ދާއިރާ ރައީސުން ހޮވުމަށް ޕީޕީއެމުން ބޭއްވި އިންތިޚާބުގައި ވިލިމާލޭ ދާއިރާގެ ރައީސްކަމަށް މުހައްމަދު އިސްމާއިލް ހޮވިއްޖެއެވެ. 

މި އިންތިޚާބުގައި މުހައްމަދު އިސްމާއިލް އާއި ވާދަކޮށް ބަލިވެފައިވަނީ ރޭނިސް ސަލީމްއެވެ.

މުހައްމަދު އިސްމާއިލް ވިލިމާލޭގެ ދާއިރާ ރައީސްކަމުގެ ގޮނޑި ކާމިޔާބުކުރައްވާފައިވާއިރު އޭނާ އަކީ އިދިކޮޅުގެ އެކްޝަން ޑިޕާޓުމަންޓުގެ ޗެއަރކަމުގެ މަގާމުވެސް ކުރައްވަމުން ގެންދަވާ ބޭފުޅާކަން ފާހަގަކޮށްލެވެއެވެ. އޭގެ އިތުރުން މުހައްމަދު އިސްމާއިލް އަކީ ހޯރަފުށީ ދާއިރާގެ މެމްބަރުކަންވެސް މީގެ ކުރިން ކުރައްވާފައިވާ ބޭފުޅެކެވެ. 

Advertisement

ޕީޕީއެމުން ބުނީ ދާއިރާ ރައީސުންނަކީ ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބުގައި ޕީޕީއެމްގެ ހަރަކާތްތައް ހިންގުމުގައި އެންމެ އިސްކޮށް ހުންނަ ފަރާތައް ވެގެންދާނެކަމަށެވެ. 

ދާއިރާ ރައީސުންނަކީ ސީދާ ރައްޔިތުން އިންތިޚާބުކުރާ ފަރާތަކަށްވުމުން، ޕާޓީގެ ހިންގުން ރައްޔިތުން ބޭނުންވާ ގޮތަށް ކުރިއަށް ގެންދިއުމަށް ފަސޭހަވެގެންދާނެކަންވެސް އިދިކޮޅުން ފާހަގަކުރެއެވެ. 

އިދިކޮޅުން ވަނީ އިންތިޚާބީ 87 ދާއިރާއިން ދާއިރާ ރައީސުން ހޮވާފައެވެ. އަދި އޭގެ އިތުރުން ކޮންމެ ރަށަކުން އަންހެނުންގެ ތަރައްގީއަށް މަސައްކަތް ކުރާނެ ރައީސާއަކާއި ޒުވާނުންގެ ރައީސްއެއްވެސް ހޮވާފައެވެ.