ޓްވިޓާގެ ވެރިފިކޭޝަނަށް މަހަކު 7.99 ޑޮލަރު ނަގަން ނިންމި ނިންމުން ހަގީގަތަކަށް ހަދައިފިއެވެ. 

މިކަން ހާމަކޮށްފައިވަނީ އެޕަލްގެ ޑިވައިސްތަކަށް އައި އެންމެ ފަހުގެ އަޕްޑޭޓާއެކުއެވެ. އެޕަލްގެ އައިއޯއެސް ޑިވައިސްތަކަށް ހޮނިހިރު ދުވަހު ޓްވިޓާ އިން ދިން އަޕްޑޭޓެއްގައި ބުނީ "މިހާރު ސައިން އަޕް" ކުރާ މީހުންނަށް "މިހާރު ވެސް ފޮލޯކުރާ ސެލެބްރިޓީންނާއި ކުންފުނިތަކާއި ސިޔާސީ މީހުން ފަދައިން" އެ މީހުންގެ ނަމުގެ ކައިރީގައި ނޫ ކުލައިގެ ޗެކް ލިބޭނެ ކަމަށެވެ. އަދި ޓްވިޓާގެ ވެރިފިކޭޝަން ހޯދުމަށް އެދޭ ކޮންމެ ޓްވިޓަރ ޔޫޒަރ އަކު، މަހަކު 7.99 ޑޮލަރު ދައްކަން ޖެހޭނެއެވެ. 

ވެރިފައިޑް އެކައުންޓުތަކުން ފީ ނެގުމަށް ޓުވިޓާގެ ވެރިފަރާތް އީލޮން މަސްކް ނިންމި ނިންމުމަށް ގިނަ ބައެއްގެ ފާޑުކިޔުންތައްވަނީ އަމާޒުވެފައެވެ. އެގޮތުން، ޓްވިޓަރގެ ޕޮލިސީއަށް ގެނައި މިބަދަލާއެކު ޓްވިޓަރ ބޭނުންކުރާ ފަރާތްތަކުގެ ތެރޭގައި ފޭކް ނުވަތަ ބޮޓް އެކައުންޓްތައް އިތުރުވެދާނެ ކަމުގެ ކަންބޮޑުވުންތަކެއް އުފެދިފައިވާ ކަމަށް ކަމާބެހޭ މާހިރުން ފާހަގަކުރެއެވެ. އަދި ސަރުކާރުގެ ފަރާތްތަކާއި، މަޝްހޫރު ނުފޫޒުގަދަ އެކި ފަރާތްތަކާއި، ނޫސްވެރިންނާއި، ބްރޭންޑްތައް ނަމުގައި ތައްޔާރުކުރާ ފޭކް އެކައުންޓަކުންވެސް މަހު ފީއެއް ދައްކައި ޓްވިޓާ ވެރިފައި ކުރެވިދާނެކަމުގެ ފުރުސަތު އިތުރުވެގެންދާނެކަމަށް ކަމާބެހޭ މާހިރުން ފާހަގަކުރެއެވެ.

Advertisement

އެހެންނަމަވެސް، އެފަރާތްތަށް ރައްދުދީ އޭނަވަނީ އެކަން ކުރާނެ ކަމަށް މީގެ ކުރިންވެސް ބުނެފައެވެ. އަދި މި ފީއާއެކު ވެރިފައިކުރާ މީހުންނަށް، ރިޕްލައި ކުރުމާއި ސާޗުކުރުމާއި ދިގު ވީޑިއޯ/އޯޑިއޯ ލެވޭނެ ގޮތް ހަދާނެ ކަމަށްވެސް އޭނާ ބުންޏެވެ.

މީގެކުރިން، ޓްވިޓާގެ ވެރިފިކޭޝަނާއެކު ލިބޭ ބްލޫ ޓިކް ލިބެނީ ހަމައެކަނި މަތީ ފެންވަރުގެ ނުވަތަ ނުފޫޒުގަދަ ފަރާތްތަކާއި، ޖަމިއްޔާތަކަށް - އެމީހުންގެ އައިޑެންޓިޓީ ސާބިތު ކުރުމާއެކުއެވެ. ވެރިފައި ކުރުމާއެކު، އެޓްވިޓަރ ޔޫސަރ އަކީ ސައްހަ އެއްޗެއް ކަމުގެ ނިޝާނެއްގެ ގޮތުގައި ފާހަގަވެގެން ދިއުމާއި، ޓްވިޓަރ މެދުވެރިކޮށް އިތުބާރު ހުރި މައުލޫމާތު ދެނެގަތުމަށް އެހީތެރިވެދެއެވެ.