ވޯޓެވެ. 

އޭގެ އިތުރުން ނ މަގޫދޫ ކައުންސިލްގެ އަންހެނުންނަށް ޚާއްސަ ގޮނޑިއަށް ވާދަކުރި ޕީޕީއެމްގެ ކެންޑިޑޭޓަށް 124 ވޯޓު ލިބިފައިވާއިރު، އެ އިންތިޚާބުގައި ވާދަކުރި އެމްޑީޕީގެ ކެންޑިޑޭޓަށް ލިބުނީ 115 ވޯޓެވެ. 

ޕީޕީއެމްއަށް މިއަދު ކުރިއަށް ގެންދިޔަ ބައި-އިލެކްޝަންގައި ލިބުނު ކާމިޔާއާއި ގުޅިގެން އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، އެ ނަތީޖާއިން އެނގިގެން ދިޔައީ ރައީސް ޔާމީންއަށް އޮތް ތާއީދު އިތުރުވަމުން އަންނަ މިންވަރުކަމަށެވެ.

އަދި މި ސަރުކާރަށް ރައްޔިތުން ނޫނެކޭ ބުނާކަން ބައި-އިލެކްޝަންތަކުގެ ނަތީޖާއިން އެނގިގެންދާކަމަށް ހީނާ ވިދާޅުވިއެވެ. 

ހީނާ ވަނީ އިންތިޚާބު ޕީޕީއެމަށް ކާމިޔާބުކޮށްދިނުމަށް މަސައްކަތްކޮށްދެއްވި ހުރިހާ ފަރާތްތަކަށް ޝުކުރުވެސް އަދާކުރައްވާފައެވެ.