ސަރުކާރާއި ވާދަވެރި ސިޔާސީ ޕާޓީ ޕީޕީއެމްގެ އެތެރޭގެ އިންތިޚާބެއް ބޭއްވުމުގެ ފުރުސަތު ލިބިގެން ދިއުމަކީ މި ސަރުކާރުން ސިޔާސީ މިނިވަންކަން ކަށވަރުކޮށްދީފައިވާކަން ހާމަކޮށްދޭ ހެއްކެއްކަމަށް އިކޮނޮމިކް މިނިސްޓަރު އަދި ސަރުކާރު ހިންގާ މައި ޕާޓީ އެމްޑީޕީގެ ޗެއަރޕާރސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވެފައިވަނީ ޕީޕީއެމްއިން އެތެރޭގެ އިންތިޚާބެއް ބޭއްވުމާއި ގުޅިގެން މަރުހަބާ ދަންނަވާ ކުރެއްވި ޓްވީޓެއްގައެވެ.
އެގޮތުން ފައްޔާޒު ވިދާޅުވީ އިދިކޮޅު ފަރާތްތަކުން ބާއްވާ ސިޔާސީ ހަރަކާތްތައް ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެއްކެއްކަމަށެވެ. މީގެ 5 އަހަރު ކުރިން މަންޒަރު ކިތަންމެހާވެސް ތަފާތުކަމަށާއި ވޯޓުފޮށި ބަލާ އޭރު އައީ ފުލުހުންކަމަށް ފައްޔާޒުގެ ޓްވީޓުގައި ވިދާޅުވެފައިވެއެވެ.
ޕީޕީއެމުން އެތެރޭގެ އިންތިޚާބެއް ބާއްވާފައިވާއިރު، އެ އިންތިޚާބަކީ ވަރަށް ކާމިޔާބުކަމާއެކު ކުރިއަށް ގެންދިޔަ އިންތިޚާބެއް ކަމަށް އެ ޕާޓީއިން ވަނީ ބުނެފައެވެ.
އަދި އެ އިންތިޚާބު ކާމިޔާބުކަމާއެއްކޮށް ކުރިއަށް ގެންދިއުމުން ޕީޕީއެމް ޑިމޮކްރަސީއަށް ފައްކާވެފައިވާ މިންވަރު ފެނިގެންދާނެކަމަށް ޕާޓީގެ ލީޑަރޝިޕުން ވަނީ ބުނެފައެވެ.
އޭގެ އިތުރުން އެ އިންތިޚާބަށް އެހާ ބޮޑު ތަރުހީބެއް ލިބުނީ ރައީސް ޔާމީންއަށް އޮތް ތާއީދު އިތުރުވަމުން ދާތީކަމަސް އިދިކޮޅުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
