އިއްޔެ ބޭއްވި އިދިކޮޅު ކޯލިޝަންގެ ދާއިރާތަކުގެ އިންތިޚާބުންވެސް އެނގިގެން ދިޔައީ، ރައްޔިތުން ތިބީ އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވެރިކަމަށް ގެންނަން ކެތްމަދުވެފައި ކަމަށް ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެެއެވެ.  

އިދިކޮޅު ކޯލިޝަންގެ ދާއިރާ ތަކުގެ އިންތިޚާބަށްފަހު އެކަމާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން އަދުރޭ ވިދާޅުވީ، އެ ކޯލިޝަނުން އުއްމީދު ކުރި ވަރަށްވުރެވެސް ގިނަ ބަޔަކު އެ އިންތިހާބުގައި ވޯޓުލާން ނުކުމެފައިވާކަމަށެވެ.

މިއައެކު އަދުރޭ ވިދާޅުވީ، މި އިންތިހާބަށް ބޮޑު ތަރުހީބެއް ލިބިއްޖެކަމަށް ގަބޫލުކުރައްވާ ކަމަށާ، އަދި އިންތިހާބު ނިމިގެންދިޔައީ ހަމަޖެހުމާއިއެކުގައިކަމަށާއި، މަސްލަހަތު ގެއްލޭފަދަ އެއްވެސްކަމެއް ނުހިގާކަމަށެވެ. އަދި މީގެ އިތުރުން މި އިންތިހާބާއިއެކު ޕާޓިގެ ހަރަކާތްތައް ކުރިއަށްވުރެ އެތައް ގޮތަކުން ވަރުގަދަ ވެގެންދާނެކަމަށާ އެގޮތުން ކޮންމެ ދާއިރާއެއްވެސް ބަލަހައްޓާނެ އިސް މީހަކާއި، އަދި އެމީހާއަށް އެހީތެރިވުމަށްޓަކައި ދާއިރާގެ ނައިބު ރައީސަކުވެސް ހުންނާނެކަން އޭނާ  ފާހަގަކުރެއްވިއެވެ.

އިދިކޮޅު ޕީޕީއެމް/ޕީއެންސީގެ ދާއިރާ އިންތިޚާބުގައި ޖުމްލަ 87 ދާއިރާއަކުން މަގާމުތަކަށް މީހުން އިންތިހާބުކުރެވުނުއިރު، މި ފަރާތްތަކުގެ އިންތިހާބީ ދައުރަކީ 3 އަހަރެވެ. މިއީ 2023 ވަނަ އަހަރުގެ ރިޔާސީއިންތިހާބަށް ތައްޔާރުވުމުގެ ގޮތުން ކުރަމުންދާ މަސައްކަތްކަމަށް ޕާޓީގެ ލީޑާޝިޕްއިން ފާހަގަކުރައްވައެވެ.