ފަރުކޮޅުފުއްޓަށް ބަދަލު ކޮށްފައިވާ އެސްޖެހި ގަނޑުވަރު ތަރައްގީކޮށް، ހިންގާނެ ބަޔަކު ހޯދަން ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން އިއުލާންކޮށްފިއެވެ.
އެޗްޑީސީ އިން ކޮށްފައިވާ އިއުލާނެއްގައި ބުނީ އެސްޖެހި ގަނޑުވަރު ތަރައްގީކޮށް އެތަނުގައި ރެސްޓޯރެންޓެއް ހިންގަން ޝައުގުވެރިކަން ހުރި ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލާފައިވާ ކަމަށެވެ.
އަދި އެކަމަށް އެއްފަރާތަށްވުރެ ގިނަ ފަރާތްތަކުން އެ މަސައްކަތް ކުރުމަށް ޝައުގުވެރިކަން ފާޅުކޮށްފި ނަމަ އިސްކަން ދޭނީ އެޗްޑީސީގެ މާސްޓާ ޕްލޭނާ އެއްގޮތަށް އެ މަސައްކަތް ކުރަން ޝައުގުވެރިވާ އެޗްޑީސީގެ ބިޒްނަސް މޮޑެލްއާ އެއްގޮތަށް އެ މަސައްކަ ތްކުރަން ހުށަހަޅާ ފަރާތަކަށް ކަމަށެވެ.
މީގެ އިތުރުން އެޗްޑީސީން ބުނީ ޕްރޮޕޯސަލްތައް އިވެލުއޭޓްކުރުމުގައި ހުށަހަޅާ ފަރާތުގެ އަމަލީ ތަޖުރިބާ އާއި މާލީ ގާބިލުކަމާއި ފަންނީ ފެންވަރާ އަދި އެ މަސައްކަތްކުރުމުގެ ގާބިލުކަން ހުރި މިންވަރު ވެސް ބަލާނެ ކަމަށެވެ. އަދި ބުނީ އެ މަސައްކަތް ކުރުމަށް ޝައުގުވެރިކަން ހުރި ފަރާތްތަކުން އެކްސްޕްރެޝަން އޮފް އިންޓަރެސްޓް (އީއޯއައި) އެޕްލިކޭޝަން ފޯމު މި މަހު 23ގެ ކުރިން ހުށަހެޅުމަށް އެދޭ ކަމަށެވެ.
އެސްޖެހި ގަނޑުވަރަކީ މާލޭގައި ހުރި އެންމެ ދުވަސްވީ އަދި ތާރީހީ ތަންތަނުގެ ތެރޭގައި ހިމެނޭ ތަނެކެވެ. އެގޮތުން އެތަނަކީ މާލޭގައި ހުރި މުންނާރާއި ހުކުރު މިސްކިތް ބިނާކުރި ދުވަސްވަރުގައި ބިނާކުރި ތަނެއް ކަމެއް ބުނެވެއެވެ. އެތަން ހުޅުމާލެއަށް ބަދަލު ކުރުމުގެ މަސައްކަތް އެޗްޑީސީ އިން ފެށީ މިއަހަރުގެ އޭޕްރީލް މަހުގެ ތެރޭގައެވެ.
Advertisement
This content is created and paid for by advertisers and does not involve Voice Journalists
