‏ޖީއެސްޓީއާއި ޓީޖީއެސްޓީ އަދި އެނޫންވެސް ގޮތްގޮތުން ދައުލަތަށް ނުލިބިވާ ފައިސާގެ ޖުމުލަ އަދަދު 15.2 ބިލިއަން ރުފިޔާއަށް އަރާ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)އިން އާއްމުކޮށްފައިވާ މިއަހަރުގެ ތިންވަނަ ކުއާޓަރުގެ ރިޕޯޓާއި ހަވާލާދީ ވައްޑެ ކުރެއްވި ޓުވީޓެއްގައި ވިދާޅުވީ، ދައުލަތަށް ނުލިބިވާ ފައިސާގެ ޖުމުލަ އަދަދު 15.2 ބިލިއަން ރުފިޔާއަށް އަރާ ކަމަށެވެ. އަދި އޭގެ ތެރޭގައި އިންކަމް ޓެކްސް، ޖީއެސްޓީ އާއި އެހެނިހެން ޓެކްސްގެ ގޮތުގައި ލިބެން ޖެހޭ ޖުމުލަ 5.5 ބިލިއަން ރުފިޔާ ހިމެނޭ ކަމަށްވެސް އޭނާ ވިދާޅުވިއެވެ.

"ރިސޯޓުތަކުގެ ކުލިން ނުލިބިވާ ފައިސާގެ އަދަދު 9.1 ބިލިއަނަށް އަރައެވެ." ވައްޑެ ވިދާޅުވި އެވެ. 

މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)އިން އާއްމުކޮށްފައިވާ މިއަހަރުގެ ތިންވަނަ ކުއާޓަރުގެ ރިޕޯޓުގައި ބުނެފައިވާ ގޮތުން މިދިޔަ ސެޕްޓެމްބަރުގެ ނިޔަލަށް އެސްއޯއީ ތަކުން ޓެކުހުގެ ގޮތުގައި ނުލިބިވާ ފައިސާގެ އަދަދު 890 މިލިއަން ރުފިޔާއަށް އަރައެވެ. ޓެކްސް ނޫން އާމްދަނީން ނުލިބިވާ ފައިސާގެ އަދަދު 88 މިލިއަނަށް އަރަ އެވެ. އެއީ ޓެކްސް ދައްކަން ޖެހޭ މުއްދަތު ހަމަވެ، ޖޫރިމަނާއަށް ދައްކަން ޖެހޭ އަދަދު ނުހިމަނައެވެ. ޖޫރިމަނާ ހިމަނައިގެން މި އަދަދުތަކުގެ ޖުމްލަ 1.3 ބިލިއަން ރުފިޔާއަށް ވުރެ އިތުރެވެ.

މީރާގެ ތަފާސްހިސާބުތަކުން އެނގޭ ގޮތުގައި މިދިޔަ ސެޕްޓެމްބަރުގެ ނިޔަލަށް ދައުލަތަށް ނުލިބިވާ ފައިސާގެ ޖުމުލަ އަދަދު 15.2 ބިލިއަން ރުފިޔާއަށް އަރައެވެ. އޭގެ ތެރޭގައި އިންކަމް ޓެކްސް، ޖީއެސްޓީ އާއި އެހެނިހެން ޓެކްސްގެ ގޮތުގައި ލިބެން ޖެހޭ ޖުމުލަ 5.5 ބިލިއަން ރުފިޔާ ހިމެނެއެވެ. ރިސޯޓުތަކުގެ ކުލިން ނުލިބިވާ ފައިސާގެ އަދަދު 9.1 ބިލިއަނަށް އަރާއިރު ޓެކްސް ނޫން އެހެނިހެން އާމްދަނީން ލިބެންވާ ފައިސާގެ އަދަދު 587 މިލިއަން ރުފިޔާއަށް އަރައެވެ.